地球: 離太陽第三近嘅行星

地球

地球由太空嗰度望落嚟個樣；呢幅相俾人話令地球睇落好似一粒藍色波子噉。
軌道參數
曆元 J2000
遠日點	152,097,701 km （1.016 710 333 5 AU）
近日點	147,098,074 km （0.983 289 891 2 AU）
半長軸	149,597,887.5 km （1.000 000 000 0 AU）
離心率	0.016 710 219
平均速度	29.783 km/s （107,218 km/h）
軌道傾角	0 （7.25°至太陽赤道）
升交點黃經	348.739 36°
近日點參數	114.207 83°
衛星	1個（月球）
物理特徵
平均半徑	6,372.797 km
赤道半徑	6,378.137 km
極半徑	6,356.752 km
表面積	510,065,600 km²
體積	1.083 207 3×1012 km³
質量	5.9742×1024 kg
平均密度	5,515.3 kg/m³
表面重力	9.780 1 m/s² （0.997 32 g）
逃逸速度	11.186 km/s（≅39,600 km/h）
恒星自轉週期	0.997 258 d（23.934 h）
赤道自轉速度	465.11 m/s
轉軸傾角	23.439 281°
北極赤經	未定義
北極赤緯	+90°
反照率	0.367
表面溫度 最低 平均 最高 熱力學溫標 184 K 287 K 331 K 攝氏溫標 -89.2 ℃ 14 ℃ 57.7 ℃
大氣
表面氣壓	101.3 kPa（海平面）
成分	78.084% 氮 20.946% 氧 0.934% 氬 0.0381% 二氧化碳 水蒸氣（跟氣溫而有唔同，詳細睇相對濕度）

佢距離太陽 1.5 億公里（1個天文單位）遠，係太陽系嘅行星入面第三近太陽嘅－排正喺水星同金星之後。佢嘅質量係 5.97 × 10²⁴ 公斤左右，半徑大約係 6371 公里，密度係每立方厘米 5.514 克。如果齋由大細嚟睇，佢喺太陽系嘅行星入面排第五，係太陽系嘅類地行星（Terrestrial planet；指主要由石頭構成嘅行星）入面最大粒嘅；同時佢係太陽系入面密度最高嘅行星。同其他行星一樣，地球會自轉同公轉：佢大約每廿四個鐘頭會自轉一個圈（為之一日），每 365.26 日會圍住太陽公轉一個圈（為之一個太陽年）。佢嘅自轉產生咗晝夜，而公轉就產生咗一年嘅四季。同時，地球有粒自然衛星－月球－圍住佢轉。

地球嘅表面有 71% 嘅面積俾水𢫏住－呢啲面積包括咗海、河、同埋湖呀噉，淨低嘅係由陸地板塊（Tectonic plate）組成嘅各個大陸同埋島。兩極地區大部份地方長年俾冰覆蓋。地球嘅內部分做外地核同內地核兩層，前者由熔化咗嘅金屬組成，而後者由固體嘅金屬組成。喺地球嘅最外層，有一浸氣體包住－即係所謂嘅大氣層。大氣層嘅主要成分係氮（Nitrogen）同氧（Oxygen）呢兩種元素。

地球係目前成個宇宙入面已知嘅行星當中唯一一個有生命存在嘅，而且佢仲係智人（Homo sapien）嘅屋企。佢喺大約 45 億 4 千萬年前形成，而月球就係喺之後嘅 1 千萬年開始圍住佢轉。地球形成咗 10 億年之後左右開始有生命體，而隨住生物嘅進化，佢今日已經住咗各種各樣嘅生物，有各種嘅動物同植物－即係有生物多樣性（Biodiversity）。

根據對化石同基因嘅研究，現代嘅人類喺大概 500 萬至 700 萬年之前出現，而且同現代嘅黑猩猩係近親。到咗廿一世紀初，地球上大約有 74 億人口。聯合國估話會愈嚟愈多。人類有得分做黃種人、白人、同埋黑人等多個人種，而呢柞人種入面又有啲亞種－例如係黃種人，就有得分做漢族同大和族等，而漢族仲有得細分類做包括粵人在內嘅各個民系－人類喺文化同血統上都好多樣化。

地球喺英文當中係叫「Earth」或者「Globe」，前者又有「大地」、「泥土」等呢類嘅意思。「Earth」呢個字源自中古英文（Middle English；現代英語嘅祖先）度「eorþe」、「erþe」、「erde」同「erthe」等嘅單詞，歷史仲有得追溯到上古英文（Old English；中古英文嘅祖先）入面嘅字「eorðe」。呢個字喺日耳曼語族（Germanic language family；包括咗英文、德國話、荷蘭話、瑞典話等由古日耳曼人嗰度演變出嚟嘅語言）各個語言入面都有同源詞。

除咗噉，喺英文當中有時會嗌地球做「Terra」。呢個字嚟自古羅馬嘅語言－拉丁文－入面嘅字「Terra」，呢個字係古羅馬神話入面嘅大地女神個名，後嚟引申咗做「大地」、「地球」等嘅意思。另外，現代英語度有時又會嗌地球做「Gaia」或者「Gaea」－呢兩個字嚟自希臘話入面嘅「Γαῖα」，亦即係希臘神話入面嘅大地女神蓋亞個名，好似「Terra」噉後嚟變咗做「大地」、「地球」呢類嘅意思。

喺唐話（包括廣東話、官話、同上海話等）入面「地球」呢個詞最早出現喺大明（公元後14 至 17 世紀）嘅西學東漸時期，由意大利傳教士利瑪竇（Matteo Ricci，1552 - 1610）引入。喺打後少少嘅大清時期尾，西方嘅科學思想傳咗入大中華地區（包括嶺南），令到唐人開始接受咗地圓說，並且開始用「地球」呢個詞嚟稱呼人類住緊嘅星球。呢兩個唐字喺每種唐話入面嘅讀音都唔同，而喺廣東話入面係讀做「粵拼：dei6 kau4」嘅。

形狀

 

地球大致上係呈橢球形－因為佢自轉嘅效應令到佢沿住貫穿兩極嘅地軸（Axial tilt）方向稍為扁咗，而赤道嗰頭就略為有啲隆起（英文：equatorial bulge）。總體嚟講，地球嘅赤道半徑比起極半徑大咗 43 公里左右（27 英里）左右。 正因為噉，地球表面離地球嘅質心最遠嘅地方唔係海拔最高嘅珠穆朗瑪峰（Mount Everest），而係喺赤道上面嘅厄瓜多爾嘅欽博拉索山（Chimborazo）嘅山峰。

地球嘅參考橢球體（Reference ellipsoid；指一個用數學方法整出嚟，同真嗰個地球最接近嘅完美橢球體）平均直徑大約係 12742 公里（7918 英里），大約等於 40000 公里除以 π。因為局部地勢有起伏（表面有好多凹凹凸凸），地球同理想嘅橢球體有啲偏差，唔係一個真正嘅橢球體。不過由行星嘅尺度嚟睇嘅話，呢啲起伏同地球嘅半徑比起上嚟好細，最大嘅偏差都淨係等於地球半徑嘅 0.17%，而喺海平面下 10911 米（35797 英尺），出咗名深嘅馬利安納海溝（Mariana Trench）同埋海拔 8844 米（29016 英尺）嘅珠穆朗瑪峰都只係產生咗等於地球半徑 0.14% 嘅偏差。如果將地球縮到枱波噉嘅大細，地球上面好似大型山脈同海溝噉嘅地方摸落去就會好似一啲微細嘅瑕疵噉，而其他大部分嘅地區，比如北美嘅大平原同深海平原摸落就會好光滑。

化學成份

地球嘅質量大約係 5.97 × 10²⁴ 公斤，即係 5970 堯克（Yottagrams；Yg）。構成地球嘅化學元素主要有鐵（Iron，Fe；32.1%）、氧（Oxygen，O；30.1%）、矽（Silicon，Si；15.1%）、鎂（Magnesium，Mg；13.9%）、硫（Sulphur，S；2.9%）、鎳（Nickel，Ni；1.8%）、鈣（Calcium，Ca；1.5%）、同埋鋁（Aluminium，Al；1.4%）。淨低嗰 1.2% 係其他微量元素，例如係鎢（Tungsten，W）、金（Gold，Au）、汞（Mercury，Hg）、氟（Flourine，F）、硼（Boron，B）、氙（Xenon，Xe）。因為地球有質量層化（Mass segregation；指質量高啲嘅嘢向中心嗰度集中）嘅現象，估計構成地核嘅主要化學元素係喺元素當中算比較重嘅鐵（88.8%），而其他構成地核嘅元素包括有鎳（5.8%）同埋硫（4.5%），同埋質量加埋少過 1% 嘅微量元素。構成地幔嘅主要礦物質就包括輝石（Pyroxene；化學式係 (Mg,Fe,Ca,Na)(Mg,Fe,Al)(Si,Al)₂O₆）同埋橄欖石（Olivine；化學式係 (Mg,Fe)₂SiO₄）等等。

至於地殼嘅化學成份，據研究，氧係地殼度最多嘅元素，佔咗 46% 。地殼嗰度有好多含氧嘅化合物，包括水、二氧化矽（Silicon dioxide）、硫酸鈣（Calcium sulfate）、碳酸鈣（Calcium carbonate）、同埋氧化鋁（Aluminium oxide）等，常見嘅構成地殼嘅岩石嘅化合物絕大部分都有氧嘅化合物。有啲岩石就係氟化物（Flouride）、硫化物（Sulfide）、同氯化物（Chloride），但係氟、硫、同氯喺任何地方嘅岩層入面嘅總含量通常遠遠低過 1%。而佔咗地殼淺表面 90% 以上體積嘅火成岩（Igneous rock）主要由二氧化矽（Silicon dioxide；SiO₂）同埋矽酸鹽（Silicate）構成。地球化學家 Frank Wigglesworth 基於 1672 個對各種岩石嘅分析計過數，推算 99.22% 嘅岩石係由下面個表列出嚟嘅氧化物構成。

內部構造

地球同其他石質行星一樣，內部可以根據物理或者化學上嘅性質嚟分做若干層，但係地球嘅內核同外核好明顯唔同，呢點係其他石質行星冇嘅特徵。地球嘅外層係由矽酸鹽礦物組成嘅地殼。地殼嘅厚度隨住位置有啲唔同，薄至深海海底嘅 6 公里，厚至陸地上面嘅 30 至 50 公里。地殼下面有層由黏稠嘅半熔固體組成嘅地幔（Mantle）。地殼同埋地幔凍啲、硬淨啲嘅上層係岩石圈（Lithosphere；大約係由地表數 5 至 200 公里深），板塊係喺呢個區域形成，地殼同地幔之間嗰條分界線係莫氏不連續面（Mohorovičić discontinuity，或者叫「Moho」）。再落少少，岩石圈以下嘅係黏度低啲，熔得犀利啲嘅軟流圈（Asthenosphere）。岩石圈喺軟流圈上面浮吓浮吓，而呢啲活動同地震等嘅自然現象有好大啦掕。

地幔晶體結構喺地表以下 410 至 660 公里之間開始有重大變化。嗰度係分隔上地幔同下地幔嘅過渡區（Transition zone），地幔下面係分隔地幔同地核嘅核幔邊界（Core-mantle boundary），再落就係黏度好低嘅液體外地核（Outer core），而最裏面嘅係呈固體嘅內地核（Inner core）。內地核嘅半徑大約係 1220 公里，係地球半徑嘅 1/5 。佢旋轉嗰陣嘅角速度可能會快過地球其他部份些少，每年大約領先 0.1 - 0.5° 。

地球嘅內部構造

由地核到地表嘅地球結構圖（唔跟比例畫）	深度 （公里）	組件層	密度 （公克/立方公分）
	0-60	岩石圈	—
	0-35	地殼	2.2-2.9
	35-60	地幔頂層	3.4-4.4
	35–2,890	地幔	3.4-5.6
	100-700	軟流層	—
	2,890-5,100	外核	9.9-12.2
	5,100-6,378	內地核	12.8-13.1

內熱

喺地球嘅內熱（Internal heating）當中，吸積嘅殘餘熱佔咗 20% 左右，其餘 80% 嘅熱係嚟自核衰變（Radioactivity），即係靠地球內部嘅鉀-40（Potassium-40）、鈾-238（Uranium-238）、鈾-235（Uranium-235）、同埋釷-232（Thorium-232）等嘅同位素發放輻射產生熱力。呢股熱令到地心嘅温度去到攝氏 6000 度（華氏 10830 度），而壓力就去到 360 GPa，足以壓扁一個人。1980年嘅時候, 實驗室裏面用鑽石壓砧都可以造到差唔多嘅壓力。

頭先講咗，地熱好多都係嚟自核衰變（即係唔穩定嘅原子核發放輻射並且變成穩定原子核嘅過程），所以地球科學家推測喺地球歷史再早啲嗰陣，地球有更加多可以發放輻射嘅同位素，所以嗰時佢可以產生更大嘅內熱，喺 30 億年前可能係而家嘅兩倍。當時嘅地球沿住半徑嘅温度梯度會更加大，而地幔對流（Mantle convection；地幔因為內熱而慢慢會郁嘅現象）同埋板塊構造嘅速度亦都更加快，仲可能會產生一啲以今時今日嘅地質條件好難產生到嘅岩石，好似係科馬提岩（Komatiite）噉。

散熱系統

地球有好多系統將地核嘅熱能散走。地球表面嘅平均散熱功率（指能量消耗得有幾快）大約係 87 mWm⁻²。成個地球內部嘅散熱功率就大約係 4.42 × 10¹³ W 。地核嘅一啲熱能通過高温嘅熔岩向上湧，傳到去地殼嗰度，呢種熱對流就叫做地幔熱柱（Mantle plume），地幔仲會因為噉而產生熱點（Hotspot）。除咗噉，地球內部嘅熱能仲會喺板塊活動嗰陣通過地幔升上去中洋脊（Mid-ocean ridge；海底一柞喺板塊之間嘅山脈）而流失。另外一種熱能流失嘅方式係藉住岩石圈嘅熱傳導，喺地殼薄啲嘅海底比較常見。

板塊構造

地球嘅板塊構造

板塊個名	板塊嘅面積 106 km2
太平洋板塊	103.3
非洲板塊	78.0
北美洲板塊	75.9
歐亞大陸板塊	67.8
南極洲板塊	60.9
印度-澳洲板塊	47.2
南美洲板塊	43.6

喺地球外層嘅剛性岩石圈分做好幾塊板塊。目前地球嘅主要板塊有太平洋板塊、北美洲板塊、歐亞大陸板塊、非洲板塊、南極洲板塊、印度-澳洲板塊、同南美洲板塊呢啲。另外仲有阿拉伯板塊、加勒比板塊、位於南美洲西海岸對出嘅納斯卡板塊、同埋位於南大西洋嘅斯科舍板塊。呢啲板塊比較硬淨，喺軟流圈上面浮吓浮吓，會慢慢噉郁，做成板塊之間嘅相對運動。呢啲郁動分做三種：一係聚合板塊邊緣（Convergent plate boundary）－指兩塊板塊互相靠近；二係分離板塊邊緣（Divergent boundary）－指兩塊板塊分離；三係轉形斷層（Transform fault）－指板塊之間互相橫向噉郁。因為呢啲地殼活動，導致呢啲板塊嘅邊緣上面容易有地震、火山活動、造山運動、同埋形成海溝，好似係日本列島同台灣就係坐正喺板塊邊緣上面嘅地方，間唔鐘就會有地震。唔同嘅板塊郁嘅速度唔同：喺呢啲板塊當中，大洋板塊郁得快啲，而大陸嘅板塊郁得慢啲，好似係屬於大洋板塊嘅科科斯板塊位移嘅速度係每年 75 毫米，而太平洋板塊就以每年 52 至 69 毫米嘅速度位移；屬於大陸板塊嘅歐亞大陸板塊，平均以得每年大約 21 毫米嘅速度行進。

隨住板塊嘅飄移，海入面嘅岩石會跌落去聚合板塊邊緣嘅前緣下方，同時地幔嘅物質會喺分離板塊邊緣做成嘅空間嗰度上升。呢啲過程令到海洋地殼一邊係噉產生跟住又俾佢回收返落地幔嗰度，所以海洋地殼嘅岩石更新得好密。因為噉，海洋地殼多數好後生，低過 1 億歲。而家最古老嘅海洋地殼喺西太平洋地區，估計大約係 2 億歲。相比之下，最古老嘅大陸地殼年齡有成 40.3 億歲。

地表

地球表面嘅面積總共大約有 5.1 億平方公里，當中大約 70.8% 嘅面積俾水𢫏住，令到大部分嘅地殼表面（3.6113 億平方公里）都係喺海平面以下。海底嘅地殼表面有好多山，包括一個全球性嘅中洋脊－一列沿住板塊邊緣形成嘅山脊，仲有好多海底火山、海溝、海底峽谷、海底高原、同深海平原。地球表面其餘嗰 29.2%（1 億 4894 萬平方公里，或者 5751 萬平方英里）係冇俾水𢫏嗮嘅地方，有好多山地、盆地、平原、高原等嘅地形。海平面以上嘅平均海拔係 840 米：成個海平面以上地表最低嘅地方係位於西亞嘅死海，佢海拔大約係 -420 米，而海拔最高點係位於中國同尼泊爾邊境嘅喜馬拉雅山脈嘅珠穆朗瑪蜂，海拔超過 8848 米。

人整咗好多將地球表面分區嘅方法。傳統上，地表俾人分做七大洲、四大洋、同埋唔同嘅海域，仲會用兩極點做中心將地球分做南半球同北半球兩個半球，用經度分做東半球同西半球，或者大致按海同陸地嘅分佈分做水半球同陸半球。

呢啲數據同分區會隨住時間而演變。地球嘅地表一路俾好多大自然嘅力量塑造緊，例如：大風、降水、熱循環、化學反應、冰川作用、海岸侵蝕、珊瑚礁形成、大大細細嘅隕石撞擊，呢啲都會影響到地表嘅地貌，但係地表地貌郁得實在太慢（吓吓都要成幾百萬年先會有用肉眼睇得出嘅改變），所以人一般都冇辦法直接感受到變化，要用一啲好精密嘅科學儀器嚟量度。

岩石同礦物

地球表面有好多岩石，大致上可以跟住佢哋嘅成因分做三大類：火成岩、沉積岩（Sedimentary rock）、同變質岩（Metamorphic rock）。火成岩係由升到去地表嘅岩漿或者熔岩冷卻凝固形成嘅，又嗌做「岩漿岩」，係構成地殼嘅主要岩石。火成岩又分為兩種：一係岩漿侵入地表而形成嘅侵入岩，例如係花崗岩（Granite）；二係岩漿噴出地表嗰度形成嘅噴出岩，例如係安山岩、玄武岩。大陸嘅地殼主要由密度低啲嘅花崗岩同安山岩構成，而海地殼主要由緻密嘅玄武岩構成。除咗呢啲火成岩，沉積岩都係成日見到嘅岩石。佢哋係由堆積同結合埋一齊嘅沉積物嗰度形成嘅。差唔多成 75% 嘅大陸表面都係俾沉積岩覆蓋住－雖然佢哋只係霸咗大約 5% 嘅地殼。最後，變質岩係由原有嘅岩石喺高壓高溫嘅環境之下變質而形成嘅，好似係大理石噉。

地球表面有好豐富嘅礦物，包括係石英、長石、角閃石、雲母、輝石、同橄欖石呢啲矽酸鹽礦物，同埋方解石等嘅碳酸鹽礦物。

土壤圈

土壤圈（Pedosphere）係地球陸地表面嘅最外層，由土壤組成。土壤圈係成個地球嘅生態系統最緊要嘅組成部份之一，生物需要嘅好多養份嘅循環都係要靠土壤嚟維持。

 

水圈

 

水圈（Hydrosphere）係指一個星球上面嘅水系統。地球有個好豐富嘅水圈。佢表面大半都俾水𢫏住，呢點令到佢同其他太陽系嘅行星好唔同，亦都因為噉有個花名叫「藍色星球」。地球嘅水圈主要係海，但係陸海、湖、河、同埋深到去地下 2000 米嘅地下水都佔咗一定嘅比例。地球嘅水圈當中 2.5% 嘅水係淡水，其餘係鹹水，而淡水當中有 68.7% 係以冰（好似係冰川）嘅形式存在。

地球個海嘅總質量大約係 1.35×10¹⁸ 噸，相當於地球總質量嘅 1/4400。成個地球海嘅面積係 3.618×10⁸ 平方公里，平均深度係 3682 米，總體積係 1.332×10⁹ 立方公里左右。如果地球地表嘅海拔冚唪唥都係一樣而且地球係個平滑嘅球體嘅話，佢個海會有 2.7 到 2.8 公里深。呢個海入面嘅係鹹水，平均鹽度大約係 3.5%，即係每公斤嘅海水度有 35 公克嘅鹽。大部分嘅鹽都係喺火山嘅作用或者冷卻嘅火成岩嗰度產生嘅。

海儲起咗好多重要嘅能量，係一個大型嘅儲熱庫。海水對全球嘅氣候嚟講好緊要。佢嘅溫度分佈嘅變化可以對天氣嘅變化造成好大嘅影響。水嘅比熱（Heat capacity；嗰樣物質温度每上升一度需要嘅能量）大過岩石泥土嘅－即係話周圍多水嘅地區（好似係嶺南呢啲近海嘅地區）需要更多嘅能量改變先至會改變温度，所以佢哋嘅氣候往往同內陸地區嘅比起上嚟會溫和好多，温度變化冇噉勁。例如係北歐嘅北部，雖然佢係喺正北極圈入面，但係因為三面環海，氣候好適宜。相反，緯度低少少嘅加拿大北部同埋俄羅斯遠東地區－都係內陸地區－温度好極端，冬天會凍到乜噉。

海水嘅流動亦都好重要。海水受到風等嘅因素影響，會流嚟流去－形成洋流。洋流主要分做暖流同寒流兩種，暖流會將海水吸收咗嘅熱能帶嚟帶去，而佢哋流經嘅地區會有「增溫增濕」嘅效應，好似係將啲熱能由赤道海域帶返去極地嘅溫鹽環流（Thermohaline circulation）。洋流異常仲會搞到天氣跟住異常，例如厄爾尼諾現象（El Niño-Southern Oscillation）就係一種因為海流而造成天氣異常嘅現象。

大氣圈

 

大氣圈（Atmosphere）係指因為地球嘅重力而圍住地球嘅一浸氣體。地球表面嘅平均氣壓大約係 101.325 千帕，大氣標高係 8.5 公里。大氣層入面有 78% 係氮、21% 係氧、其餘係水蒸氣、二氧化碳同埋其他嘅氣態分子。地球嘅大氣層冇一個好精確嘅邊界，係隨住同地表嘅距離愈遠，空氣就愈稀薄，最後喺外太空就冇嗮。大氣層入面 3/4 嘅質量都集中喺離地表平均 11 公里高嘅地方，而呢個位置就係所謂嘅對流層（Troposphere）。隨住緯度唔同，對流層有唔同嘅高度，比如喺赤道附近嘅對流層係 17 公里高，而位於兩極嘅對流層就只有 8 公里高。另外，對流層嘅高度仲會跟住天氣同季節因素改變。

地球嘅生物圈同佢嘅大氣層息息相關－後者有好多種保護生物嘅功能。喺 27 億年前，地球開始有植物同光合作用，就開始咗生產氧氣，最後形成家陣主要由氮同氧組成嘅大氣圈。呢啲變化令到吸氧嘅生物（好似係人類噉）可以生存繁殖。跟手大氣入面嘅氧仲會轉化成臭氧（Ozone），形成咗臭氧層。臭氧層阻擋太陽輻射入面嘅紫外線。紫外線對生物嚟講好有害，所以臭氧層擔當咗保護地表嘅生物嘅角色。除咗噉，大氣圈入面某啲嘅微量氣體分子（包括水蒸氣、二氧化碳、甲烷、同臭氧）識得吸收同反彈由地表射出去嘅長波輻射，防止熱能流失去外太空，亦即係所謂嘅溫室效應（Greenhouse effect）。適量嘅温室效應令地球表面保持到一定嘅温度，唔會好似水星表面噉一冇日照就跌到落零下百幾度。地球科學家計過，如果地球完全冇溫室效應嘅話，地表嘅平均溫度淨係會得 −18°C（而家 +15°C），喺嗰種環境之下生命好可能唔會存在。除咗噉，大氣層仲會運送水汽同埋令到流星體喺撞落地面前燒燬。

天氣同氣候

 

美國太空總署（NASA）嘅中解像度成像光譜儀影嘅衛星雲圖

 

啱啱落落嚟嘅雪花；雪係降水嘅一種。

大氣圈唔係靜止嘅，而佢嘅郁動影響住天氣同氣候。嚟自太陽嘅能量將地表同對流層嘅氣體加熱，空氣受熱膨脹，然後就因為密度下降而向上升，四周圍凍啲、密度高啲嘅氣體會過嚟填補，於是乎啲空氣就係噉郁嚟郁去－就係所謂嘅大氣環流（Atmospheric circulation）。主要嘅大氣環流帶有緯度 30° 以下赤道地區嘅信風（Trade winds）同緯度 30° 至 60° 之間嘅中緯度西風帶（Westerlies）。呢啲環流令到地球嘅熱能重新分佈，亦都產生咗各種嘅天氣現象同氣候條件。

大氣圈同水循環好有啦掕，佢哋之間嘅互動亦都影響到天氣同氣候。由地表嗰度蒸發走嘅水蒸氣會畀大氣環流吹嚟吹去。如果大氣環境啱嘅話，又暖又濕立立嘅空氣會上升，跟住佢入面嘅水汽會凝結，形成雲，最後降水（包括落雨同落雪等現象）跌返落地面。返到地面嘅水大部分都會通過河流系統流去低海拔嘅地區，通常會返去海或者聚集喺湖度。水循環係地球能夠維持有生命體生存嘅主要原因之一。水循環仲會侵蝕地表，令到地表慢慢走樣。

地球各地嘅降水量因為大氣環流、地貌特徵、氣溫差異等因素所以好唔一致，由年年幾千毫米到一年唔夠一毫米嘅都有。

大氣圈喺唔同緯度嘅分佈同厚度都唔同，咁會影響到天氣同氣候。愈係喺高緯度（近兩極）嘅地區，太陽照落地面嘅角度就會愈細，於是喺嗰啲地區陽光要通過嘅大氣層就會厚啲，所以嗰啲地區冇噉好太陽，平均氣溫都會低啲。緯度每高 1 度，海平面每年嘅平均氣溫就降低大約 0.4°C （0.7°F）。地球表面按照氣候大致分成好幾個緯度帶，由赤道到兩極順次序係熱帶（Tropical）、亞熱帶（Subtropical）、溫帶（Temperate）、極地（Arctic）氣候。氣候分區亦都可以按照氣溫同降水量嘅異同嚟分類，常用嘅有柯本氣候分類法（Köppen climate classification）（將全球嘅氣候分做五大類：A類熱帶氣候、B類乾旱氣候、C類溫帶氣候、D類冷溫帶氣候、E類極地氣候、高山氣候）。

1913 年喺美國加利福尼亞州死亡谷國家公園嘅爐溪谷地測到嘅 溫度係 56.7°C （134.1°F），係地球上目前測到最高嘅氣溫；1983 年喺南極洲沃斯托克站測到 −89.2°C （−128.6°F），係全球最低嘅氣溫之一，而遙感衛星曾經喺南極洲東部測到 −94.7°C （−138.5°F），係有紀錄以嚟地球嘅最低温度。呢啲氣溫係由二十世紀開始用現代儀器度嘅，未必完整體現到地球氣溫嘅範圍。

高層大氣

 

高層嘅大氣層（對流層以上嘅大氣層）通常分做平流層（Stratosphere）、中間層（Mesosphere）、熱層（Thermosphere）、同散逸層（Exosphere）。每一層嘅溫度隨住高度嘅變化，有唔同嘅規律。平流層上面嘅臭氧層可以吸收部分太陽射過嚟嘅紫外線，所以平流層當中高度愈高溫度愈高。中間層嘅溫度就隨住高度增加而下跌。喺熱層嗰度，因為氣體原子吸收好多太陽輻射入面嘅短波成分，溫度隨住高度嘅增加會大幅上升。喺熱層比較高嘅部分因為空氣稀薄，溫度高啲，氣體分子會發生電離，形成等離子體，構成電離層（Ionosphere）。散逸層向外揚，愈嚟愈薄，直到磁層（Magnetosphere）－地磁場同太陽風（Solar wind；指太陽射過嚟嘅帶電粒子）相交嘅地方。

再上啲，距離地表 100 公里嘅高空叫做卡門線（Kármán line），被視為大氣層同外層空間嘅分界。

由於熱運動現象，大氣層外面嘅一啲粒子嘅速度可以高到擺脫到地球嘅引力飛走，令到大氣嘅氣體慢慢持續噉散失到外太空嗰度。當中游離嘅氫（Hydrogen）分子質量細，所以加容易加速到擺脫到地球引力，而散失到外太空嘅速度亦都更加快。地球科學家認為粒子散失會改變地球嘅大氣環境，長遠嚟講（講緊幾千萬年）可能間接令到地球上嘅生物發生變化。

地磁

 

喺愛沙尼亞影到嘅極光；極光係地球磁場嘅間接產物。

 

地磁同太陽風互動嘅模擬圖；地球好似一舊巨型嘅磁石，而佢嘅兩個磁極位於南極同北極。帶電荷嘅太陽風粒子同所有帶電荷嘅嘢一樣，會跟住磁場線行。

地磁（Geomagnetic field）指喺地球內部同埋佢四周圍空間存在嘅一股磁場：如果將地球睇做一個偶極子（Dipole），佢嘅磁矩大細係 7.91 × 10¹⁵ T m³ 左右，地磁軸嘅方向同地軸差唔多重合但係有些少偏離，兩者嘅夾角就係所謂嘅地磁偏角（Magnetic declination）。喺垂直平分地磁軸嘅平面同地球表面相交形成嘅「地磁赤道」圈嗰度，磁感應強度大約係 3 × 10⁻⁵ T，而喺地磁軸同地球表面相交形成嘅地磁極（Geomagnetic pole），磁感應強度大約係地磁赤道嗰度嘅兩倍。

地磁保護咗地表嘅生物：佢喺太空嗰度嘅影響範圍就係之前提咗嘅磁層。太陽內部有啲作用，令到佢會向四周圍射啲帶電荷嘅粒子－包括離子同電子等。呢啲粒子就係所謂嘅太陽風。太陽風嘅壓力會將磁層近太陽嗰面壓到得返 10 個地球半徑，而離太陽遠嗰面會延伸成一條長尾噉嘅形狀。呢啲粒子對於生物嚟講好危險，但係帶電荷嘅嘢會受磁場影響而改變郁嘅方向，而地球嗰個磁場啱啱好令到太陽風改變方向，冇辦法直接噉吹落地表嗰度－所以地磁對於人類等嘅地表生物嘅生存好緊要。

地磁同太陽風嘅互動仲做成咗一啲好得意嘅效果。太陽風以超音速吹落磁層對住太陽嗰面，而太陽風嘅速度亦都因為噉而慢落嚟。佢哋嘅一部分動能（Kinetic energy；指令到啲嘢郁嘅能量）轉換做熱能，令到佢附近嘅區域溫度升高。而喺發生磁暴（Geomagnetic storm）嗰時，喺兩極嘅帶電粒子會沿住磁場線偏轉飄落電離層，並喺嗰度同大氣層嘅原子撞埋一齊，將佢哋激發同離子化（簡單啲講就係兩舊粒子撞埋一齊，並且以光等嘅形式釋放佢哋嘅能量）。呢個過程形成咗極光。

發電機假說

對於地磁係點嚟，學界仲係眾說紛云。根據發電機假說（Dynamo hypothesis），地磁主要嚟自地核入面由鐵同鎳構成嘅導電流體（指好似熔岩呢啲可以流嚟流去物質）嘅郁動：喺地核嘅外核嗰度，好似熔岩呢啲熾熱嘅導電流體由中心向外對流嗰陣，俾地球嘅自轉產生嘅偏向力搞到形成渦流，而有電流改變就會有磁場。呢股渦流產生嘅磁場又會跟手對導電流體嘅郁動產生一啲反作用，令到後者持續。於是導電流體嘅郁動同埋佢產生嘅磁場保持大致上穩定－地球嘅外核好似一座自己曉郁嘅發電機噉。順帶一提，呢種郁動本身係唔係完全穩定嘅。地磁軸嘅方向會慢慢冇規律噉變。地磁逆轉冇話乜嘢固定周期，每 100 萬年可能有成幾次逆轉，最近嗰次據講係發生喺 78 萬年前嘅布容尼斯－松山反轉（Brunhes-Matsuyama reversal）。

 

 

自轉

地球會自轉，而佢嘅自轉形成咗好多自然現象，好似係日頭同夜晚噉。以太陽為定點作基準，一個自轉週期稱為一個太陽日（Solar day），而地球一個太陽日平均係 86400 秒（即係廿四個鐘）。週期嘅時長唔係固定嘅，依家地球嘅太陽日比起 19 世紀嘅略為長啲，每日大約長咗 0 至 2 SI ms 。

要計地球嘅自轉週期，可以唔用太陽作為固定恆星（Fixed stars；指喺夜空中望落彼此之間冇相對運動嘅恆星）做基準。以固定恆星為基準，地球一個自轉週期為之一個恆星日（Sidereal Day），而根據國際地球自轉服務（IERS）嘅計算，1 個恆星日等於太陽時（UT1）86164.098903691 秒，即係 23 個鐘頭 56 分鐘 4.098903691 秒。天文學上通常用平春分點（First Point of Aries）做基準，計算地球嘅恆星日。用呢個計法嘅話，喺 1982 年一個恆星日係平太陽時（UT1）86164.09053083288 秒－ 23 個鐘頭 56 分鐘 4.09053083288 秒。另外，由於春分點會因為歲差等嘅原因而走位，所以呢個恆星日比起真正嘅恆星日短咗大約 8.4 毫秒。

由地球上面睇，空中嘅天體都係以每個鐘頭 15°（即係每分鐘 15' ）嘅角速度向東邊飛（唔包低軌道嘅人造衛星同大氣層入面嘅流星）。近天球赤道嘅天體每兩分鐘郁嘅距離由地表望落相當於喺地表見到嘅月球或者太陽望落嘅直徑。

公轉

地球同其他行星一樣，會圍住佢嗰粒恆星公轉。地球屬太陽系，佢嗰粒恆星就係太陽。佢同太陽之間平均距離大約係 150 × 10⁶ 公里（93,000,000 英里），而公轉嘅平均速度大約係 29.8 km/s（107,000 km/h）。以呢種速度，佢 7 分鐘之內可以飛到 12,742 公里（7,918 mi）－呢個距離等同地球嘅直徑；用大約 3.5 個鐘頭就飛到成 384,000 公里（239,000 mi）－呢個數值等於地球同月球之間嘅距離。圍住太陽兜一個圈大約要 365.2564 個太陽日－即係一個太陽年。

地球同太陽之間嘅距離唔係固定嘅。喺現代，地球嘅近日點（Perihelion；指佢喺公轉軌道上最近太陽嗰點）同遠日點（Aphelion；指佢喺公轉軌道上最遠太陽嗰點）出現嘅時間分別係每年嘅 1 月 3 號同 7 月 4 號左右。因為各種因素嘅影響，呢兩個日期會隨時間唔同，而且呢種變化有周期性－即係所謂嘅米蘭科維奇循環（Milankovitch cycles）。地球同太陽之間嘅距離嘅變化對地表嘅現象有影響：當地球由遠日點行到去近日點嗰陣，佢得到嘅太陽能量會增加 6.9%。而且南半球硬係喺每年接近近日點嗰陣對住太陽。所以喺一年入面，南半球收到嘅太陽能量硬係會多過北半球嘅少少。

轉軸傾角

地球自轉條軸同佢公轉平面並唔係垂直成 90° 角嘅－地球嘅轉軸傾角（Axial tilt）大約係 23.439281°。呢個角度嘅存在令到地球喺圍住太陽公轉嗰陣，太陽嘅直射點會周期性噉變化，而佢嘅周期係一個太陽年。受太陽直射嘅地方會收到更多熱能，所以一年入面會有四季：當北極點比起南極點更加近太陽嗰陣，太陽嘅直射點喺北半球，呢個時候北半球會日長夜短，太陽高度角會大啲，俾太陽直射所以會熱啲－為止夏天；同時，南半球會日短夜長，太陽高度角細啲，唔受太陽直射所以會凍啲－為止冬天。

無論喺南半球定北半球，喺夏半年嗰時都係緯度愈高就愈會日長夜短，喺極圈度可能會有成日都係日頭嘅情形－即係極晝（Midnight sun）。而喺極點附近嗰頭，夏半年嗰六個月都係極晝。而喺冬半年，緯度愈高就愈日短夜長，極圈入面可以有全日都係夜晚嘅情形－即係極夜（Polar night）。極點附近冬半年都一路係極夜。

月球

直徑	3,474.8 km
質量	7.349×1022 kg
半長軸	384,400 km
軌道週期	27 d 7 h 43.7 m

月球

月球（又或者叫「月亮」）係地球唯一一個天然衛星。佢嘅直徑大約係地球嘅 1/4，結構同類地行星好似。喺太陽系嘅衛星入面，月球係衛星－行星體積比最大嘅一粒衛星（查實冥王星同佢嘅衛星冥衛一之間嘅比值更加大，但係冥王星屬於矮行星）。太陽嘅直徑大約係月球嘅 400 倍，但係太陽同地球嘅距離亦都大約係地月距離嘅 400 倍，所以喺地表嗰度月球同太陽望落差唔多大細－兩個天體嘅角直徑（Angular diameter；指一舊圓形或者球狀嘅嘢望落幾大）吻合，令到地球可以觀測到日全食同日環食呢啲現象。

月球對地球嘅環境好有影響：佢同地球之間嘅引力作用令到地球有潮汐嘅現象，而且月球仲會影響到地球氣候嘅調節同埋生物嘅發展。例如古生物學嘅證據同電腦模擬就顯示咗地球嘅轉軸傾角因為同月球嘅潮汐相互作用（Tidal acceleration）先至得以穩定。一啲理論家仲計過條數，話如果冇咗呢股力量對抗太陽同埋其他行星對地球嘅赤道隆起施嗰啲力，地球嘅自轉軸嘅指向將會變到好亂。呢種作用仲會改變地球嘅轉速：地球自轉嘅時間長度又每年大約增加 23 微秒。幾百萬年嚟，呢啲細變化累積做好大嘅變化，例如喺泥盆紀（大約 4.1 億年前）嗰陣，一年有 400 天，而一日得嗰 21.8 個鐘頭。

月球又會俾地球影響返轉頭：月球俾地球潮汐鎖定（Tidal locking）咗，令到月球嘅自轉週期等於佢圍住地球行嘅公轉週期－即係話月球永遠都係以同一面向住地球。月球會俾太陽照射，而佢朝住地球嗰面嘅變化導致月相嘅改變，月球暗嗰部分同光嗰部分有條明暗界線分隔開；地月之間嘅潮汐相互作用亦都令到月球以每年大約 38 毫米嘅距離逐漸噉遠離地球。

其他

 

人造衛星係由人整出嚟圍住地球轉嘅太空飛行器，有通訊同埋科研等嘅功能。根據 2015 年 9 月嘅統計，包括已經失效、現存最古老嘅美國衛星前鋒1號（Vanguard 1），全球總共有 1305 粒人造衛星，仲有 300,000 萬件太空垃圾（例如係廢棄咗嘅人造衛星碎片）圍住地球轉。目前全世界最大嘅人造衛星係國際太空站。

除咗月球同人造衛星之外，地球仲有至少 5 粒共軌小行星（準衛星），其中 4 粒喺地球嘅軌道上圍住太陽運行。嬌小嘅近地小行星 2006 RH120 大約每隔廿年就會靠近地月系統一次。當佢靠近嗰陣會短暫噉走入去圍地球轉嘅軌道。

 

一粒行星嘅「宜居性」（Habitability）指佢有幾適合生物住。地球係宇宙入面好少有嘅一流宜居行星：佢嘅温度同壓力啱啱好，能夠提供液態嘅水－水係一種好緊要嘅溶劑（Solvent），可以俾好多有機嘅分子溶喺入面做化學反應，而有機物質（包括咗碳水化合物、脂肪、同蛋白質）同埋佢哋之間嘅化學反應係生命嘅基本組成要素。除咗噉，地球又啱啱好同太陽有住適當嘅距離，令到佢唔會太熱或者太凍。而且地球仲有大氣圈同埋地磁等嘅系統幫手擋走殞石、太陽紫外線、同埋太陽風呢啲對生物有害嘅嘢，保護到住喺佢上面嘅生物。

生物圈

一粒行星嘅生物圈（Biosphere）指緊喺嗰粒行星上面生活嘅所有生物嘅總體。根據對化石嘅研究，地球嘅生物圈由 35 億年前開始有。生命係點起源學界仲未有定案，但係一般都同意生物會隨時間演變－每個生命個體所持有嘅基因都有啲唔同，佢哋當中有啲比較叻生存同埋繁殖，而生存同繁殖能力勁啲嘅生物會更加能夠將自己帶嘅基因傳俾下一代，相反冇噉叻生存同繁殖嘅生物可能會餓死或者俾獵食者食咗而冇辦法將自己身上嘅基因傳俾下一代，所以每一代嘅生物身上嘅基因都會唔同咗樣（呢個機制就係查理斯•達爾文提出嘅物競天擇），於是乎一個地域入面嘅生物嘅基因會一代一代噉變，經過幾百萬年變變吓就會變到同之前嘅生物完全唔同咗樣－呢個過程就係所謂嘅進化。

進化同對環境嘅適應好有關係，往往最適應到自己周圍環境嘅生物就係最得夠生存同繁殖嘅，所以一個地域嘅生物硬係會慢慢噉演變成啱嗰個地域嘅環境嘅樣－一個生物群系嘅特性會同佢哋嘅環境有關。喺赤道嘅熱帶雨林入面嘅生物物種極之豐富，生物多樣性好高。

 

自然資源

地球蘊藏咗好多種嘅自然資源俾人開採。對於廿世紀嘅人嚟講好緊要嘅一種資源係化石燃料。呢種燃料係由地殼嗰度攞到嘅，包括咗煤、石油、同天然氣等。呢啲化石燃料主要係用嚟做能源同化工生產嘅原料。佢係一種不可再生能源（Non-renewable resource）－佢哋嘅再生速度好慢，所以唔可以靠佢哋好耐。除咗噉，地球嘅生物圈生產好多對人類有益嘅生物製品，包括咗嘢食原材料、木材、藥、同氧氣等，仲可以令到眾多嘅有機廢棄物回收再用。

地球嘅土地係一種好緊要嘅資源。喺 1980 年，全球有 50.53 億公頃（5053 萬平方公里）嘅林地，67.88 億公頃（6788 萬平方公里）嘅草地同牧場，仲有 15.01 億公頃（1501 萬平方公里）攞咗嚟做耕地。據估計，地球上得嗰 1/8 嘅地方喺啱人住嘅。其中地球有成 3/4 嘅表面俾海水覆蓋，得 1/4 係陸地。而喺陸地當中，沙漠（14%）、高山（27%）、同埋其他唔適合人住嘅地形霸咗陸地總面積嘅 1/2。

靠住呢啲資源，人類係噉繁衍。截至 2011 年 10 月 31 號，地球嘅總人口去到成 70 億左右，而且預測顯示世界人口將會喺 2050 年達到 92 億人，其中喺發展中國家人口可能會升得零舍勁。預計喺 2020 年，全世界會有 60% 嘅人口住喺都市。

災禍同污染

 

地球表面間唔鐘就會發生一啲災禍，包括熱帶氣旋同颱風等嘅極端天氣，同埋係板塊移動引起嘅地震同火山活動，或者山火、水災、山崩、雪崩等都會引致好多生物（包括人類）死亡。由 1980 到 2000 年之間，每年平均有 11800 人因為天災掛咗。喺 1900 至 1999 年之間，旱災促成嘅飢荒係造成最多人死嘅災害。

雖然話地球總體嚟講好啱生物生存，但係有人話因為人為嘅污染，呢種情況唔會維持得到好耐：人類嘅活動為好多地區都帶嚟環境問題：水污染、空氣污染、酸雨、有毒物質、植受破壞（包括過度放牧、濫伐、同沙漠化）、野生動物嘅死亡、物種滅絕、土壤退化、侵蝕、同水土流失。

全球暖化喺廿一世紀係一個好多人關注嘅問題。根據聯合國嘅資料，工業活動排放嘅二氧化碳同全球變暖有密切嘅關聯。預測顯示成個地球變暖會令到地球嘅環境有好大變化：冰川同冰蓋會熔、溫度變得極端、氣候轉變、同埋海平面會上升令到好多沿海地區會俾水淹沒等。

 

 

早期嘅地球

根據放射測年法（Radiocarbon dating）嘅測量結果，太陽系大約係喺 45.6 ± 0.08 億年之前成形嘅，原生嘅地球大約喺 45.4 ± 0.04 億年前成形。一般認為，太陽嘅形成喺大約 46 億年前，嗰時一舊好大舊嘅氫分子雲嘅引力坍縮（Gravitational collapse；一舊天體因為自己嘅重力而向內收縮嘅現象），坍縮嘅質量集中喺佢中心嗰度，而呢啲氫分子可以做核聚變（Nuclear fusion；氫原子撞埋一齊變做啲更大粒嘅化學元素）嚟釋放龐大嘅光同熱能－呢團大舊嘅氫就形成咗太陽。淨低嗰啲部份一邊旋轉一邊攤平，形成咗一大團圍住後生嘅太陽轉嘅粒子（即係所謂嘅原行星盤；Protoplanetary disk）。呢團粒子遲吓就會變做行星、衛星、流星體、同其他太陽系嘅小天體－經個 1000 至 2000 萬年嘅演化，最後形成咗原生地球。初頭地球完全唔啱生物住－佢嗰時個表面恐怕係一個由岩漿組成嘅「海」。

月球形成

月球大約喺 45.3 億年前形成。關於月球起源嘅機制而家仲未有乜嘢定論。一個好受歡迎嘅假說係大碰撞說（Giant impact hypothesis）：呢個諗法認為有一粒好似火星噉大，質量係地球 1/10 嘅天體撞落地球度。呢吓碰撞引發咗大爆炸，炸到地球入面好多物質飛咗上太空，經過吸積作用形成咗月球，而嗰粒天體嘅部份物質亦都熔咗入地球度。而喺打後嘅 41 億至 38 億年前嘅嗰段時間，無數嘅小行星撞落月球嘅表面，令到月球嘅表面變得好犀利，而且當時嘅地球似乎都係成日俾小行星撞。

地球冷卻凝固

由太古宙（Archean；指 40 億年前至 25 億年前嘅時代）嗰陣開始，地球嘅表面開始冷卻凝固，形成咗硬淨嘅岩石，而火山爆發會釋放出一啲氣體，形成咗一個原始嘅大氣圈。呢個大氣圈會有水蒸氣、二氧化碳、同氮組成，水汽嘅蒸發令到地表冷卻得更加快。冷卻到噉上下，暴雨連續落咗成千上萬年，呢啲雨水灌滿咗盆地，形成咗個海。呢場大暴雨減少咗空氣入面嘅水汽含量，仲洗走咗大氣入面好多二氧化碳。除咗噉，小行星、原行星、彗星上面嘅水同冰亦都帶咗啲水嚟地球。當時嘅太陽似乎弱過而家，但係當時大氣入面嘅温室氣體令到地球保持到一定嘅温度，個新形成嘅海應該唔會結嗮冰。

跟住落嚟，地球嘅其餘物理同化學性質開始漸漸噉成形。大約喺 35 億年前，地球有咗佢股磁場，佢幫到手令到太陽風唔會正面吹襲地球嘅大氣，令到大氣層嘅粒子冇噉容易俾太陽風吹到離開地球。地球嘅外層冷卻凝固，喺大氣層水汽嘅作用之下形成地殼。至於陸地係點嚟，科學界有兩個模型解釋：一種認為陸地到咗家吓仲係增長緊；而另一種更加可能嘅模型認為地球歷史早期嘅陸地迅速噉生成，然後保持到而家。

嗰陣時，地球內部嘅熱量係噉散走，驅動板塊構造運動，形成大陸，經過幾億年，超大陸（Supercontinent）經歷三次嘅分分合合－啲大陸板塊黐埋又分開，最近嘅盤古大陸（Pangaea）喺大約 1.8 億年前分裂。到咗今日，呢種地殼活動仲喺度進行緊。

 

生命嘅起源同進化

地球係目前宇宙已知行星入面唯一能夠維持生命嘅。一般認為大約 40 億年前嘅高能化學反應產生咗能夠複製自己嘅分子，打後 5 億年就出現咗所有生命嘅共同祖先，再分化咗細菌同古菌出嚟。早期嘅生命體發展出搞光合作用嘅能力，於是有得直接利用太陽能向大氣嗰度釋放啲氧氣。大氣度積累嘅氧氣俾太陽射嘅紫外線作用，喺上層大氣形成咗臭氧（O₃），出現咗臭氧層。早期嘅生命以原核生物（Prokaryote；以單一原核細胞組成嘅生物）嘅形態存在。由於臭氧層吸收咗太陽射落嚟嘅紫外線，陸地變到好啱生命生存，所以生命開始喺陸地上面繁衍。目前已知最早嘅生命化石證據有西澳洲砂岩入面揾到嘅 34.8 億年前嘅微生物墊化石、西格陵蘭變質碎屑岩度 37 億年前嘅生源石墨、仲有西澳洲岩石度 41 億年前嘅生物質殘骸。

距離而家大約 5.42 億年前發生咗寒武紀生命大爆發（Cambrian explosion）。由化石睇，嗰時地球上嘅多細胞生物種類突然之間多咗好多，包括節肢動物（Arthropods）三葉蟲、奇蝦等。化石記錄顯示大多數嘅動物門都係喺呢個時期出現嘅。呢個時期持續咗大約 2 千萬年至 2 千 5 百萬年，導致咗大多數現代動物門嘅發散。複雜啲嘅生物多咗好多，生物多樣性大幅噉提高，所以佢俾人話係生命嘅大爆發。

喺後少少嘅 5 億年前嘅奧陶紀（Ordovician）地球有咗脊椎動物（Vertebrates）－甲冑魚（Ostracoderms）。打後嘅化石記錄顯示地球又有咗幾次生物物種嘅大規模增加或者滅絕，最近嗰次係 6 千 6 百萬年前嘅白堊紀－第三紀滅絕事件（Cretaceous–Paleogene extinction event），呢次事件引致咗恐龍嘅滅絕，但係一啲細隻嘅動物－當中有哺乳類－走得甩死唔去，令到地球嘅生命持續落去。嗰次之後，哺乳類開始變到愈嚟愈發達，而幾百萬年前嘅非洲嘅類猿（Ape）動物似乎開始用兩隻腳行，空咗對手出嚟令到佢哋可以整工具，個腦又變到愈嚟愈大－慢慢進化成智人（Homo sapien）。智人嘅各種活動產生咗世界嘅各大文明同科技。

 

地球嘅未來

對於地球嘅最終命運會係點，好多科學家都嘗試咗做一啲預測。佢哋諗咗各式各樣嘅世界末日出嚟－但係呢啲末日起碼都要成幾億年先至會實現。

喺 15 至 45 億年之後，地球嘅轉軸傾角可能會變成 90 度噉多。據推測，地球表面嘅複雜生命發展仲算係早期，活動有得繼續去到極盛，維持大約 5 到 10 億年，不過如果大氣入面嘅氮氣冇嗮，呢個時間將會延長到成 23 億年。地球喺遙遠未來嘅命運同太陽嘅變化緊密相連，隨住太陽核心嘅氫持續噉核聚變做氦（Helium），太陽嘅光度將會持續噉增加，喺 35 億年後會增加到廿一世紀嘅 40% 。而太陽釋放熱量嘅速度都會跟住增長。根據氣候模型，地表最後將會受到太陽輻射上升產生嘅後果－例如係個海最後會因為熱得滯汽化消失。

 

地球表面溫度上升又會加快無機碳循環（Carbon cycle），會降低大氣入面嘅二氧化碳含量。科學家計過條數，大約 5 至 9 億年之後，大氣入面嘅二氧化碳含量會低到得 10ppm，如果冇進化出新嘅方法，乜嘢植物都生存唔到。植物消失會令到地球嘅大氣含氧量跌，而要吸氧氣生存嘅動物（包括人類）會喺幾百萬年之內滅絕。跟住嗰幾十億年，地球會變到愈嚟愈熱，地表水開始消失，而且就算太陽唔變，洋中脊噴嘅蒸氣會開始少咗，海水會慢慢噉跌落地幔度，海水少咗會令到氣温變得極端，不利生物生存。

50 億年之後，太陽同好多恆星一樣，會變做一粒紅巨星（Red giant），地表呢個時候已經形成唔到生物生存必需嘅複雜分子。個模型預測太陽將會膨脹，直徑會變成而家嘅 250 倍，亦即係大約 1 AU（150,000,000 公里）。地球跟住落嚟嘅命運係點好難講：變做紅巨星嗰陣，太陽會冇咗 30% 嘅質量，所以如果唔考慮潮汐嘅影響，當太陽體積最大嗰陣，地球會郁到去大約距離太陽 1.7 AU（250,000,000 公里）噉遠，噉會擺脫俾膨脹嘅太陽吞噬嘅命運；但係就算係噉，太陽嘅亮度峰值將會係而家嘅 5,000 倍，地球上淨低嘅生物都走唔甩，會俾極之猛烈嘅陽光摧毀。

學術

為咗了解自己住緊嗰個星球，科學界有好多領域專係研究地球嘅各方面。地圖學（Cartography）同地理學（Geography）係同地球環境好有關係嘅學科，前者著眼喺研究同實踐整地圖，而後者研究地球上面嘅大陸、構造、居民、同埋其他相關現象。自古以嚟，地圖學同地理學一路幫手描述地球嘅各方面。佢哋亦都刺激咗測量方面嘅發展－地圖學同地理學成日都要搞導航、仲有確定位置同方向，佢哋要發展都需要測量上嘅進步。地球科學（Earth science）泛指研究地球嘅物理同化學性質嘅一門科學領域，包括咗好似係地質學等嘅多個子領域。靠住佢哋，人類對自己住緊嗰粒行星嘅環境了解得愈嚟愈深。

政治

地球上面有好多政治活動。除咗南極洲嘅一啲地區同埋沿着多瑙河西岸嘅一啲土地呢啲之外，地球嘅陸地表面冚唪唥都係俾某啲主權國家（Sovereign state）擁有嘅。截至 2015 年，成個地球總共有 193 個主權國家係聯合國會員國，除咗噉仲有兩個觀察員國，同埋 72 個屬地（例如係香港）同埋有限承認國家。講土地面積嘅話，世界上最大嘅國家係俄羅斯，而人口最大國家係中國同印度。

除咗呢啲國家之外，聯合國（United Nations）係一個以「介入國家之間嘅糾紛從而避免武裝衝突」做目標成立嘅全球性國際組織，亦都係一個為國際法同國際外交設立嘅重要平台。如果攞到成員國嘅共識，聯合國甚至有得武裝干預一啲國際事務。

人類對地球嘅認知

 

 

地球嘅標準天文符號係俾圓形包圍嘅十字「🜨」－代表想像中嘅世界嘅四個角落頭。 地球喺人類嘅文化入面嘅形象好多變。有啲文化會將地球人化，甚至乎當佢係神噉拜－喺好多文化入面，地球係管生仔等功能嘅地母神，好似係頭先提咗嘅古羅馬同古希臘嘅人就係噉。喺多個宗教嘅創世神話就認為地球係由超自然嘅上帝所創造－雖然有關上帝點創造地球就個個宗教都唔同，而同一個宗教內部又會對自己嘅經文有唔同嘅理解。

隨住科學嘅進步，人類對地球嘅睇法係噉變。初頭嗰陣，東西方嘅古人信地平說（Flat Earth）－認為地球係平嘅，人有得喺邊界嗰度跌落去。到咗公元前 6 世紀，古希臘學者畢達哥拉斯（Pythagoras）提出咗地圓說，主張地球係個波，而且喺西方學界仲得到廣泛嘅認同。古人又曾經認為地球係宇宙嘅中心，但係後嚟嘅學者又有咗新嘅發現，改為認同地球同太陽系嘅其他星體一樣都係圍住恆星轉嘅行星。到咗 19 世紀，西人一般都認同地球唔只得嗰幾千歲，而且嗰時嘅地質學家對於地殼同化石嘅研究發現地球嘅年齡應該超過幾百萬歲。英國數學物理學家 William Thomson 喺 1864 年用熱力學嘅方法推斷地球年齡應該喺 2000 萬歲至 4 億歲之間，呢個結論引發咗激烈嘅辯論。打後到咗廿世紀初，科學家用放射測年法測算出地球誕生時間係幾廿億年前。而廿世紀嗰陣，美國開始執行阿波羅計劃，人類第一次喺軌域上睇到地球個樣，仲影咗啲相返嚟，完完全全噉確立咗地圓說之餘，人類對地球嘅睇法又變咗。

蓋亞假說

蓋亞假說（Gaia hypothesis）喺廿世紀中期嗰陣誕生咗，呢個觀點將地球比喻成一個識得自我調節嘅生命體，有能力令到自己總體嚟講穩定又啱生物住。呢個諗法仲令到好多人唔再只係當地球係一舊資源。

宗教觀點

到咗廿一世紀，某啲神職人員仲係好堅持對聖經等嘅經文要字面解，認為上帝喺幾千年前創造地球，但係有好多神學家都認為經文唔應該純字面解，例如係美國嘅基督徒組織 American Scientific Affiliation （個名直譯係「美國科學聯系」）就提出咗進化創造（Evolutionary Creation）嘅觀點，認為上帝喺創造嗰陣係聰明噉設下一啲自然定律，再俾呢啲自然定律自己行並且最後創造出地球同生命，亦都有好多基督徒認為好似《創世紀》呢啲舊約聖經入面嘅內容應該當做先知受到上帝啟發而寫出嚟嘅寓言型故仔，唔應該當係歷史噉嚟解讀。

搵更多有關 地球 喺維基媒體兄弟計劃嘅嘢
	維基辭典嘅字詞解釋
	維基同享嘅媒體
	維基新聞嘅新聞故事
	維基語錄嘅名言
	維基文庫嘅原始文獻
	維基書本嘅教科書
	維基學府嘅學習資源

 

維基同享有多媒體嘅嘢：

地球（類）

 

• 天球
• 地球同步軌道

地球科學

• 地球科學
  • 氣候學
  • 氣象學
  • 地質學
  • 海洋學
• 科學

相關天體

• 月球
• 八大行星
• 太陽
• 太陽系

• Comins, N. F. (2001). Discovering the Essential Universe (第2版). New York: W. H. Freeman. ISBN 0-7167-5804-0. OCLC 52082611.

• 國家地理頻道嘅百科條目「地球」（英文）
• 氣候變遷對地球形狀嘅影響 – NASA
• 美國地質調查局
• 地球觀測站
• 國際太空站嘅片：
  • 片 (01:02) – 地球（縮時攝影）
  • 片 (00:27) – 地球同極光（縮時攝影）