海

海覆蓋住地球大約 71% 嘅面積，而且深度不一：近陸地（地球表面冇俾水覆蓋嘅地方）嘅海好多時都好淺水，得嗰幾米深，但離陸地遠啲嘅海就可以深得好交關，例如位於太平洋西部嘅馬里亞納海溝（Mariana Trench）噉，馬里亞納海溝某啲地方據探測有成超過 10 公里咁深－相比之下，廣州周大福金融中心大約係 530 米咁高，即係話兩棟周大福金融中心疊埋一齊就大約係 1 公里多少少，而馬里亞納海溝嘅最高深度係呢個數值嘅大約 10 倍左右。

海同海邊嘅環境特性往往都會對生物嘅生存同進化造成具體嘅影響。舉個例說明，海洋生物嘅一個出名特點係少兩棲類（學名：Amphibia）－兩棲類嘅例子有青蛙，呢個綱嘅動物其中一個特性係啲皮膚有高嘅滲透性，容易俾水或者鹽等嘅物質通過，而通常係鹽會由鹽多嗰邊擴散過去鹽少嗰邊；噉即係話一旦隻兩棲類浸入鹹水，身體（鹽少嗰邊）就會勁俾海水（鹽多嗰邊）嘅鹽入侵；跟住呢樣嘢就會造成隻兩棲類動物體內鹽嘅濃度高得滯，並且搞到佢哋體內嘅化學過程失衡，最後引致死亡。因為噉，絕大多數嘅兩棲類都頂唔順鹹水，而自自然然海洋生物學啲研究對象基本上係冇兩棲類咁滯。由呢個例子可見，海洋嘅環境會對生物造成某啲獨特－第啲環境唔會有－嘅挑戰。