企鵝(粵拼:kei5 ngo4*2,學名:Spheniscidae)係一種唔識飛嘅雀,屬於企鵝目,企鵝科。
企鵝 | ||||||||||
---|---|---|---|---|---|---|---|---|---|---|
黃眼企鵝 Megadyptes antipodes | ||||||||||
物種分類 | ||||||||||
| ||||||||||
王企鵝屬 Aptenodytes |
企鵝主要係喺南半球生活,依家知道全世界有十七、八種企鵝,多數分佈喺南極地區,而其中環企鵝屬嘅漢波德企鵝、麥哲倫企鵝同黑腳企鵝都分佈喺較低緯度嘅溫帶地方,至於加拉帕戈斯企鵝,就分佈更加接近赤道;而完全喺極地生活嘅企鵝得皇帝企鵝同阿德利企鵝兩種。
企鵝可以話係地球上最唔怕凍嘅雀。佢哋全身鋪滿羽毛,而且皮下脂肪有兩三公分咁厚,呢種特殊嘅生理構造,令到佢咃喺-60℃嘅冰天雪地中,都能夠自由自在咁生活。
曾經分佈喺北極地區、依家絕嗮種嘅大海雀,可能同企鵝一樣咁頂得凍。兩種外表都好似,曾經俾人以為有親緣關係,令到喺發現企鵝嗰陣時,歐洲人幫企鵝改到個名好似大海雀咁。
企鵝同其他雀仔有好多共同特徵:身上有羽毛、重有又尖又硬又突出嘅喙、同埋有爪同鱗嘅雙腳。但係同其他鳥類好唔同,佢哋對翼唔發達,令佢哋唔識飛,亦都唔似其他走禽(例如雞、鴕鳥)咁,因為身體又肥又唔擅長跑。但係企鵝趾間有蹼,對翼都演化到好似槳咁樣。噉嘅身體構造,令佢成為擅長游水嘅動物。
喺陸地上企鵝都係企喺度嘅,佢大部分時間好似人咁用腳來行,但係由於身型肥,佢哋行路都行得好遴迍吓。喺冰天雪地下,如果被捕獵者追嘅話,佢哋會全身傾前伏低喺地下,個肚貼住冰面,好似撑船噉,用腳撑來快速逃走。
佢哋通常住喺赤道以南,喺人跡罕至嘅地方先至見到佢哋。有啲企鵝住喺好凍嘅地方,有啲就住喺熱帶地方。但其實企鵝唔鍾意熱天氣,只有喺凍嘅地方,佢哋先會快活。所以,喺遙遠嘅南極洲沿岸,住得最多企鵝。
佢哋睇落唔似雀,佢哋隻翼變成鰭狀,身體好似流線型,能夠輕快咁喺水入面游來游去。企鵝身上冚住一層厚厚嘅防水羽毛。喺呢層羽毛下面有一層比較柔軟嘅絨羽可以保暖。重有,佢哋層皮下面有層脂肪,可以防止體溫散失。
所有嘅企鵝身上都有類似嘅黑白花紋,呢啲花紋令到佢哋求偶嗰陣顯得更加醒目。
佢哋多數喺海面搵食,必要時,佢哋都可以潛落水底搵。皇帝企鵝係潛得最深嘅企鵝。佢哋能夠潛到落二百五十公尺深度搵食,留喺水底停留廿分鐘。佢哋個胃好大,可以離家去好遠嘅地方食飽飽先,然後再遊返去慢慢餵企鵝仔。
喺海度,企鵝非常醒目,重可以潛入水底565米深、廿二分鐘咁耐,亦都可以游出岸邊6到12公里遠,去捉小魚、磷蝦等等嘅嘢來食。
企鵝目 Sphenisciformes
This article uses material from the Wikipedia 粵語 article 企鵝, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.