文明

英文中嘅文明（Civilization）一詞源於拉丁文「Civis」，意思係城市嘅居民，佢本質含義係人民和睦嘅生活喺城市同社會集團中嘅能力。引申後意為一種先進嘅社會同文化發展狀態，以及到達呢個狀態嘅過程，佢涉及嘅領域廣泛，包括民族意識、技術水準、禮儀規範、宗教思想、風俗習慣以及科學知識嘅發展等等。

城市出現、文字產生、國家制度、青銅技術出現、可以話係一個地方出現一個成熟文明嘅標誌。而家一般認為，最早嘅文明大概係西元前 3500 年左右係喺美索不達米亞嘅蘇美爾人^{[未記出處或冇根據]}（註：美索不達米亞象形文字大約喺公元前 3200 年出現）。

但由於一個人類文明，由一個雛形進而成為成熟係要經過長時間演變，所以學界無法統一每個文明最初嘅誕生時間。就如大英博物館認為冇文字、城市、國家嘅公元前 3500年印度一處所誕生嘅文明做 Indus Valley Civilization，但另一方面一啲學者認為有成熟嘅城市、國家制度、文字嘅公元前 1500年嘅中國商文明先至係最早嘅文明。

古代文明

西元前3500年到西元前1000年呢段時期，就叫做古代文明時期。

古代文明基本都係喺河流同流域發源，唔同嘅時期往往俾唔同嘅文明佔據，以地域環境大致分為：

• 兩河文明：發源於亞洲底格里斯河（Tigris）同幼發拉底河（Euphrates）河流域，又稱美索不達米亞（Mesopotamia）文明。兩河文明亦係有史可考嘅最古老文明，形成期可以追溯到西元前4000年，大概西元前3500年正式形成。當時生活嚮兩河流域嘅係蘇美爾人，建立咗蘇美爾文明。之後陸續有閃米特人、赫梯人、亞述人、波斯人、馬其頓人、羅馬人、阿拉伯人同突厥人相繼入侵。兩河流域繼蘇美爾人之後最偉大嘅文明就係由閃米特人漢穆拉比建立嘅巴比倫。
• 尼羅河文明：發源於非洲尼羅河（Nile）流域，又稱古埃及文明，佢嘅歷史可追溯到西元前4000年。西元前3100年左右，上埃及國王美尼斯統一上下埃及，開始咗史稱嘅埃及王朝時期，亦代表古埃及文明正式開始。
• 印度河文明：發源於亞洲印度河同恒河（Ganges）流域。文明嘅開始可追溯到西元前3000年，最終喺西元前2500年左右形成。
• 愛琴文明：發源於希臘愛琴海地區，西元前2000年左右形成。米諾斯文明發源於歐洲地中海嘅克里特島（Crete），又稱克里特文明，後被麥錫尼文明所取代。
• 商文明：發源於亞洲黃河流域嘅商文明喺西元前1600年左右形成。更早（但缺乏考古證據）嘅夏文明據推測喺西元前2000年左右形成。
• 奧爾梅克文明：發源於中美洲，西元前1200年左右形成。

古典時期嘅文明

西元前1000年到西元500年呢段時期，好多文明進入繁盛時期，通常亦被稱為古典時期。

• 古希臘文明嚮大概西元前500年到西元前300年間達到鼎盛，創造咗燦爛嘅古希臘文化。隨住亞歷山大大帝嘅征服，古典希臘文化被傳到整個地中海地區同中東地區。
• 古羅馬文明嚮西元前300年到西元200年間達到輝煌，建立咗幅員遼闊嘅帝國。
• 印度文明最繁盛嘅時期係西元前三世紀前後嘅孔雀王朝同西元四世紀前後嘅笈多王朝。
• 瑪雅文明嘅輝煌時期嚮大概西元前200年到西元900年間。
• 華夏文明嚮大概西元前700年到西元前200年間（春秋戰國時代）創造咗輝煌嘅文化。嚮大約西元前200年到西元200年嘅漢王朝時期，帝國達到鼎盛。

失落嘅文明

科學界普遍認為呢啲只係傳說中嘅文明，但依然有好多人信。

• 姆大陸文明
• 亞特蘭蒂斯大陸文明

文明係點樣出現嘅？呢個對哲學家同人類學家都係好吸引嘅課題，因此亦有好多理論來闡述各自嘅觀點。大部分觀點比較一致嘅睇法係中央集權嘅出現係文明存在嘅起點。因此研究中央集權嘅出現就成為一個焦點。但係所有嘅理論都重未解釋到所有文明嘅起源，佢只係適用於部分文明。

• 灌溉系統（或者叫水利系統）：卡爾•威特福格爾係呢個理論嘅最有力支持者。呢種理論認為新石器時代嘅農民認識到洪澇災害雖然會毀壞莊稼，但亦可以提供更加肥沃嘅土壤，因此開始修建水壩，然後用來灌溉農田。隨住規模不斷擴大，就開始出現專門負責管理灌溉系統嘅人。通過呢種灌溉系統嘅集中管理，逐漸發展出最初嘅統治階層，文明由此產生。但係反對意見認為，當時一啲興盛嘅城市，灌溉規模好細；如果由國家管理灌溉，考古發掘嘅資料應該會更多，而實際情況相反。而且文獻中記載，當時嘅灌溉系統係由神廟管理，而唔係政府機構。亦有觀點指，灌溉工程係文明發展嘅結果，而唔係起因。

• 貿易網絡：呢種理論認為貿易嚮文明嘅發展中起決定作用。嚮生態多樣化嘅地區，要獲得稀少嘅資源，就需要貿易機構來組織貿易，咁就需要某種中央集權嘅形式。但呢種理論對於某啲文明係正確嘅，對另外一啲文明就唔係。

• 環境同社會限制：呢個理論由羅伯特•卡內羅提出。佢認為由於地理環境嘅影響，例如山脈、海洋對人類嘅阻隔，至產生咗文明。由於人口增長而冇擴張嘅餘地，從而開始爭奪稀少嘅資源。咁就導致內部出現階級，其中由統治者控制稀少嘅資源。對於外部就有擴張需要，呢啲都需要有一個中央集權嘅政府來嚴密組織。

• 宗教信仰：這種理論認為宗教信仰對文明嘅形成起至關重要嘅作用。

文明嘅發展促進咗人類社會嘅進步，但同時亦帶來好多問題。比如衞生問題。重有傳染病嘅問題。此外不同文明間嘅衝突以及文明內部嘅鬥爭令戰爭成為一個好普遍嘅問題。嚮文明內部重有一個階級之間嘅衝突問題。

• 中國
• 印度
• 巴比倫
• 埃及

 

維基辭典有呢個詞嘅解釋：
文明

• 四大文明古國
• 智能