Mislingar

Mislingar eru einn sá smitslægasti veirusjúkdómur sem til er, en veiran sem veldur sjúkdómnum nefnist morbilli. Bandaríski örverufræðingurinn Maurice Ralph Hilleman (1919 -2005) þróaði bóluefni gegn mislingum. Bólusetningar hófust í Bandaríkjunum 1963.

Mislingar hafa gengið undir ýmsum nöfnum á Íslandi, svo sem: dílasótt, flekkusótt, krefðusótt, meislingasótt (og mislingasótt) og mislitasótt.

Sumarið 1846 gengu mislingar á Íslandi. Sóttin barst út hingað með dönsku skipi til Hafnarfjarðar í lok maímánaðar og breiddist þaðan út um allt Suðurland. Þaðan barst hún, einkum með skólapiltum, bæði norður og vestur og hlífði engum manni. Af mislingum og afleiðingum þeirra munu hafa u.þ.b. 2000 manns látist á öllu landinu. Í Reykjavík gerði sóttin allmikinn usla og mátti svo heita, að þar sæist varla nokkur maður á ferli suma dagana meðan sóttin geisaði. Annar afar slæmur mislingafaraldur geisaði hér á landi árið 1882. Bólusetningar hófust á Íslandi 1976.

• Hvað eru mislingar?; af Vísindavefnum Geymt 24 febrúar 2007 í Wayback Machine