Salamo Faha-102

Tafiditra ao amin' ny fizaràna atao hoe "boky fahefetra" (Sal. 90 -106) ity salamo ity. Ny Salamo faha-101 no eo alohany ary ny faha-103 no manaraka azy.

Dikan-teny katôlika

¹Vavaky ny ory, mivesa-pahoriana, sy mandoatra ny fitarainany eo anatrehan'ny Tompo.

      ²Iaveh, henoy ny fivavahako,

      ³ary aoka ho tonga hatrany aminao ny fitarainako.

Aza manafina ny tavanao amin'ny andron'ny fahoriako,

atongilano aty amiko ny sofinao,

faingàna hamaly ahy, nony mitaraina aho.

      ⁴Fa levona toy ny lasan-ko setroka ny androko,

ary mirehitra, toy ny doran'ny afo, ny taolako.

      ⁵Voajinja toy ny ahitra ny foko, ka malazo;

hadinoko aza ny mihinan-kanina.

      ⁶Tafaraikitra amin'ny taolako ny nofoko,

azon'ny mitaraina sy misento.

      ⁷Tahaka ny pelikano any an'efitra aho,

ary zary toa vorondolo tokana an-tanàna haolo.

      ⁸Tsy mahita tory aho mandritra ny alina,

toa vorona manirery eny an-tafon-trano.

      ⁹Tsiratsirain'ny rafilahiko tontolo andro aho,

ary ny fahavaloko entim-pisafoahany mianiana ny hamono ahy.

      ¹⁰Mihinan-davenona ho tahaka ny mofo aho,

ary haroako ranomaso ny zavatra sotroiko;

      ¹¹noho ny hatezeranao amam-pahaviniranao,

fa naingainao aho, ary natsipinao lavitra.

      ¹²Tahaka ny aloka efa mandroso mihalava ny androko,

ary mihamalazo toy ny ahitra aho.

      ¹³Fa hianao kosa, ry Iaveh, dia mipetraka eo amin'ny seza fiandrianana mandrakizay,

ary velona amin'ny taona rehetra mifandimby ny fahatsiarovanao.

      ¹⁴Hitsangana hianao, hamindra fo amin'i Siona,

fa ny andro hamindram-po aminy,

ny fotoana voatendry dia efa tonga.

      ¹⁵Satria lalain'ny mpanomponao ny vatony,

nampangoraka ny fony hatramin'ny vovo-taniny.

      ¹⁶Amin'izay dia hanaja ny anaran'ny Tompo ny firenena,

ary hanaja ny fiandriananao ny mpanjaka rehetra amin'ny tany.

      ¹⁷Fa Iaveh nanangana an'i Siona indray,

niseho tamin'ny voninahiny izy;

      ¹⁸nihaino ny vavaky ny fadiranovana,

tsy nanamavo ny fitarainany.

      ¹⁹Aoka hatao an-tsoratra izany, ho an'ny taranaka ho avy;

ary aoka hankalazain'ny firenena vao hiforona Iaveh.

      ²⁰Satria nitsinjo teny amin'ny havoany masina izy,

satria nitsinjo ny tany teny an-danitra Iaveh;

      ²¹mba hihaino ny fitarainan'ireo voababo,

mba hanafaka an'ireo efa voatendry hovonoina ho faty,

      ²²mba hitorian'ireo ny anaran'ny Tompo ao Siona,

sy ny fiderana azy ao Jerosalema;

      ²³raha avy izay hiangonan'ny firenena rehetra,

mbamin'ny fanjakana, hanompo an'ny Tompo.

      ²⁴Efa nanaketraka ny heriko teny an-dàlana izy,

efa nanafohy ny androko izy.

      ²⁵Hoy aho: Ry Andriamanitro, aza alainao aho eo an-tenantenan'ny androko,

hianao izay aharetan'ny taonanao, amin'ny taona mifandimby.

      ²⁶Nanorina ny tany tamin'ny voalohany hianao,

ary asan'ny tànanao ny lanitra.

      ²⁷Ho levona ireo, fa hianao kosa maharitra,

hihatonta toy ny fitafiana ireo; hanova azy toy ny lamba hianao, ka ho voaova izy.

      ²⁸Fa hianao kosa maharitra tsy miova,

ary tsy manam-pahataperana ny taonanao.

      ²⁹Ny zanaky ny mpanomponao honina amin'ny taniny,

ary haharitra eo anatrehanao ny taranany.

• Boky voalohany: Sal. 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13 - 14 - 15 - 16 - 17 - 18 - 19 - 20 - 21 - 22 - 23 - 24 - 25 - 26 - 27 - 28 - 29 - 30 - 31 - 32 - 33 - 34 - 35 - 36 - 37 - 38 - 39 - 40 - 41.

• Boky faharoa: Sal. 42 - 43 - 44 - 45 - 46 - 47 - 48 - 49 - 50 - 51 - 52 - 53 - 54 - 55 - 56 - 57 - 58 - 59 - 60 - 61 - 62 - 63 - 64 - 65 - 66 - 67 - 68 - 69 - 70 - 71 - 72.
• Boky fahatelo: Sal. 73 - 74 - 75 - 76 - 77 - 78 - 79 - 80 - 81 - 82 - 83 - 84 - 85 - 86 - 87 - 89.
• Boky fahefatra: Sal. 90 - 91 - 92 - 93 - 94 - 95 - 96 - 97 - 98 - 99 - 100 - 101 - 102 - 103 - 104 - 105 - 106.
• Boky fahadimy: Sal. 107 108 - 109 - 110 - 111 - 112 - 113 - 114 - 115 - 116 - 117 - 118 - 119 - 120 - 121 - 122 - 123 - 124 - 125 - 126 - 127 - 128 - 129 - 130 - 131 - 132 - 133 - 134 - 135 - 136 - 137 - 138 - 139 - 140 - 141 - 142 - 143 - 144 - 145 - 146 - 149 - 150.

• Salamo apôkrifa: Salamo faha-151 - Salamo faha-152 hatramin' ny faha-155.