Alarobia
Ny Alarobia dia andro fahatelo ao amin' ny herinandro raha ny Alatsinainy no andro voalohany, fa andro fahefatra kosa raha ny Alahady no andro voalohany.
Amin' ny Malagasy mandala ny fomban-drazana dia andro fahafito izy raha manomboka amin' ny Alakamisy ny herinandro.
Fiforonan-teny
Ny teny malagasy hoe Alarobia na Larobia dia avy amin'ny teny arabo hoe الأربعاء / al-’arbi‘ā’ izay midika hoe "ny fahefatra".
Ny andro Alarobia eo amin' ny kolontsaina malagasy
Laharan' ny andro Alarobia
Andro fahafito ao amin' ny herinandro ny Alarobia teo amin' ny Ntaolo malagasy nanao ny Alakamisy ho andro voalohany.
Finoana momba ny andro Alarobia
Andro ratsy ny Alarobia satria tsy miverina. Andro natokana amin' ny fanaovana famoizana, fandevenana, fanaovana afana, famadihan-drazana, fitomaniana ny maty, famangia-manjò, ary fialan-tsaona.
Tsy azo atao ny miainga handeha lavitra na manao zavatra tiana hanan-danja lehibe amin' ny andro Alarobia fa tsy ho tafody an-tanindrazana fa ho faty any, nefa ny fanaovana izany amin' ny andro Alarobia mifoha Alakamisy (harivan' ny Alarobia), toy ny Asabotsy mifoha Alahady, dia mety tsara. "Alarobia tsy miverina" no nilazan' ny Ntaolo malagasy ny Alarobia. Tsy mety ny manao hasoavan-jaza amin' ny andro Alarobia. Andro tsara hakana vohitra na hanaovaa kabary ny Alarobia. Ny lahim-bahona (tamba-bonin' ny vahona) no faditry ny Alarobia.
Jereo koa
Loharano sy fanamarihana
This article uses material from the Wikipedia Malagasy article Alarobia, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Mitondra ny lisansa CC BY-SA 4.0 ny votoatiny raha tsy misy zava-kafa ambara. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Malagasy (DUHOCTRUNGQUOC.VN) is an independent company and has no affiliation with Wiki Foundation.