Die Koninkryk van Denemarke het slegs een amptelike taal, Deens, die amptelike nasionale taal van die Deense volk, maar daar is ook ’n paar minderheidstale wat in hierdie gebied gepraat word.
Hulle is Duits, Faroëes en Groenlands.
Die oorgrote meerderheid Dene praat Engels as tweede taal (86%); dit is 'n verpligte vak wat Deense studente moet neem vanaf Graad 4 in die Folkeskole. In Graad 7 kan 'n derde taal geneem word, gewoonlik Duits of Frans. Die meerderheid kies Duits.
Duits is ’n amptelike minderheidstaal in die Graafskap Suid-Jutland (Suid-Denemarke) wat voor die Vredesverdrag van Versailles aan Duitsland behoort het. Tussen 15 000 en 20 000 etniese Duitsers bly in Suid-Jutland waarvan sowat 8 000 óf die Standaardduits óf die Sleeswykse variant van Platduits of Nedersaksies in hul daaglikse omgang besig.
Sleeswyks verskil baie van Standaardduits en kan nogal moeilik verstaanbaar wees vir ’n Duitser wat Hoogduits besig. Buitekant Suid-Jutland gebruik lede van die St. Pieterskerk in Kopenhagen Duits as hul godsdienstaal, op hul webwerf en die skool wat die kerk bedryf.
Faroëes is ’n Noord-Germaanse taal, soos Deens, wat as die hooftaal op die Faroëreilande, ’n selfregerende gebied binne die koninkryk, gepraat word. Dit word ook deur die Faroërs gepraat wat bly in Denemarke. Faroëes lyk baie op Yslands en ook na die Oudnoorse taal wat in die Skandinawiese gebied meer as ’n millennium tevore gepraat is.
Groenlands is die hooftaal van die 54 000 Inuit wat woonagtig is in Groenland wat, net soos die Faroëreilande, ’n selfregerende gebied binne Denemarke is. Sowat 7 000 mense praat Groenlands op die Deense vasteland.
Wiki Commons bevat media in verband met Tale van Denemarke. |
This article uses material from the Wikipedia Afrikaans article Tale van Denemarke, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.