Geert Wilders

Sedert 1998 is hy 'n lid van die Tweede Kamer van die State-Generaal, tot 2004 vir die regs-liberale Volksparty vir Vryheid en Demokrasie (VVD) en tot 2006 vir die Groep Wilders, die voorloper van die PVV.

Geert Wilders
Wilders in 2014
Parlementêre leier van die PVV in die Tweede Kamer
Ampsbekleër
Termynaanvang 23 November 2006
Lid van die Tweede Kamer vir die PVV
Ampsbekleër
Termynaanvang 30 November 2006
Lid van die Tweede Kamer vir die Groep Wilders
Ampstermyn 2 September 2004 – 30 November 2006
Lid van die Tweede Kamer vir die VVD
Ampstermyn 26 Julie 2002 – 2 September 2004
Ampstermyn 25 Augustus 1998 – 23 Mei 2002
Persoonlike besonderhede
Gebore	6 September 1963 (1963-09-06) (60 jaar oud) Venlo, Nederland
Politieke party	PVV (2006–hede) Onafhanklik (2004-2006) VVD (1989–2004)
Eggenoot/-note	Krisztina Wilders (1992-hede)
Alma mater	Open Universiteit Nederland

Wilders is gekant teen die immigrasie van (veral Moslemse) buitelanders, 'n felle teenstander van die Islamitiese godsdiens asook 'n groot voorstander van die vryheid van meningsuiting, asook vir swaarder strawwe. Ook staan hy bekend as pro-Israel en as 'n teenstander van 'n Palestynse staat.

 

Wilders is op 6 September 1963 in die stad Venlo in die provinsie Limburg gebore. Hy is die seun van Johannes Henricus Andreas Wilders en Anne Maria (Ording) Wilders. Hy is die jongste van vier kinders en is katoliek grootgemaak. Sy vader was Nederlands; sy moeder, Maria Anne Ourding, is in Sukabumi in die Nederlandse Oos-Indië (nou Indonesië) met 'n gemengde Nederlandse en Indonesiese agtergrond gebore. Sy vader het as 'n bestuurder vir die druk- en kopie-maatskappy Océ gewerk, en het tydens die Tweede Wêreldoorlog van die Duitsers geskuil, 'n ervaring wat so traumaties was dat hy selfs veertig jaar later nog weier om fisies Duitsland binne te gaan.

Wilders het sy sekondêre onderwys aan die Mavo- en Havo- middelbare skool in Venlo ontvang. Hy het 'n kursus in gesondheidsversekering by die Stichting Opleiding Sociale Verzekeringen in Amsterdam gedoen en verskeie regssertifikate aan die Nederlandse Open Universiteit behaal.^{[verwysing benodig]}

Wilders se doel nadat hy van die sekondêre skool afgestudeer het, was om die wêreld te sien. Omdat hy nie genoeg geld gehad het om na Australië, sy voorkeursbestemming, te reis nie, het hy eerder na Israel gegaan en vir 'n jaar as vrywilliger in 'n mosjav, Tomer, in die Wes-Bank gewerk. Met die geld wat hy gespaar het, het hy na die aangrensende Arabiese lande gereis en was deur die gebrek aan demokrasie in die streek geroer. Toe hy na Nederland terugkeer, het hy Israeliese idees oor teen-terrorisme behou en 'n "spesiale gevoel van solidariteit" vir die land gehad.

Terwyl hy in Utrecht gewoon het, het Wilders aanvanklik in die gesondheidsversekeringsbedryf gewerk. Sy belangstelling in die onderwerp het hom na politiek as 'n toespraakskrywer vir die Nederlandse Volksparty vir Vryheid en Demokrasie gelei. Hy het sy formele politieke loopbaan as 'n parlementêre assistent vir die party-leier Frits Bolkestein, wat hom op buitelandse beleid toegespits het, begin. Hy het hierdie werk van 1990 tot 1998 gehad. Gedurende hierdie tyd het Wilders wyd gereis, en lande regoor die Midde-Ooste, insluitende Iran, Sirië, Jordanië, Egipte en Israel, besoek. Bolkestein was die eerste Nederlandse politikus wat die gevolge van massaimmigrasie vir die Nederlandse samelewing aangespreek het, met skerp kritiek op Moslem-immigrante. Hy het 'n voorbeeld vir Wilders gestel, nie net met sy idees nie, maar ook met sy konfronterende sprekersstyl. Politieke analis Anno Bunnik het later Wilders as 'n "towenaarsleerling" van Bolkestein beskryf.

Wilders en sy party het in die parlement sedert 14 Oktober 2010 die Rutte I-kabinet gesteun. Hierdie minderheidskabinet, bestaande uit die Volksparty vir Vryheid en Demokrasie (VVD) en die Christen-Demokratiese Appèl (CDA), wou tot 2014 agtien miljard Euro bespaar op die begroting, immigrasie beperk en veiligheid verbeter.

• Wiki Afrikaans  Wiki Commons het meer media in die kategorie Geert Wilders.
• (nl) G. (Geert) Wilders, Parlement & Politiek