Krieg

Laes hie wie v'r mit de versjillende saorte Limburgs ómgaon.

'ne Krieg of aorlog is 'ne gewaopendje stried tösse völker of staote. Es etnische of religieus gruup binne dezelvendje staot mitein 'ne gewaopendje stried veure sprèk me van 'ne börgerkrieg. Me sprèk van 'ne weltkrieg es 'n mieëderheid vanne grótste en sterkste lenjer euvere ganse welt bieje krieg is betróch. Kriege tösse staoten óngerling zeen allewiel zeldjzaam.

Taengeneuver krieg steitj vraej, 'nen toestandj worin völker en naties 't bestaon van einanger respekteren of zelfs wardere. Tösse krieg en vraej zeen alderlei tössevörm dinkbaar, wie de Kaje Krieg of 'ne waopestilstandj.

Vanaaf 't begin is kriegveuring al óngerworpe gewaes aan wètten en reglemente, al zeen dees inne loup vannen tied waal verangerdj. Mit naam is mieë naogedach euvere rechvaerdiging van 'ne krieg. Saer 1945 is volges 't internasjenaal rech 't zoeameh veure van 'ne krieg gei gerechvaerdig middel mieë veur 't oplosse van kónflikte. Pas wen alle diplomatieke middele zeen oetgepötj kan waere beslaote toeten inzat van gewaopendje middele.

Tróds alle internasjenaal wètgaeving waere daacheliks nag väöl kónflikte mit waopes beslech, zónger det alle diplomatieke middelen oetpöttendj zeen benötj gewaore. Döks ómzeiltj me d'n term "krieg" door "gewaopendj kónflik" te broeke.