Nahwe akosiwin ka icinikatek coronavirus de 2019 matci kaie Covid-19 (e akiracamonaniwok ata itemikan coronavirus disease 2019) ekota we otciparik ka icinikatek SARS-CoV22, micta oke aniskehitotaniwon matci awik e aierimotc e peciwamakaniwitc matci kaie e takinikatek kekocic e ki takinak ka ki makonikotc akosiwiniw minawatc e mi takinak otactimikw.
Nehi kirowe ka itamitcitaniwok, awik ka kisisowapinetc, e octotak kirika ka mitawitamotc matci nac kekat ka wi kipotamparitc, arimikew tca e reretc, ekota matci wetci nipahikotc awik.
Picicikw arimatc kitci kasisitcaniwok, aka kitci peciwamitonaniwokw, kirowe neki ka oke akositcik, kirika matci kitci piskatek niketohinehon erowek nama orina kata aniskehitisonanion.
Nete akamikitcikamik ki otciparin ni apitc Atikamekw pisimw 2019 Wuhan, Nipicke askik itekera. OMS, organisation mondiale de la santé enko ka mitatc ntokohiewinik itekera ki witam kaskina awik kitci makonikotc nihe akosiwin ni apitc 30 kenositc pisimw 2020 nac e irikikaskomikak ota askik ni apitc 11 nikikw pisimw 2020.
Ka ki tca mi totcikatek, ki sikiskipihakaniwokw kaskina awik nete nipicke askik ni apitc kenositc pisimw 2020 nac nete kotakik pakwe emitikociwi aski, tariaw askik, nac ote kanata askik. Tekci ki nokiparin metowewinik, tohewinik kirika, kirika nipra ki raciparin coriak itekera.
Nictam Wemotacik ki makoniko peikw iskwew ni apitc kakone pisimw ka 2020 piponikak. Mia kotc nete pa tacikekopon ka ici metowaniwok Mani utenam ka witamowakaniwitc e ki makonikotc mantcoca. Tecikotc ki witam e aiekowaminiwetc e ki pa witcitacikematc ka nta aiamihaniwok ka kiceatisiritci. Erowek ki iti kikew. Minawatc kotak ki mi taw, kiskinohamatawkamikok ka otamirotc, ki kipahikatew pemacic. Otakocik ki witamokw kiapatc e ki pe nicopariritci e ki makonikotcik masinahikekomikok.
Manawanik, ni apitc 8 atikamekw pisimw ka 2020 piponikak, witamokw e ki pe nicoparitcik ka ki makonikotcik anihi mantcoca. Kecepwacik ki mitcetiwok e nta kiskerimitisotcik mackikirinikwecik. Ki kipahikatew kiskinohamatowikamikwa kirika ka ici otamironaniwok. Kitci ki kisisipatakaniwoki. Ka sosep kicikak tca, 11 atikamekw pisimw ka 2020 piponikak aci minawatc witamokw e taciritci, aci tca 8 itewok, aric mictahi nanakatcihakaniwok, tekci aka kitci orowitcik kirika pekonok kitci taciketcik omikiwamiwok. Erowek nama moci Opitciwan tawok ka ki makonikotcik.
Anotc ka wasikototc pisimw 2022 ka tato piponikak aci wacamec 4 tacitikenak ka ki nipahikotcik anihi akikwa, esko peikopiponikak, Manawan tepirak ko otcitcik.
Ka tcipaiatiko kicikak 13 ka tatokonakisitc nikikw pisimw 2020 nictam ka witcikatek kaskina kiskinohamatawkoma kitci kipahikateki ota kepek askik. Nehirowisi otenowa kewirawaw ki nosinetawokw niheriw irakonikewiniw kepek kice okimaw François Legault. Mackikiriniw Horacio Arruda icinikaso ka mitatc ntokohiewinik kirika ka mitatc kicerinikiwama Marguerite Blais okima arotakaniskwew, kirika Danielle McCan, kice okimawinak itekera. Enko niki ka arimowetcik tato kicko e witamaketcik ke iti icinakonik, kaskina aci kekat nikahikatew otamirowina e kipitinakaniwitcik ka otamirotcik aka orina kitci micta aniskehitonaniwok.
Manawanik, Wemotacik kirika Opitciwanik tekici kipaskohamok otenamiwow aka sa e mireritakik kitci pitikeparinik niheriw akosiwiniw. Kaie nosinetawokw tan e ici orakonikeritci kepek kice okimawa, aniheriw tca ka ntowertakok kitci ititoskaniwok;
Mekwata aci otcihiewok aka rotc kitci kiotamitonaniwok mikiwamiskak kirika aka kitci mawotcihitonaniokw, arimatc tca ki kipahikatew ickotewapo ka ici atowaniwokw kitci ki minoparik nihe ka totcikatek.
27 nikikw pisimw 2020, ntowatc cenikatew kitci atowaniwok ickotewapo tepirak tca pekatc kitci aitotcikatek aka kitci mawotcihitonaniokw.
4 nac asko 21 otehimin pisimw 2020, aci kipitinawanion kitci ki orowiparinaniok, mamik ka wi icatcik aric ma kitci nosinetakaniokw kiapatc ka ki ici orocowaniokw, kitci kasitcitcaniokw kirika aka kitci peciwamitonaniokw. Kotcitawok ke mi isparinik niheriw otci, kepitc ma kitci miro nosinehikatek.
Kice okimaw Kanata Justin Trudeau mictahi actaw coriariw kitci witcihatc iriniwa ka kipitinakaniwiritci e otamiroritci kirika kipitanam mackikiriw otci kitci miskaterik.
This article uses material from the Wikipedia Atikamekw article Mantcoc (Coronavirus Covid-19), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Patoc karokitasonaniwon kata natcipatcikatek ohwe mawotosinihikanCC BY-SA 4.0 kekotc nama takatc e itasinatek. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Atikamekw (DUHOCTRUNGQUOC.VN) is an independent company and has no affiliation with Wiki Foundation.