Athanase Ottawa: Atikamekw iriniw

Ki nitawkiw ni apitc 2 wapikon pisimw 1904 ka tato piponikarik. Joseph Ottawa kirika Sosan Wickitcan ki icinikasoriwa onikihikwa. Nictaw ki nipowiriwa otawiwa, enko aniha pamitcitc e ki wikimakoponen Joseph Ottawa ni apitc ka 13 tato konikisiritci mikomi pisimw 1897 ta tato piponikarik. Nictam ki wikimakopon anihe Geneviève Kaweasiketc, ni apitc 17 tato konikisiritci mikomini pisimwa 1867 ka tatopiponikarik minawatc anihi Juri Ickotekan, ni apitc 18 tato konikisiritci mikomini pisimw 1887 ka tato piponikarik. Anihi tca otawi 14 ki taciriwa kaskina onitcanica. Marie-Célina Pitcikwi ki icinikasoriwa iskwewa e ki wikimatc ni apitc 28 otatakon pisimw 1928 ka tato piponikarik. Mitato acitc peikw ki taciriwa onitcaniciwawa. Agnès Ottawa (Claude Flamand), Alice Ottawa (Soter Dubé), Annie Ottawa (Harry Flamand), Henriette Ottawa ( … ), Jos Ottawa (Philomène Dubé), Bernadette Ottawa (Thomas Quitich), Siméon Ottawa (Véronique Jacob), Samuel Ottawa (Cécile Jacob), Jacques F. Ottawa (Émilie Quitich), Suzanne Ottawa (César Jacob), Moïse Ottawa (Élizabeth Flamand), aci mitcetirikopon osima. 9 ka tato konikisiritci atikamekw pismiw 1983 ka tato piponikarik ka poni pimatisitc nete akosiwikamikok Coriet. 79 tato piponesikopon.
Taci we otciparik Gilles Ottawa

Mocak ki kapeciw notcimik ki wectaw orikahikaniw tatow e sikonik kirika onitcanica, osima e wawitcihikotc. Opweiak itekera e ici matcehonaniwok iti nokon anihe Wacapiskak, e iti nictam wacikamak ekota ka ki otci amitciwetcik weckatc Matana (Athanase Ottawa) e nta orikahiketcik. Kirika e iti kiskinohamowatc e totcikaterik e ocitakaniwonik sisipaskotokaniw nac e iti pikisikaniwok kirika okotinikanikaniwokw. Mictahi sa kotc ki kackitaw ni e ititosketc. Anotc okosa kirika osima pe tapickako mocak e ki witcihikotc. Nac peikwa ki peciwamiko masinactetcitcikaniw ka wectaritci Pierre Dinel kirika Pierre Hivon, enko tca ka ki ocitakaniwok "Les six saisons attikameks" Kirika miniciriw e mockinakik nac e iti osekwetcik ki nokosihakaniwokw. Micta mitecniw masinasowinina ni apitc ka pa pimatisitcik. Ekoci nta kinowapitamokw ota.