Verdrag Van Portsmouth
Met die Verdrag van Portsmouth, wat op 5 September 1905 op die Amerikaanse Vlootwerf Portsmouth in Kittery in die deelstaat Maine onderteken is, is die Russies-Japannese Oorlog van 1904−1905 formeel beëindig.
Onderhandelinge tussen die Russiese Tsareryk en die Keiserryk Japan het tussen 6 en 30 Augustus plaasgevind waarby die Amerikaanse president Theodore Roosevelt as bemiddelaar opgetree het. Vir sy suksesvolle bemiddeling is die Nobelprys vir Vrede van 1906 aan Roosevelt toegeken. Hy was die eerste Amerikaanse president wat die prys ontvang het.
Foto geneem in die argief van die Japannese Departement van Buitelandse Sake
Die oorlog was die eerste militêre konflik waarin 'n Europese moondheid 'n verpletterende neerlaag teen 'n vreemde land gely het. Nogtans was ook Japan ná die oorlog uitgeput genoeg om die vredesvoorwaardes te aanvaar. Rusland het Mantsjoerye ontruim, terwyl die skiereiland Liaotoeng met die seehawe Port Arthur en die suidelike helfte van Sachalin onder Japannese bewind gekom het. Japan was in die volgende dekades op politieke gebied geïsoleer. Die oorwinning oor Rusland het 'n sekere rol gespeel in die besluit om die Amerikaanse vlootbasis Pearl Harbor in 1941 aan te val. Japannese militariste en militêre strateë het blykbaar die verwagting gekoester dat die Verenigde State net soos Rusland maklik oorrompel en verslaan sou kon word.
Eksterne skakels
- Wiki Afrikaans
Wiki Commons het meer media in die kategorie Verdrag van Portsmouth.
- Teks van die ooreenkoms
This article uses material from the Wikipedia Afrikaans article Verdrag van Portsmouth, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.