Morgenster onder beheer van die Reformed Church of Zimbabwe is een van die bekendste sendingstasies in Afrika.
Dit lê in Masjonaland, slegs 'n 7 km suidoos van die argeologiese terrein bekend as die Zimbabwe-ruïnes (Groot-Zimbabwe), 35 km suidoos van Masvingo (voorheen bekend as Fort Victoria) en oos van Bulawayo. Dit is by die koördinate 20° 18′ 26″ suid en 30° 55′ 52.32″ oos en 1 219 m bo seevlak.
Hierdie sendingstasie word as 'n model voorgehou vir sendelinge en sendinggenootskappe. Dit beskik oor 'n hospitaal, lasaret, laer- en hoërskool, geriewe vir die opleiding van verpleegsters, onderwysers, evangeliste (sedert 1925), dowes, blindes, doofstommes en dominees (sedert 1936). Selfs tersiêre onderrig in samewerking met die Universiteit van Stellenbosch word aangebied. 'n Drukpers op die perseel voorsien baie van die onderrigmateriaal. Die oorspronklike sendingpos het metterjare in 'n dorpie ontwikkel.
Andries Adriaan (Andrew) Louw (1862–1956) het op 9 September 1891 by Mugabe se berg in Banyailand (nou Masjonaland) aangekom en namens die N.G. Kerk met sendingwerk daar begin. Hy en sy vrou Cini Malan ('n ouer suster van D.F. Malan) het 'n handleiding vir en 'n woordeboek in die Chikaranga-taal saamgestel en die Bybel in daardie taal vertaal. Later het dr. John Helm by hulle aangesluit en 'n hospitaal vir melaatses opgerig. Alhoewel die N.G. kerk in 1977 alle sendingwerk en eiendomme in Masjonaland aan die Reformed Church of Zimbabwe oorgedra het, ondersteun verskeie N.G. gemeentes in Suid-Afrika die werk daar deur die Morgenster Vennootskap en die Henry Murray Gedenkfonds.
30°55′52.32″O / 20.30722°S 30.9312000°O
This article uses material from the Wikipedia Afrikaans article Morgenster-sendingstasie, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.