Beyoğlu (Turks: Bejoɣlu) is ’n distrik aan die Europese kant van Istanboel, Turkye, wat van die historiese skiereiland van die ou Konstantinopel afgesny word deur die Goue Horing.
In die Middeleeue was dit in Grieks bekend as Pera ("Oorkant"), en dié naam is algemeen gebruik voor die stigting van die Republiek van Turkye in 1923.
Die distrik sluit ander buurte noord van die Goue Horing in, soos Galata, Karaköy, Şişhane, Tepebaşı, Tarlabaşı, Dolapdere en Kasımpaşa. Dit het die aktiefste kuns-, vermaak- en naglewe in Istanboel.
Die gebied word duisende jare al bewoon, maar het vanaf die 5de eeu bebou geraak as deel van Bisantium. Dit was in dié tyd bekend as Galata, en ’n fort is daar gebou, waarvan nog net die Galata-toring oor is.
Die moderne Beyoğlu is ’n vermaak- en inkopiedistrik vir plaaslike inwoners sowel as buitelandse besoekers.
Die bekende İstiklal Caddesi (İstiklal-laan), ’n gewilde inkopiestraat wat vir verkeer gesluit is en oploop na die bekende Taksim-plein, is in dié gebied. Weerskante van die laan is restaurante, kafees, kroeë, winkels, wynhuise en klubs, asook teaters, bioskope en kunsgalerye.
Parallel daarmee loop die wye Tarlabaşı Caddesi, wat die meeste van die verkeer deur die gebied dra. Dit is in die 1980's gebou en verskeie historiese geboue is daarvoor gesloop. Weerskante van dié laan is steeds historiese geboue, onder andere kerke.
Wiki Commons bevat media in verband met Beyoğlu. |
This article uses material from the Wikipedia Afrikaans article Beyoğlu, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.