Taksim-Plein
Taksim-plein (Turks: Taksim Meydanı) is in die hartjie van die Europese deel van Istanboel, Turkye, geleë.
Dit is ’n belangrike toeriste- en vermaakterrein wat bekend is vir sy restaurante, winkels en hotelle. Dit word beskou as die hart van moderne Istanboel en bevat die Republiekmonument (Cumhuriyet Anıtı), wat in 1928 gebou is en die stigting van die Republiek van Turkye herdenk.
Taksim, van die Arabiese woord taqṣīm, beteken verdeling of verspreiding. Dit was oorspronklik die plek waar die water van die noorde van Istanboel verdeel en na ander dele van die stad versprei is.
Vandag is Taksim-plein ’n belangrike vervoersentrum en ’n gewilde bestemming vir sowel toeriste as plaaslike bewoners. İstiklal Caddesi, ’n lang wandellaan, eindig by die plein, en ’n ou trem loop van die plein met die laan langs na die Tünel, wat die wêreld se tweede oudste ondergrondse spoorlyn is ná die Londense moltrein. Rondom die plein is talle reisagentskappe, hotelle, restaurante, kroeë en internasionale kitskosplekke soos Pizza Hut, McDonald's en Burger King.
Dit is ook ’n gewilde plek vir openbare geleenthede soos parades, vierings en selfs protesoptogte.
2013-betogings
Taksim Gezi-park is aan Taksim-plein geleë en is ’n klein groen eiland in die betonoerwoud. In 2013 het die Istanboelse munisipaliteit begin om die park te sloop om nog ’n winkelkompleks te bou. Duisende mense het sedert 26 Mei 2013 daarteen betoog en pleks van samesprekings te voer, het die regerende Regs-en-Ontwikkelingsparty geweld gebruik om die ontwikkeling van die kompleks te verseker. Die polisie het fisieke geweld, waterkanonne en pepersproei gebruik om die betogers uiteen te jaag.
Die betogers het ook die eerste minister van die afgelope 10 jaar, Recep Tayyip Erdoğan, gekritiseer vir sy hardvogtige standpunt oor die kwessie en vir die oormatige gebruik van geweld deur die polisie. Die betogings het ook na tientalle ander Turkse stede versprei en het uitgebrei om talle ander kwessies in te sluit. Oral is mense in hegtenis geneem en geweld gebruik om die opstand beëindig. Die betogings het tot in 2014 voortgeduur.
Verwysings
Eksterne skakels
- Foto's van Taksim-plein
- 2006 Nuwejaarsvierings op Taksim-plein Geargiveer 24 Februarie 2006 op Wayback Machine
- Wiki Afrikaans
Wiki Commons het meer media in die kategorie Taksim-plein. 
Hierdie artikel is vertaal uit die Engelse Wiki
28°59′09″O / 41.03694°N 28.98583°O
This article uses material from the Wikipedia Afrikaans article Taksim-plein, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.