నైరోబి

ఈ నగరంలో ప్రవహించే నైరోబి నదిని ఉద్దేశించిన ఎంకరే నైరోబీ అనే పదబంధం నుంచి ఈ నగరానికా పేరు వచ్చింది. కెన్యా ప్రాంతీయ భాష మాసాయ్ లో ఎంకరే నైరోబీ అంటే చల్లని నీళ్ళు అని అర్థం. 2019 జనాభా లెక్కల ప్రకారం నగరం జనాభా 4,397,073. మెట్రోపాలిటన్ ఏరియాను కూడా కలుపుకుంటే 9,354,580. ఈ నగరాన్ని గ్రీన్ సిటీ ఇన్ ద సన్ అని వ్యవహరిస్తారు.

నైరోబిని 1899 లో వలసరాజ్యాల అధికారులు బ్రిటిష్ ఈస్ట్ ఆఫ్రికాలో ఉగాండా రైల్వేలో డిపోగా స్థాపించారు. ఈ నగరం వెంటనే పెద్దదిగా విస్తరించి 1907 లో అంతకు మునుపు కెన్యా రాజధాని యైన మొంబాసా నగరం స్థానాన్ని ఆక్రమించింది. 1963 లో కెన్యా స్వాతంత్ర్యం అనంతరం రిపబ్లిక్ ఆఫ్ కెన్యాకు రాజధానిగా మారింది. వలస పరిపాలనలో నైరోబి, కాఫీ, టీ తోటల పెంపకంలో ప్రసిద్ధి గాంచింది. ఈ నగరం కెన్యా దక్షిణ మధ్యభాగంలో సముద్రమట్టానికి 1795 మీటర్ల ఎత్తులో ఉంది.