پاݨی اک بے رنگ ، بے بو تے بے ذائقہ مائع اے جیہدے نال کسیاں، جھیلاں، سمندر تے مینہ بݨدے نیں۔ ایہ جیوندیاں شیواں، کیمیائی کمپاؤنڈ دا اہم انگ اے۔ پاݨی دے اک مالیکیول وچ اک آکسیجن تے دو ہائیڈروجن ایٹم کوویلنٹ جوڑ نال جڑے ہوندے نیں۔ پانی عام پدھری گرمی ناپ تے دباؤ تے پاݨی سار ہوندا اے پر ایہ زمین تے اپݨےپینڈے ویس برف وچ تے گیسی ویس پاف وچ وی ملدااے۔
پاݨی نے زمین دے 71٪ پاسے نوں گھیریا ہویا اے۔ زمین تے پاݨی دا 96.5% حصہ سمندراں وچ اے، 1.7% زمینی پدھر تھلے اے، 1.7% گلیشیراں، انٹارکٹکا تے گرین لینڈ اتے اے۔ ماسہ جیا حصہ پاݨی دے اکٹھاں وچ ہے تے 0.001% حصہ ہوا وچ اے۔ زمین دے پاݨی دا 2.5% حصہ سجرا پاݨی اے تے ایہدا 98.8% برف دی ویس وچ اے یا زمینی پاݨی وچ۔ 0.3% توں وی گھٹ پاݨی دریاواں، جھیلاں تے ہوا وچ اے تے ایس توں وی گھٹ اے (0.003%) جیوندیاں شیواں یا بنیاں شیواں وچ اے۔انسان پاݨی توں بنا صرف 3 دن رہ سکدا اے۔
زمین تے پاݨی اک چکر وچ ریندا اے۔ ایہ پاݨی توں پاف وانگوں اڈ کے اتے ول جاندا اے تے ٹھنڈا ہوکے بدل بݨدا اے تے مینہ ورسدا اے تے ایہ فیر کجھ زمین وچ تے چوکھا کسیاں دریاواں راہیں سمندر اپڑدا اے۔
صاف پاݨی انساناں تے دوسریاں جیوناں لئی ضروری اے پاویں ایہدے وچ کوغی کلوری یا طاقتوالی شے نہیں ہوندی۔ پچھلے کئی دھاکیاں وج صاف پاݨی دنیا دیاں ساریاں تھانواں تے ہے پر ساریاں دی پونج وچ نہیں۔ ہجے وی اک ارب لوک صاف پاݨی توں تھڑے نیں تے ڈھائی ارب لوک ضروری صفائی توں۔ صاف پانی دے ورتݨ تے کسے دیس دی آمدنی دا آپس وچ گوڑا جوڑ اے۔ کجھ سوچواناں دا گویڑہ اے جے 2025 تک دنیا دی ادھی لوک گݨتی کسے نہ کسے پاسیوں پاݨی رے رپھڑ وج ہوویگی۔ نومبر 2009 دی اک کھوج لکھت ایہ کیندی ے جے 2030 تک دنیا دے اگے ودھویں دیساں وچ پاݨی دی لوڑ ہوند توں 50% ودھ جائیگی۔ پاݨی فیکٹریاں چلاݨ وچ وی لوڑیدا اے تے کل ورتے گۓ صاف پاݨی دا گھٹ ودھ 70% وائی بیجی وچ ورتیا جاندا اے۔
پاݨی اک کیمیائی مادھ اے جیدا کیمیائی فارمولا یا کیمیائی بنتر اے۔ پاݨی د ے اک مالیکیول وچ دو ایٹم ہائیڈروجن دے اک ایٹم آکسیجن دا کوویلنٹ کیمیائی ول نال بݨے ہوندے نیں۔ پاݨی نیچر وچ مادے دے تن ویساں ٹھوس، پاݨی سار تے گیس یا ہوا وچ ملدا اے تے ایہ زمین تے کئی مورتاں وچ دسدا اے: ہوا وچ، بدلاں وچ اسمان تے، سمندراں وچ لونے پاݨی وانگوں، قطبی سمندراں برف پہاڑاں وچ، پہاڑاں دے گلیشیراں وچ، لوݨیاں تے سجرے پاݨی دیاں جھیلاں، دریاواں تے زمین دے اندر۔
وکیمیڈیا کامنز چ مورتاں: پاݨی |
This article uses material from the Wikipedia شاہ مکھی پنجابی (Shāhmukhī Pañjābī) article پاݨی, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). لکھت CC BY-SA 4.0 لسنس تھلے ہیگا اے۔ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki شاہ مکھی پنجابی (Shāhmukhī Pañjābī) (DUHOCTRUNGQUOC.VN) is an independent company and has no affiliation with Wiki Foundation.