ଲକ୍ଷ୍ମୀ ଅଗ୍ରୱାଲ (ଜନ୍ମ ୧ ଜୁନ ୧୯୯୦) ଜଣେ ଭାରତୀୟ ଏସିଡ-ଆକ୍ରମଣ ପୀଡ଼ିତା ଯିଏ କି ପରବର୍ତ୍ତୀ ସମୟରେ Stop Acid Attack ଅଭିଯାନର ପ୍ରଚାରକ ଭାବେ ଏଭଳି ପୀଡ଼ିତାମାନଙ୍କର ଚିକିତ୍ସା ତଥା ଥଇଥାନ ପାଇଁ କାର୍ଯ୍ୟ କରିଆସୁଛନ୍ତି । ଏସିଡ ବିକ୍ରି ଉପରେ କଟକଣା ଲାଗୁ କରିବା ନିମନ୍ତେ ସେ ୨୭,୦୦୦ ସମର୍ଥକଙ୍କ ହସ୍ତାକ୍ଷର ଏକତ୍ର କରି ଭାରତର୍ ସର୍ବୋଚ୍ଚ ନ୍ୟାୟାଳୟରେ ଏକ ଜନସ୍ୱାର୍ଥ ମାମଲା ମାଧ୍ୟମରେ ନ୍ୟାୟାଳୟଙ୍କ ଦୃଷ୍ଟି ଆକର୍ଷଣ କରିଥିଲେ । ଫଳରେ ଉକ୍ତ ମାମଲାରେ ( ଲକ୍ଷ୍ମୀ ବନାମ ଭାରତ ସରକାର ) ସର୍ବୋଚ୍ଚ ନ୍ୟାୟାଳୟ ସମସ୍ତ ରାଜ୍ୟ ତଥା କେନ୍ଦ୍ର ଶାସିତ ଅଞ୍ଚଳକୁ ଏସିଡ ବିକ୍ରି ଉପରେ କଟକଣା ଜାରି କରିବା ସହ ଏଭଳି ମାମଲାର ତ୍ୱରିତ ଫଇସଲା ଦିଗରେ ପଦକ୍ଷେପ ନେବାକୁ ନିର୍ଦ୍ଦେଶ ଜାରି କରିଥିଲେ । ସଂପ୍ରତି ସେ Chhanv Foundation ନାମକ ଏକ ବେସରକାରୀ ସଂଗଠନର ନିର୍ଦ୍ଦେଶିକା ଅଛନ୍ତି ଯାହାକି ଏସିଡ-ଆକ୍ରମଣ ପୀଡ଼ିତାଙ୍କ ଥଇଥାନ ଦିଗରେ କାମ କରିଥାଏ । ତାଙ୍କ ସାହସିକତା ପାଇଁ ଆମେରିକା ପକ୍ଷରୁ ତାଙ୍କୁ International Woman of the Year ସମ୍ମାନରେ ସମ୍ମାନିତ କରାଯାଇଛି ।
ଲକ୍ଷ୍ମୀ ଅଗ୍ରୱାଲ | |
---|---|
ଜନ୍ମ | ୧ ଜୁନ ୧୯୯୦ |
ପ୍ରସିଦ୍ଧି | ଏସିଡ ଆକ୍ରମଣ ପୀଡ଼ିତାଙ୍କ ପାଇଁ ସମାଜ ସେବା |
ଜୀବନସାଥୀ | ଆଲୋକ ଦିକ୍ଷିତ |
ସନ୍ତାନ | ପିହୁ(କନ୍ୟା) |
ନୂଆ ଦିଲ୍ଲୀର ଏକ ମଧ୍ୟବିତ୍ତ ପରିବାରରେ ଲକ୍ଷ୍ମୀଙ୍କର ଜନ୍ମ । ୨୦୦୫ ମସିହାରେ ମାତ୍ର ୧୫ ବର୍ଷ ବୟଷରେ ଏ ଏସିଡ୍-ଆକ୍ରମଣର ଶିକାର ହୋଇଥିଲେ । ଦୁର୍ଘଟଣାର ଶିକାର ହେବାପରେ ଲକ୍ଷ୍ମୀ ନିଜର ସାହସ ହରାଇ ନ ଥିଲେ । ସେ "Stop Acid Attack" ନାମକ ଏକ ଅଭିଯାନର ନେତୃତ୍ୱ ନେଲେ ଏବଂ ଏହାର ପ୍ରଚାର ତଥା ଜନ ସଚେତନତା କାର୍ଯ୍ୟରେ ନିଜକୁ ନିୟୋଜିତ କରିଛନ୍ତି । ତାଙ୍କରି ପ୍ରଚେଷ୍ଟା ଫଳରେ ଏସିଡର ଅବାଧ ବିକ୍ରି ଉପରେ କଟକଣା ଲାଗୁ ହେବା ସହ ଏସିଡ-ଆକ୍ରମଣ ଦୁର୍ଘଟଣାର ପୀଡ଼ିତା ମାନଙ୍କ ପାଇଁ କ୍ଷତିପୁରଣ ତଥା ପୁନର୍ବାସ ନିମିତ୍ତ ଅନେକ ବ୍ୟବସ୍ଥା ହୋଇପାରିଛି ।
୨୦୦୫ ମସିହାରେ ଗୁଡ୍ଡା ନାମକ ୩୨ ବର୍ଷୀୟ ଏକ ବ୍ୟକ୍ତିର ପ୍ରେମ ନିବେଦନକୁ ପ୍ରତ୍ୟାଖ୍ୟାନ କରିଦେବା ପରେ ଉକ୍ତ ବ୍ୟକ୍ତି ତାଙ୍କ ଉପରକୁ ଏସିଡରେ ଆକ୍ରମଣ କରିଥିଲେ । ହିନ୍ଦୁସ୍ତାନ ଟାଇମସଦ୍ୱାରା ଏସିଡ-ପୀଡୀତା ମାନଙ୍କ ଉପରେ ସତ୍ୟ କାହାଣୀ ଉପରେ ଆଧାରିତ ଏକ କାହାଣୀ-ଶୃଙ୍ଖଳାରେ ଲକ୍ଷ୍ମୀଙ୍କ କଥା ମଧ୍ୟ ସ୍ଥାନ ପାଇଛି ।
ଏସିଡ ଆକ୍ରମଣରୁ ଜୀବନ ଫେରି ପାଇବା ପରେ ସେ ୨୦୦୬ ମସିହାରେ ଭାରତର ଉଚ୍ଚତମ ନ୍ୟାୟାଳୟରେ ଏକ ଜନହିତ ମାମଲା ଦାୟର ପୂର୍ବକ ଏଭଳି ପୀଡ଼ିତା ମାନଙ୍କ ନିମନ୍ତେ ଯୁକ୍ତିଯୁକ୍ତ କ୍ଷତିପୂରଣ ବ୍ୟବସ୍ଥା କରିବା ସହ ଏଭଳି ମାମଲାର ନିରାକରଣ ତଥା ତ୍ୱରିତ ବିଚାର ପାଇଁ ଭାରତୀୟ ଦଣ୍ଡ ସଂହିତା, ଫୌଜଦାରୀ କାର୍ଯ୍ୟବିଧି ସଂହିତା ତଥା ଅନ୍ୟାନ୍ୟ ସମ୍ବନ୍ଧିତ ଆଇନରେ ଆବଶ୍ୟକ ସଂଶୋଧନ ତଥା ନୂତନ ଆଇନ ଲାଗୁ କରିବା ଦିଗରେ ସରକାରଙ୍କୁ ନିର୍ଦ୍ଦେଶ ଦେବାକୁ ପ୍ରାର୍ଥନା କରିଥିଲେ । ଏହା ସହିତ ଏସିଡ ବିକ୍ରି ଉପରେ କଡା କଟକଣା ଲାଗୁ କରିବା ନିମିତ୍ତ ମଧ୍ୟ ଦାବୀ କରିଥିଲେ ।
ଏହି ପ୍ରସଙ୍ଗଟି ଅସମ୍ପୂର୍ଣ୍ଣ ଅଟେ । ଆପଣ ଏହାକୁ ସଂପୂର୍ଣ୍ଣ କରି ଉଇକିପିଡ଼ିଆକୁ ସମୃଦ୍ଧ କରିପାରିବେ । |
This article uses material from the Wikipedia ଓଡ଼ିଆ article ଲକ୍ଷ୍ମୀ ଅଗ୍ରୱାଲ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ଦର୍ଶାଯାଇନଥିଲେ ସମସ୍ତ ବିଷୟବସ୍ତୁ CC BY-SA 4.0 ରେ ଉପଲବ୍ଧ । Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ଓଡ଼ିଆ (DUHOCTRUNGQUOC.VN) is an independent company and has no affiliation with Wiki Foundation.