फिलिप लाम: जर्मन फुटबल खेलाडी

फिलिप लाम(जर्मन उच्चारण: ˈfɪlɪp ˈlaːm; जन्म ११ नोभेम्बर १९८३) जर्मन फुटबलर हुन जो बुन्डेस लिगा क्लब बायर्न म्युनिखबाट डिफेन्डर वा डिफेन्सिभ मिड फिल्डरको रूपमा खेल्दछन् । लाम बायर्न म्युनिखका कप्तान समेत हुन् । फिलिप लाम फुटबलको डिफेन्स रेखामा एउटा वजनदार नाम हो । बायर्नलाई धेरै ट्रफी जिताएका अनुभवी लाम यसअघि राष्ट्रिय टिमका पनि कप्तान थिए जसको कप्तानीमै जर्मनीले २०१४ फिफा विश्वकप जितेको थियो । विश्वकप जितेपछी उनले राष्ट्रिय टिमबाट सन्यासको घोषणा गरेका हुन् । दायाँ खुट्टा विशेष चलाउने उनी पिचको दुवै छेउबाट खेल्न सक्षम मानिन्छन् । सुट वा पासको माध्यमद्धारा बललाई मैदानको एक छेउबाट पिचभित्र कट गर्ने उनको क्षमता उनलाई संसारकै उत्कृष्ट डिफेन्डरको सुचिमा राख्ने आधार हो । तीव्र वेग, ड्रिबल, सुन्दर ट्याकल र छोटो कद उनका विशेषताहरू हुन् । यिनै विशेषताका कारण उनलाई 'जादुयी तारा' भनिन्छ । फिलिप लामको कप्तानीमा रहेको रक्षात्मक घेरालाई तोड्न कुनैपनि विपक्षी टोलीलाई हम्मेहम्मे पर्ने गर्छ ।