Kapulauan Marshall

Sacaro geografis, nagara ko marupokan bagian dari kalompok pulau nan labiah gadang di Mikronesia. Kapulauan Marshall barado di ateh gunuang barapi kuno nan tarandam, kamudian manyumbua dari dasar samudra, sakitar satangah jalan antaro Hawaii jo Australia, di utara Nauru jo Kiribati, di sabalah timur Federasi Mikronesia, sarato di selatan wilayah AS nan dipasangketaan Pulau Wake.

Atol jo pulau mambantuak duo kalompok: Ratak (matohari tabik) jo Ralik (matohari tabanam). Kaduo rangkaian pulau ko talatak kiro-kiro sajajar, mambantang dari barat lauik ka tenggara, tadiri dari 750.000 mil persegi (1.900.000 km2) lauik tapi hanyo sakitar 70 mil persegi (180 km2) daratan. Masiang-masiang mancakuik 15-18 pulau jo atol.

Pamarentahan Kapulauan Marshall bajalan di bawah sistem campuran parlementer-presidensial sabagaimano diatur dalam Konstitusi 1979. Presiden, nan marupokan kapalo nagara jo kapalo pamarentahan, dipiliah dek 33 senator Nitijela. Ampek dari limo presiden na alah tapiliah sajak Konstitusi diadopsi pado tahun 1979, alah manjadi kapalo adat tatinggi.

Historis jumlah panduduak Kapulauan Marshall indak dikatahui. Pado tahun 1862, panduduaknyo dipakiroan mancapai 10.000 jiwa. Pado sensus tahun 2011, panduduaknyo bajumlah 53.158 jiwa, sadangkan tahun 2022 dipakiroan bajumlah 61.988 jiwa. Labiah dari duo patigo panduduak tingga di ibu kota, Majuro, jo pusek perkotaan sekunder, Ebeye. Angko ko indak tamasuak panduduak asli nan alah pindah ka tampek lain; Asosiasi Karajo Samo Bebas mamungkinkan panduduak asli Kapulauan Marshall untuak bebas pindah ka Amerika Sarikat jo bakarajo di sinan. Sakitar 4.300 panduduak asli pindah ka Springdale, Arkansas di Amerika Sarikat; angko ko mawakiaan konsentrasi tagadang panduduak asli Kapulauan Marshall di lua kapulauan.