Sawah Solok

Wisata Agro Sawah Solok ko talatak di Lukah Pandan, indak jauah dari bateh Kota Solok jo Selayo.

Namo Sawah Solok barasa dari masyarakaik Solok untuak manyabuik hamparan jo bantangan sawah-sawah nan ado di Solok, khususnyo di daerah IX Korong, Lukah Pandan, Lubuak Sikarah jo sakitanyo. Solok disabuik juo jo kota bareh, karano di Solok memang banyak tadapek bantangan sawah-sawah nan laweh. Salain itu, tanah di Solok dianggap rancak untuak bacocok tanam. Luweh sawah Solok dipakirokan kurang labiah 250 hektar.

Wisata sawah Solok iko talatak di balakang pusek pamarintahan atau Balai Kota Solok jo sakaligus talatak di tapi jalan linteh. Dek karano itu pamarintah kota Solok mambuekan tulisan "SAWAH SOLOK" baukuran gadang nan di latakan di tangah-tangah bantangan sawah Solok. Hal sarupo itu dibuek salah satunyo batujuan untuak manarik parhatian urang-urang atau siapopun nan lewat di jalan linteh tasabuik.

Wisata sawah Solok dibuek untuak manjadikan kota Solok sabagai salah satu kota wisata nan ado di Sumatera Barat. Sabalunnyo wisata sawah Solok iko memang alah ado, tapi masih alun dikambangan jo alun banyak dikana urang. Dahulunyo hanyo ado bantangan sawah nan luweh jo babarapo pondok atau gaduang-gaduang nan digunoan untuak istirahat dek patani-patani nan sadang kasawah.

Pamarintah mulai mangambangan wisata iko dengan caro manambah jumlah pondok atau gaduang-gaduang dan maisi banda-banda irigasi di sawah Solok jo babagai macam jenis ikan nan dibudidayokan. Salain itu, di kawasan wisata sawah Solok ko alah dibuek lo tampek makan dan dihias samanarik mungkin untuak manarik para wisatawan.

Tampek makan sawah Solok balokasi di Kampai Tabu Karambia, Lubuk Sikarah, Kota Solok, Sumatera Barat. Tampek makan sawah Solok iko dilangkoki jo kolam kolam ikan nan dibudidayokan dek pamarintah kota Solok. Ikan-ikan tasabuik salalu diagiah makan satiok harinyo dek petugas nan batangguang jawek.

Wisata sawah Solok nan dihadirkan dek pamarintah kota Solok iko mulai diminati dek sagalo kalangan, indak takacuali dari kalangan pelajar.  Pamarintah manyabuikan banyak pelajar nan bakunjuang untuak mampalajari caro bacocok tanam jo caro mambudidayakan ikan. Sekretaris dinas pendidikan kota Solok Wadirman, S.Pd., MM. manyabuikan “ tampek baraja indak hanyo di ruangan sajo namun alam tabukak dapek juo digunokan sabagai tampek baraja, wisata agro dapek dijadikan sabagai sabuah ajang untuak pandidikan karakter siswa”. Pandidikan karakter anak harus dipakuek sajak kini tujuannyo supayo karakter anak dapek dibantuak dengan elok.