Ou Styl- En Nuwe Styl-Datums

O.S. dui byvoorbeeld aan 'n datum is bereken volgens die Juliaanse kalender, wat voorheen in baie lande gebruik is, eerder as die Gregoriaanse kalender, wat tans in die meeste lande gebruik word. In Engeland se geskiedenis kan dit ook daarop dui dat die begin van die Juliaanse kalender aangepas is om op 1 Januarie te val, hoewel ’n ander jaarbegin op daardie tydstip gebruik is.

Hoeveel dae die twee kalenders verskil, wissel van eeu tot eeu. (Vergelyk tabel regs.)

In Rusland is die Juliaanse kalender tot op 14 Februarie 1918 gebruik. Enige datum in die geskiedenis voor dié dag is volgens dié kalender (dus O.S.) bereken. So het die Russiese Rewolusie van 1917 op 25 Oktober (O.S.) plaasgevind en dit word steeds in Rusland die "Oktober-rewolusie" genoem. In die Nuwe Styl, wat toe al feitlik oral ter wêreld gebruik is, het die rewolusie egter op 7 November plaasgevind.

Die Oosters-Ortodokse Kerk gebruik steeds die Juliaanse kalender en daarom val Kersfees in Rusland en sommige ander lande tans op 7 Januarie (wat 25 Desember is volgens die Juliaanse kalender).

In Brittanje is dit gebruiklik om die meeste datums van die Juliaanse kalender by die Gregoriaanse jaar aan te pas sonder om die dag en maand te verander. Die Engelse kalenderjaar het van die 12de eeu tot in 1752 op 25 Maart begin. ’n Gebeurtenis tussen 1 Januarie en 24 Maart sou dus in die vorige jaar geval het omdat die kalenderjaar toe eers op 24 Maart geëindig het.

Die datum van koning Charles I se teregstelling is in dié tyd aangeteken as 30 Januarie 1648 (O.S.). In moderne weergawes van die gebeure word die datum gewoonlik aangegee as 30 Januarie 1649 (N.S.). As die datum volledig omgeskakel sou gewees het na die Gregoriaanse kalender, sou dit 9 Februarie 1649 gewees het, die datum wat sy tydgenote in sekere dele van Europa waar die Gregoriaanse kalender toe reeds gebruik is, sou beskou het as die dag van die teregstelling.

25 Maart (O.S.) val in die Nuwe Styl op 6 April, en dit is steeds die eerste dag van die finansiële jaar in Brittanje.

• Juliaanse kalender
• Gregoriaanse kalender