சின்கான்சென் (சப்பானிய மொழி: 新幹線, புதிய பெருந்தடம்) என்பது ஜப்பானிய இரும்புப்பாதை குழும நிறுவனங்களால் இயக்கப்படும், ஜப்பானின் அதிவேக இரும்புவழித்திட பிணையம் (network) ஆகும்.
1964-ஆம் ஆண்டு டோகாய்டோ சின்கான்சென் (515.4 கி.மீ.) தொடங்கியது முதல், இதன் பிணையம் விரிவாக்கப்பட்டு, தற்போது 2,615.7 கி.மீ. நீளமும், அதிகபட்சமாக மணிக்கு 240–320 கி.மீ. வேகமும் கொண்ட சின்கான்சென் தடங்களையும்; 283.5 கி.மீ. நீளமும், அதிகபட்சமாக மணிக்கு 130 கி.மீ. வேகமும் கொண்ட சிறு-சின்கான்சென் தடங்களையும் கொண்டுள்ளது. தற்போது இப்பிணையம் ஓன்சூ மற்றும் கியூஷூ தீவுகளில் உள்ள முக்கிய நகரங்களை, வட தீவான ஹொக்கைடோவில் புதிதாக கட்டப்பட்ட விரிவாக்கத்துடன் இணைக்கிறது. இந்த பிணையங்களில் ஓடும் அதிவேக தொடருந்துகள்தான், தோட்டா தொடருந்து (ஆங்கிலம்: bullet train, புல்லெட் இரயில்) எனும் அடைப்பெயரால் அழைக்கபடுகிறது.
உலகில் அதிவேகப் பயணத்திற்கான தனிப்பயனுள்ள இரும்புவழித் தடத்தை நிறுவிய முதல் நாடு ஜப்பான் ஆகும்.
சின்கான்சென் எனும் பெயர் முதன்முதலில் 1940-ஆம் ஆண்டு பயன்படுத்தப்பட்டது.
அரசாங்க அனுமதி 1958, டிசம்பர்-ல் பெறப்பட்டு, தோக்கியோ-ஒசாக்கா இடையேயான முதற்கட்ட டோகாய்டோ சின்கான்சென்னின் கட்டுமானம் 1959, ஏப்ரல்லில் தொடங்கியது. சின்கான்சென் கட்டுவதற்காக கணிக்கப்பட்ட உத்தேச செலவு சுமார் ¥200 பில்லியன் ஆகும். இத்தேவை கடன், இரும்புவழிப் பத்திரங்கள் மற்றும் குறைந்த-வட்டிக் கடனாக உலக வங்கியிடம் $80 மில்லியன் மூலம் பெறப்பட்டது. முதற்கட்ட யூகிப்புகளை குறைத்து மதிப்பிடவே, செலவு இரட்டிப்பான ¥400 பில்லியனாக உயர்ந்தது. 1963-ல் இதானால் ஆனா நிதிப் பற்றாக்குறைக்கு பொறுப்பேற்று சோகோ பதவிவிலகினார்.
முதல் தோக்கியோ ஒலிம்பிக்குக்காக, 1 அக்டோபர், 1964 அன்று டோகாய்டோ சின்கான்சென் சேவையை தொடங்கியது. தோக்கியோ -ஒசாக்கா இடையே வழக்கமான விரைவுச் சேவை ஆறு மணிநேரம் 40 நிமிடங்கள் ஆனது, அனால் சின்கான்சென் இப்பயணத்தை வெறும் 4 மணிநேரத்தில் முடித்தது. இது இவ்விரு பெருநகரில் உள்ள மக்களின் வணிகம் மற்றும் வாழ்க்கை முறையில் மாற்றத்தை ஏற்படுத்தியது. இச்சேவை மாபெரும் வெற்றி அடைந்தது. 1992-ல் ஒவ்வொரு மார்க்கத்திலும், மணிக்கு 23,000 பயணிகளை சராசரியாகக் கொண்டு, டோகாய்டோ சின்கான்சென் உலகின் பரபரப்பான இரும்புத்தடம் ஆனது.
டோகாய்டோ சின்கான்சென்னின் பெரும் வெற்றியைத் தொடர்ந்து, ஒக்காயாமா, ஹிரோஷிமா மற்றும் புக்குவோக்கா (சான்யோ சின்கான்சென்) இணைக்கும் வகையில் மேற்கில் விரிவாக்கத்திற்கு பரிந்துரைக்கப்பட்டு, 1975-ல் இது செய்து முடிக்கப்பட்டது. இத்திட்டத்தை தொடருந்து டோஹோகூ சின்கான்சென் மற்றும் ஜோஎட்சு சின்கான்சென் என்று இரு புதிய தடங்கள் கட்டப்பட்டது. மேலும், 1970களின் முடிவில் பல திட்டங்கள்ஜப்பானிய தேசிய இரும்புவழித்துறையின் (JNR) கடன் பாக்கிகளால், தாமதிக்கப் பட்டன. இந்த பிரச்னை 1987-ன் தனியார்மயமாக்கும் கொள்கையால் முடிவு பெற்றது.
சின்கான்சென்னின் வழித்தடம், மற்ற வழக்கமான இரும்புத்தடத்தில் இருந்து தனியாக அமைக்கப்பட்டது (வழக்கமான இரும்புத்தடத்தில் ஓடும் சிறு-சின்கான்சென்னை தவிர்த்து). இதனால், வேகம் குறைவான தொடருந்துகளால் பாதிப்படையாமல், நேரம் தவறாமையை பெற்றது. இந்த வழித்தடம் சமமட்டக் கடவுகள் இல்லாமல் அமைக்கப்பட்டது. இவை சுரங்கப்பாதைகள் மற்றும் 4000மீட்டருக்குக் குறைவான வளைவு ஆரம் கொண்ட ஏதண்டங்களை (டோகாய்டோ சின்கான்சென்னுக்கு 2500மீ.) உபயோகித்து தடைகளை ஊடுருவியும் தாண்டியும் செல்லுகின்றன.
1067மி.மீ. (3 அடி 6 அங்குலம்) பழைய தடங்களின் குறுகிய இரும்புப்பதைக்கு பதில், 1435மி.மீ. (4 அடி 8 1⁄2 அங்குலம்) கொண்ட செந்தர இரும்புப்பாதையை சின்கான்சென் பயன்படுத்துகிறது. தொடர்ச்சியான உருக்கியிணைக்கப்பட்ட இரும்புப்பாதை மற்றும் நகரும் ஆப்புக் கடவு புள்ளிகள் பொருத்தப்பட்டு, இரும்புத்தட நிலைமாற்றிகள் மற்றும் கடவுகளின் இடைவெளிகள் நிரப்பப்பட்டன.
குற்றியுள்ள மற்றும் குற்றியில்லா தடங்கள் என இரண்டும் பயன்பாட்டில் உள்ளன. குற்றியில்லாத் தடங்கள் சுரங்கப்பாதைகளிலும் ஏதண்டங்களிலும் உபயோகிக்கப்படுகிறது.
சின்காசென் தானியங்கி தொடருந்து கட்டுப்பாட்டுக்கருவியை (Automatic Train Control) கொண்டு பாதையின் ஓரத்தில் உள்ள சமிக்ஞைகளின் தேவையற்றதாக ஆக்கியது. இது முழுமையான தானியங்கி தொடருந்து பாதுகாப்பு (Automatic Train Protection) அமைப்பை உபயோகிக்கிறது.
சின்கான்சென், அதன் மேலுள்ள 25கி.வோ. மாறுமின்னோட்ட (சிறு-சின்கான்சென்னில் 20கி.வோ. மாறுமின்னோட்டம்) மின்னாற்றல் மூலத்தை உபயோகிக்கின்றன. இந்த ஆற்றல் தொடருந்தின் சக்கர அச்சுக்கு பகிரபடுகிறது. டோகாய்டோ சின்கான்சென்னின் ஆற்றல்வழங்கியின் திறன் 60 ஹெர்ட்ஸ் ஆகும்.
சின்கான்சென் தொடருந்துகள், வேகமான வேகமுடுக்கம், ஒடுக்கம் மற்றும் குறைவான எடையால் குறைவான சேதத்தை தடத்திற்கு அளிக்கும், தன்னுந்து பெட்டிகளை கொண்டிருக்கும். அதிவேகத்தில் சுரங்கப்பாதைக்குள் நுழைகையில், நிலையான காற்றழுத்தத்தை உறுதிசெய்ய, பெட்டிகள் காற்றுப்புகா வண்ணம் தயாரிக்கப்டுகின்றன.
சின்கான்சென் பல காரணிகளால் மிகவும் நம்பகமானது, ஏனெனில் இது முழுவதுமாக பொறுமையான போக்குவரத்துகளில் இருந்து தனிமைப் படுத்தப்பட்டுள்ளது. 2014-ல், மத்திய ஜப்பானிய இரும்புவழித்துறையின் அறிக்கையின்படி சின்கான்சென்னின் நிர்ணயிக்கப்பட்ட கால அட்டவணையைவிட சராசரியான தாமத நேரம் 54 நொடிகள். இது இயற்கை பேரிடர் போன்று கட்டுபடுத்த முடியாத காரணங்களையும் உள்ளடக்கியது. 1997-ன் பதிவுகளின்படி இது 18 நொடிகளாக இருந்தது.
ஆரம்பம் முதலே சின்கான்சென் மின்தன்னுந்து பெட்டி வடிவமைப்பை பயன்படுத்தின. 0 வரிசை சின்கான்சென்னின் அனைத்து சக்கர அச்சுக்களுக்கும் ஆற்றல் செலுத்தப்படும். பெரும்பாலான சக்கர அச்சுகள் ஆற்றல் பெறுவது, அதிக வேகமுடுக்கதிற்கு வித்திட்டது. இதனால் சின்கான்சென்னை அடிக்கடி நிறுத்துவதால், அவ்வளவாக நேரம் விரயமாவதில்லை.
50 வருடங்களுக்கும் மேலான சின்கான்சென்னின் வரலாற்றில், 10 பில்லியன் பயணிகளுக்கு மேல் சுமக்கையிலும், அடிக்கடி பூகம்பங்களும் புயல்களும் தாக்கியபோதும், இதுவரை எந்த பயணியும் தடம்புரள்வதாலோ அல்லது மொதல்களாலோ இறந்ததில்லை. ஒரு இறப்பும், பலரின் காயங்களும் கதவுகளை மூடும் போது நிகழ்ந்துள்ளது; இத்தகைய விபத்துகளை தடுக்க நடைமேடைகளில் ஊழியர்களை நியமித்துள்ளனர். பயணிகள், ஓடும் தொடருந்தின் முன் அல்லது அதிலிருந்து குதித்த தற்கொலைகள் நடந்துள்ளன.
இதுவரை இருமுறை சின்கான்சென் தொடருந்துகள் தடம்புரண்டுள்ளன. முதலாவது, 23 அக்டோபர் 2004 அன்று ச்சூஎட்சு நிலநடுக்கத்தின்போது நிகழ்ந்தது. டோக்கி எண். 325 தொடருந்தின் பத்தில் எட்டு பெட்டிகள் ஜோஎட்சு சின்கான்சென்னில் தடம்புறண்டது. 154 பயணிகளும் சிறு காயங்களுடன் தப்பினர்.
இரண்டாவது, 2 மார்ச் 2013 அன்று ஆகிட்டாவில் பனிப்புயலால் கோமாச்சி எண். 25 தொடருந்து ஆகிட்டா சின்கான்சென்னில் நிகழ்ந்தது. இதில் எந்த பயணியும் காயம் அடையவில்லை.
பூகம்பத்தின்போது, பூகம்ப எச்சரிக்கை அமைப்பினால் தொடருந்தை மிக வேகமாக நிருத்த முடியும். ஜோஎட்சு தடம்புறளை நன்றாக ஆராய்ந்து, தடம்புறளைத் தடுக்கும் ஒரு புதிய கருவி பொருத்தப்பட்டது.
டோக்கியோ-ஒசாக்கா சின்கான்சென் தடங்களில் பயணிக்கையில், மகிழுந்துப் பயணத்தின்போது வெளியாகும் கரியமிலவாயுவின் அளவில், வெறும் 16 சதவிகிதத்தை மட்டுமே வெளியிடுகிறது. இதனால் வருடத்திற்கு 15,000 டன்கள் CO2 அளவு குறைகிறது.
இரைச்சல் மாசு நேரடியாக வேகத்தை பாதிக்கும். ஆகையால், வழுக்கி மின்சேகரிப்பானின் (pantograph) மேம்பாடு, எடைகுறைவான பெட்டிகள் மற்றும் இரைச்சல் தடைகளின் (noise barriers) கட்டுவது போன்றவைகள் செயல்படுத்தப்பட்டன.
பூகம்பத்தால் ஏற்படும் அபத்துகளால், அவசரமாக பூகம்ப உணரும் மற்றும் எச்சரிக்கும் அமைப்பை (earthquake warning system) 1992-ல் அறிமுகப்படுத்தப்பட்டது. இது பெரும் பூகம்பத்தின்போது தோட்டா தொடருந்தின் தானியங்கி வேகத்தடுப்பான்களை இயக்க்கும்.
பனிக்காலத்தில் மைபாரா நிலையத்தை ஒட்டியப்பகுதியில், டோகாய்டோ சின்கான்சென் அடர்ந்த பனியை எதிர்கொள்ளும். தொடருந்துகள் வேகத்தை குறைத்தாக வேண்டும், அனால் இது கால அட்டவனையை பாதிக்கும். இதை எதிர்கொள்ள தெளிப்பான் அமைப்புகள் பின்னர் பொருத்தப்பட்டன. இதனால் அடர்ந்த பனி என்ற தடை விலகியது.
வருடம் | சின்கான்சென் (குறிப்புகளைப் பார்க்க ) | ஆசியா (மற்றவை) | ஐரோப்பா | உலகம் | சின்கான்சென் பங்கு (%) |
---|---|---|---|---|---|
1964 | 11.0 | 0 | 0 | 11.0 | 100% |
1980 | 1,616.3 | 0 | 0 | 1,616.3 | 100% |
1985 | 2,390.3 | 0 | 45.7 | 2,436.0 | 98.1% |
1990 | 3,559.1 | 0 | 129.9 | 3,689.0 | 96.5% |
1995 | 5,018.0 | 0 | 461 | 5,479 | 91.6% |
2000 | 6,531.7 | 0 | 1,103.5 | 7,635.1 | 85.5% |
2005 | 8,088.3 | 52.2 | 2,014.6 | 10,155.1 | 79.6% |
2010 | 9,651.0 | 965 | 3,177.0 | 15,417 | 70.8% |
2012 | 10,344 | 2,230 | 3,715 | 16,210 | 64.5% |
2014 | 11,050 | 3,910 | 4,300 | 19,260 | 57.4% |
குறிப்புகள் :
டோகாய்டோ | டோஹோகூ | சான்யோ | ஜோஎட்சு | நாகானோ | கியூசு | மொத்தம் (தோராயமான கூட்டுத்தொகை ) | |
---|---|---|---|---|---|---|---|
2007 | 151.32 | 84.83 | 64.43 | 38.29 | 10.13 | 4.18 | 353.18 |
சிறு-சின்கான்சென் (ミニ新幹線) என்பது முன்னாள் குற்றகலப் பாதைகள், செந்தரப் பாதைகளாக மாற்றி அமைக்கப்பட்ட தடங்களுக்கு இட்ட பெயர் ஆகும். இதன்மூலம் சின்கான்சென் தொடருந்துகள், குறைவான கட்டுமான செலவில் நகரங்களுக்குள் பயணித்தது.
இரு சிறு-சின்கான்சென் தடங்கள் உள்ளன:
ஜப்பானின் சின்கான்சென் தொடருந்துகள் உபயோகிக்கும் 1067மி.மீ. (3அடி 6அங்குலம்) உள்ள குற்றகல பாதையிலும், 1435மி.மீ. (4அடி 8 1⁄2 அங்குலம்) உள்ள செந்தரப் பாதையிலும் ஓட சிறப்பாக வடிவமைக்கப்பட்ட ஒரு தொடருந்துதான், அச்சு-அகலம் மாறும் தொடருந்துகள். இத்தொடருந்திலுள்ள பெட்டிகளின் சக்கரங்கள், அதன் அச்சிலிருந்து தன்னை விடுவித்துக்கொண்டு, தேவைக்கேற்ப குறுகி அல்லது அகன்று, மீண்டும் அச்சுடன் பொருந்திக்கொள்ளும். இதனால் அச்சு-அகலம் மாறும் தொடருந்து, செந்தரப் பாதை மற்றும் குற்றகலப் பாதை என இரண்டிலும் ஓட முடியும். இதனால் தடத்தை மாற்றும் செலவு மிச்சமாகிறது.
முக்கிய சின்கான்சென் தடங்கள்:
தடம் | ஆரம்பம் | முடிவு | நீளம் | இயக்குபவர் | துவங்கப்பட்டது | வருடாந்திர பயணிகள் | |
---|---|---|---|---|---|---|---|
கி.மீ. | மைல் | ||||||
டோகாய்டோ சின்கான்சென் | தோக்கியோ | புது-ஒசாக்கா | 515.4 | 320.3 | மத்திய ஜப்பானிய இரும்புவழி | 1964 | 143,015,000 |
சான்யோ சின்கான்சென் | புது-ஒசாக்கா | ஹக்காட்டா | 553.7 | 344.1 | மேற்கு ஜப்பானிய இரும்புவழி | 1972–1975 | 64,355,000 |
டோஹோகூ சின்கான்சென் | தோக்கியோ | புது-ஆமோரி | 674.9 | 419.4 | கிழக்கு ஜப்பானிய இரும்புவழி | 1982–2010 | 76,177,000 |
ஜோஎட்சு சின்கான்சென் | ஓமியா | நீகாடா | 269.5 | 167.5 | 1982 | 34,831,000 | |
ஒக்கூரிக்கூ சின்கான்சென் | தகாசாகி | கனசாவா | 345.4 | 214.6 | கிழக்கு ஜப்பானிய இரும்புவழி மற்றும் மேற்கு ஜப்பானிய இரும்புவழி | 1997–2015 | 9,420,000 |
கியூசூ சின்கான்சென் | ஹக்காட்டா | ககோசீமா-ச்சூஒ | 256.8 | 159.6 | கியூசூ ஜப்பானிய இரும்புவழி | 2004–2011 | 12,143,000 |
தொடருந்துகள் 16 பெட்டிகளைக் கொண்டிருக்கும். ஒவ்வொரு பெட்டியும் 25மீ. நீளமும், மொத்த நீளம் 400மீ. இருக்கும். இதற்கு ஏற்றவாறு நிலையங்களும் நீளாமாக இருக்கும். ஜப்பானின் சில அதிவேக காந்தமிதவுந்துகள் சின்காசென் என குறிப்பிடபடுகின்றன, (லினிமோ காந்தமிதவுந்துகளை போல்) இதர மெதுவான காந்தமிதவுந்துகள், வழக்கமான விரைவுப் போக்குவரத்துக்கு மாற்றாக விளங்குகின்றன.
வேகம் | தொடருந்து | இடம் | திகதி | கருத்துக்கள் | |
---|---|---|---|---|---|
கி.மீ.-ல் | மைல்கலில் | ||||
200 | 120 | பிரிவு 1000 சின்கான்சென் | ஒடவாராவில் உள்ள கமொநோமியா வெள்ளோட்ட தடம். இப்போது டோகாய்டோ சின்கான்சென்னின் அங்கமாக உள்ளது. | 31 அக்டோபர் 1962 | |
256 | 159 | பிரிவு 1000 சின்கான்சென் | கமொநோமியா வெள்ளோட்ட தடம் | 30 மார்ச் 1963 | மின்தன்னுந்து தொடருந்துக்கான முந்தைய உலக வேக சாதனை |
286 | 178 | பிரிவு 951 சின்கான்சன் | சான்யோ சின்கான்சென் | 24 பிப்ரவரி 1972 | மின்தன்னுந்து தொடருந்துக்கான முந்தைய உலக வேக சாதனை |
319.0 | 198.2 | பிரிவு 961 சின்கான்சென் | ஒயாமா வெள்ளோட்ட தடம். இப்போது டோஹோகூ சின்கான்சென்னின் அங்கமாக உள்ளது | 7 டிசம்பர் 1979 | மின்தன்னுந்து தொடருந்துக்கான முந்தைய உலக வேக சாதனை |
325.7 | 202.4 | 300 வரிசை | டோகாய்டோ சின்கான்சென் | 28 பிப்ரவரி 1991 | |
336.0 | 208.8 | 400 வரிசை | ஜோஎட்சு சின்கான்சென் | 26 மார்ச் 1991 | |
345.0 | 214.4 | 400 வரிசை | ஜோஎட்சு சின்கான்சென் | 19 செப்டம்பர் 1991 | |
345.8 | 214.9 | 500-900 வரிசை "வின்350" | சான்யோ சின்கான்சென் | 6 ஆகஸ்ட் 1992 | |
350.4 | 217.7 | 500-900 வரிசை "வின்350" | சான்யோ சின்கான்சென் | 8 ஆகஸ்ட் 1992 | |
352.0 | 218.7 | பிரிவு 952/953 "ஸ்டார்21" | ஜோஎட்சு சின்கான்சென் | 30 அக்டோபர் 1992 | |
425.0 | 264.1 | பிரிவு 952/953 "ஸ்டார்21" | ஜோஎட்சு சின்கான்சென் | 21 டிசம்பர் 1993 | |
426.6 | 265.1 | பிரிவு 955 "300எக்சு" | டோகாய்டோ சின்கான்சென் | 11 ஜூலை 1996 | |
443.0 | 275.3 | பிரிவு 955 "300எக்சு" | டோகாய்டோ சின்கான்சென் | 26 ஜூலை 1996 |
வேகம் | தொடருந்து | இடம் | திகதி | கருத்துக்கள் | |
---|---|---|---|---|---|
கி.மீ.-ல் | மைல்கலில் | ||||
550 | 340 | MLX01 | ச்சூஓ சின்கான்சென் (யமானஷி சோதனைத் தடம்) | 24 டிசம்பர் 1997 | முந்தைய உலக வேக சாதனை |
552 | 343 | MLX01 | ச்சூஓ சின்கான்சென் (யமானஷி சோதனைத் தடம்) | 14 ஏப்ரல் 1999 | முந்தைய உலக வேக சாதனை |
581 | 361 | MLX01 | ச்சூஓ சின்கான்சென் (யமானஷி சோதனைத் தடம்) | 2 டிசம்பர் 2003 | முந்தைய உலக வேக சாதனை |
590 | 370 | எல்0 வரிசை | ச்சூஓ சின்கான்சென் (யமானஷி சோதனைத் தடம்) | 16 ஏப்ரல் 2015 | முந்தைய உலக வேக சாதனை |
603 | 375 | எல்0 வரிசை | ச்சூஓ சின்கான்சென் (யமானஷி சோதனைத் தடம்) | 21 ஏப்ரல் 2015 | வேகத்திற்கான உலக சாதனை |
சின்கான்சென் தொழில்நுட்பத்துடனான இரும்புவழிதடம், ஜப்பானுடன் அடங்கி விடவில்லை.
சீனக் குடியரசின் அதிவேக இரும்புவழித்துறை இயக்கும், சின்காசென் 700டி வரிசை, கவாசாகி கனரக தொழிற்சாலையில் தயாரிக்கப்படுகிறது.
2015 டிசம்பரில், இந்தியாவின் முதல் அதிவேக இரும்புவழிதடமாக மும்பை-அகமதாபாத் அதிவேக தொடருந்து வழித்தடத்தின் கட்டிமானத்திற்கு இந்தியா மற்றும் ஜப்பான் நாடுகளுக்கிடையே ஒப்பந்தம் கையெழுத்தானது.
This article uses material from the Wikipedia தமிழ் article சின்கான்சென், which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). வேறுவகையாகக் குறிப்பிடப்பட்டிருந்தாலன்றி இவ்வுள்ளடக்கம் CC BY-SA 4.0 இல் கீழ் கிடைக்கும். Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki தமிழ் (DUHOCTRUNGQUOC.VN) is an independent company and has no affiliation with Wiki Foundation.