ଓମପ୍ରକାଶ ବାଲ୍ମୀକି: ଭାରତୀୟ ଲେଖକ ଓ କବି

ଓମ୍ ପ୍ରକାଶ ବାଲ୍ମୀକି (୩୦ ଜୁନ ୧୯୫୦ – ୧୭ ନଭେମ୍ବର ୨୦୧୩) ଜଣେ ଭାରତୀୟ ଲେଖକ ଓ କବି ଥିଲେ । ଦଳିତ ସାହିତ୍ୟରେ ଏକ ମାଇଲଖୁଣ୍ଟ ଭାବରେ ବିବେଚିତ ପୁସ୍ତକ ତାଙ୍କ ଆତ୍ମଜୀବନୀ ଜୁଠନ ପାଇଁ ସେ ଜଣାଶୁଣା । ସେ ଉତ୍ତର ପ୍ରଦେଶର ମୁଜାଫରନଗର ଜିଲ୍ଲାର ବାର୍ଲା ଗ୍ରାମରେ ଜନ୍ମଗ୍ରହଣ କରିଥିଲେ । ସରକାରୀ ଅର୍ଡିନାନ୍ସ କାରଖାନାରୁ ଅବସର ନେବା ପରେ ସେ ଡେରାଡୁନରେ ରହୁଥିଲେ । ସେଠାରେ ୧୭ ନଭେମ୍ବର ୨୦୧୩ରେ ପେଟ କର୍କଟ ଜନିତ ଜଟିଳତା କାରଣରୁ ତାଙ୍କର ମୃତ୍ୟୁ ହୋଇଥିଲା । ଜୁଠନ (ଆତ୍ମଜୀବନୀ) (୧୯୯୭) ବ୍ୟତୀତ ସେ ତିନୋଟି କବିତା ସଂକଳନ ପ୍ରକାଶ କରିଥିଲେ: ସଦିଓଁ କା ସନ୍ତାପ (୧୯୮୯), ବାସ୍! ବହୁତ ହୋ ଚୁକା (୧୯୯୭), ଏବଂ ଅବ ଔର ନେହିଁ (୨୦୦୯) । ସେ ସଲାମ (୨୦୦୦) ଏବଂ ଘୁସପୈଠିଏ (୨୦୦୪) ନାମକ ଦୁଇଟି କ୍ଷୁଦ୍ର ଗଳ୍ପସଂକଳନ ମଧ୍ୟ ଲେଖିଥିଲେ । ଏହାବ୍ୟତୀତ ସେ ଦଳିତ ସାହିତ୍ୟ କା ସୌନ୍ଦର୍ଯ୍ୟଶାସ୍ତ୍ର (୨୦୦୧) ଏବଂ ବାଲ୍ମୀକି ସମ୍ପ୍ରଦାୟର ଇତିହାସ ସଂକଳିତ ସଫାଇ ଦେବତା (୨୦୦୯), ଦୋ ଚେରା ନାଟକ ଆଦି ରଚନା କରିଥିଲେ । ୨୦୦୮ ମସିହାରେ ତାଙ୍କର ୧୫ଟି କ୍ଷୁଦ୍ରଗଳ୍ପକୁ ନରେଶ କେ ଜୈନ ଆମ୍ମା ଆଣ୍ଡ ଅଦର ଷ୍ଟୋରୀଜ୍ ନାମକ ସଂକଳନ ଭାବେ ଇଂରାଜୀରେ ଅନୁବାଦ କରିଥିଲେ ।