बिर्तामोड नगरपालिका

विर्तामोड नेपालको मेची अञ्चलको झापा जिल्लाको एउटा नगरपालिका हो । यो झापा जिल्लामा अवस्थित एउटा प्रसिद्ध व्यापारिक केन्द्र हो । पूर्व पश्चिम जोडने महेन्द्र राजमार्गमा पर्ने यो बजार झापा जिल्लाको सबैभन्दा महत्त्वपूर्ण वाणिज्य केन्द्र हो । बिर्तामोडलाई झापाको मुटुपनि भनिन्छ । पहिले अनारमनी गाविसमा रहेको यो व्यापारिक केन्द्र २०७१ जेष्ठ ४ गतेदेखि नगरपालिकामा परिणत भएको हो । अनारमनि चाहिँ बिर्तामोड चोकबाट करिव २ किलोमिटर दक्षिणमा अवस्थित बजार हो । यसलाई नगरपालिका घोषणा गर्दा अनारमनी र चारपाने गाउँ विकास समितिहरू समावेश गरिएका हुन् । प्राचिन कालको बिर्ता बजारलाई हाल अनारमनि भनिन्छ । बिर्ता बजारतिर मोडिने ठाउँ भएकोले यो ठाउँको नाम बिर्तामोड रहेको भएतापनि अहिले बिर्ता बजारको अस्तित्त्व पनि बिर्तामोडमा नै बिलिन भैसकेको छ । बिर्तामोड धेरै सम्भावना बोकेको सुदुर पुर्वको एक शहर हो । अहिले याँहा विकासको क्रान्ति सुरु भइसकेको छ, र देखिन पनि थाल्यो ।