法文: 羅曼語種

法文
français
用嘅國家、地區	法國、比利時、瑞士、摩納哥同埋加拿大
區域	西歐
講嘅人口	9,300萬（L1） 3.21億（L1+L2，2022年）
排名	14位
系屬	印歐語系 意大利語族 羅曼語族 意大利-西羅曼語支（英文：Western Romance languages） 高盧-羅曼語支（英文：Gallo-Romance languages） 奧依文（英文：Langues d'oïl） 法文
文字	拉丁字母
官方地位
官方語言	法國 比利時 貝寧 加拿大 布隆迪 喀麥隆 瑞士 塞內加爾
管理機構	Académie française（法文學院）（法國） Office québécois de la langue française（魁北克法語委員會）
語言代碼
ISO 639-1	fr
ISO 639-2	fre (B) fra (T)
ISO 639-3	fra
Linguasphere	51-AAA-i
睇 傾 改

法文係廿九個國家同好多地區嘅法定語言。法文喺法國、比利時、瑞士、摩納哥同埋加拿大等國通行。其中法式法文同魁北克法文上有唔少分別，譬如發音差得遠，所以有啲難溝通。

法文係好多國際機構嘅官方語言，譬如歐盟、國際奧林匹克委員會、世界貿易組織、北大西洋公約組織、國際足協、聯合國、萬國郵政聯盟、國際刑警等等。法語嘅地位喺十八、十九世紀達到巔峰，係外交場合嘅共通語，之後就俾英文取代。雖然係咁，法文仲係有佢獨特嘅地位。

法國係出版業大國，每年出版圖書大概兩、三萬本。家陣，全世界法文教師大概有二十五萬，大約有八千幾萬人學緊法文。

雖然好多法國人認為自己係高盧人（les Gaulois）嘅後裔，但係就而家嘅法文嚟講，凱爾特話嘅特徵可以話係鳳毛麟角。多數字都係嚟自拉丁文或者日耳曼語言。

公元四世紀，羅馬帝國統治今日法國一帶，拉丁話開始喺法國流行。到公元五世紀，拉丁話已成爲當地通行話，取代當地原先嘅凱爾特文。喺高盧境內，羅馬移民日多，高盧人同佢哋用嘅通用拉丁話，融合成為通俗拉丁話。與此同時，上層文人用嘅書面拉丁文，亦漸見衰退。公元五世紀，民族大遷徙，外族入高盧，講日耳曼文嘅法蘭克人，同原先高盧境內講拉丁話嘅居民，兩語融合。法文開始冇咗非重音音節。六七世紀，大眾話變成種混合性語言。公元八世紀，查理曼帝國開始規範國內語文。到公元九世紀，拉丁話同日耳曼話，最終融合成羅曼文。由一五三九年開始，法文成為法國唯一嘅官方語言。

一零六六年，征服者威廉將法文帶去英格蘭，影響英文（例如牛肉嘅英文 beef 係由法文嘅 bœuf 轉成嘅；dictionary 字典，嚟自法文嘅 dictionnaire），所以英文字當中有好多都係源自法文。另一方面，十八世紀由於歐洲各國貴族欣賞法國嘅生活方式，法文亦成為宮廷嘅語言。直到二十世紀二十年代，法文都係歐洲外交場合嘅共同語言。

二次大戰後，英文對法文的影響都唔少，例如原先啲法國人講 la fin de semaine（週末），而家佢哋講 le week-end，同埋家陣啲法國人習慣講 le football、le drugstore 等等。但同時，加拿大英文亦有受法文影響。

法文嘅名詞有分陰陽，例如la table（枱）係陰性嘅，le train（火車）同埋l'ordinateur（電腦）係陽性嘅。法文重有動詞變位。

法文唔係聲調語言，高低音（les intonations）唔係要嚟分別意思，係要嚟分別語氣，有冇強調，係根據情況而轉變。法式法文，比利時法文同魁北克法文嘅高低音規矩係一模一樣。讀單字嘅時候，高低音唔重要，可以轉變，例如「papa」（爹哋嘅意思）讀「霸巴」、「巴霸」或者「霸霸」都冇錯，都識聽，因為意思冇轉變。問嘢同嗌人嘅時候，最後嗰個音節一定要提高：Est-ce que↗ vous pourriez↗ m'aider↗ s'il vous plaît↗? ／ Bernard↗ ／ William↗ ／ Gabriel↗。喺成個句子入邊，所有單字嘅最後嗰個音節一定要提高，除咗啲短字（je，tu，il，le，la，à）同埋最後嗰個單字: Je parle↗ beaucoup↗ à mes camarades↗ à l'école↘. 如果冇問號，句尾唔可以太高音，通常讀高降音（普通話第4聲）或者低音（粵語第6聲）。同一個句子都有轉變高低音，強調嗰個字嘅時候，第一個音節一定要提高，強調「beaucoup」（好多）呢個字: Je parle↗ beau↗coup à mes camarades↗ à l'école↘. 打招呼嘅高低音可以轉變：bon↘jour↗，bon↗jour，sa↘lut↗，sa↗lut。

• 您好 ／ Bonjour ／ [bõʒuʁ] (幫手·個快勞)
• 您好嗎？／ Comment ça va ? ／ [kɔmɔ̃ sa va] ／ [kɔmã sa vɔ]（魁北克發音）
• 係／ Oui ／ [wi]
• 唔係／ Non ／ [nõ] ／ [nõʊ̯̃]（魁北克發音）
• 多謝/唔該 ／ Merci ／ /mɛʁsi/ (幫手·個快勞)
• 我唔知。／ Je (ne) sais pas. ／ [ʒø (nø) sɛ pa] ／ [ʒə se pɔ] (幫手·個快勞)（魁北克發音）
• 我唔明。／ Je (ne) comprends pas. ／[ʒø nø kõpʁɔ̃ pa] (幫手·個快勞) ／[ʒœ nœ kõʊ̯̃pʁã pɔ] (幫手·個快勞)（魁北克發音）
• 您識唔識講法文呀?／ Parlez-vous français ? ／ [paʁle vu fʁɔ̃sɛ] ／ [paʁle vu fʁãsɛ]（魁北克發音）
• 生日快樂 ／ Bon anniversaire ／ [bɔn‿anivɛʁsɛʁ] ／ [bɔn‿anivɛʁsaɛ̯ʁ]（魁北克發音）
• 生日快樂 ／ Bonne fête（魁北克法文）／ [bʌn fɑɛ̯t] (幫手·個快勞)（魁北克發音）
• 《La Belle et la Bête》－著名法國童話《美女與野獸》嘅法文名

法國曾經係世界超級大國，至今亦都仲係世界強國，所以法文喺世界上嘅影響力好大，係世界上其中一種重要語言。喺近代，廣州灣做過法國嘅屬領，而廣州亦有面積幾大下嘅廣州法租界，喺舊時嶺南地區（廣東、廣西、海南）係法國嘅勢力範圍，法國人曾經喺兩廣活躍過，所以粵語亦吸收咗啲法文詞。法文係粵語第三大外來詞源頭。下面係一啲舉例：

• 英文純化，現代英文有好多嚟自法文嘅借詞，有人主張要消除呢種影響。
• 芭蕾舞詞彙，有好多嚟自法文嘅字詞