Tamatiesous: ’n tafelsous

Tradisioneel het daar verskillende ketchup-resepte bestaan vir souse gemaak van sampioene, oesters, mossels of okkerneute maar in moderne tye beteken die term ketchup sonder uitsondering tamatiesous.

Dit is 'n soet-suur sous, tipies gemaak van tamaties, asyn, 'n versoeter, en verskillende geurmiddels en speserye. Die soetheid is in die meeste gevalle suiker, of, meer spesifiek in die Verenigde State van Amerika, hoë fruktose mieliestroop. Geurmiddels kan wissel volgens die resep, maar gewoonlik sluit dit uie, wonderpeper, naeltjies, kaneel, knoffel, en soms seldery in.

Tamatiesous word as 'n kondiment genuttig by verskeie geregte wat warm bedien word, insluitende slaptjips, hamburgers, toebroodjies, worsbroodjies, roereiers en selfs braaivleis. Ketchup word soms ook gebruik as 'n basis of bestanddeel vir ander souse.