Keiser van die Hele Rusland (Russies: Императоръ Всероссійскій, Imperator Wserossiiski) was van 1721 tot 1917 die titel van die heerser van die Russiese Ryk.
Die vroulike vorm is Keiserin van die Hele Rusland (Russies: Императрица Всероссійская, Imperatritsa Wserossiiskaja). Dit is geskep ná die Russiese oorwinning in die Groot Noordelike Oorlog en is ’n aanpassing van die vorige titel, "Tsaar van die Hele Roes". Die laaste deel van die titel is gebruik sedert die bewind van die grootprinse van Wladimir.
Keiser van die Hele Rusland | |
---|---|
Keiserlike wapen. Keiser Nikolaas II. | |
Betiteling | Sy Keiserlike Majesteit |
Eerste keiser | Pieter I |
Laaste keiser | Nikolaas II |
Aanvang | 2 November 1721 |
Afgeskaf | 15 Maart 1917 |
Amptelike tuiste | Winterpaleis |
Opvolging | Erflikheid |
Aanspraakmakers | Groothertogin Maria Wladimirowna Prins Andrei Romanof |
Artikel I van die basiese wette van die Russiese Ryk bepaal dat die Keiser van die Hele Rusland ’n outokratiese monarg sonder perke is. "God self beveel" dat sy oppergesag gehoorsaam word.
Die volle titel van keisers het begin met Ons, deur Gods genade, Keiser en Outokraat van die Hele Rusland . . . (Мы, Божию Милостию, Император и Самодержец Всероссийский . . .; Mi, Bozjijoe Milostijoe, Imperator i Samodjerzjets Wserossiiski . . .). Daarna het ’n lang lys gevolg van al sy titels en die gebiede onder sy beheer.
In sommige gevalle, wat deur die wet bepaal is, kon die "Afgekorte Keiserlike Titel" gebruik word, wat heelwat minder titels en name bevat het, en in uitsonderlike gevalle die "Kort Keiserlike Titel", met net ’n paar name. In alle gevalle is die titel afgesluit met "ens., ens., ens."
Die titel is in 1721 aan Pieter die Grote gegee. Ná die oorwinning in die Groot Noordelike Oorlog en die ondertekening van die Verdrag van Nystad, het die Russiese senaat en sinode besluit om die titel "volgens die gebruik van die Romeinse senaat" aan Pieter toe te ken uit dankbaarheid vir sy leierskap en sy oorwinning in die "Sweedse Oorlog".
Pieter het die titel op 2 November 1721 aanvaar. Ander lande het dit mettertyd erken: Nederland en Pruise dadelik, Swede in 1723, die Ottomaanse Ryk in 1739, Brittanje en Oostenryk in 1742, Frankryk en Spanje in 1745 en die Pools-Litause Gemenebes in 1764. Daarna is na Rusland verwys as die Russiese Ryk.
This article uses material from the Wikipedia Afrikaans article Keiser van die Hele Rusland, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.