Dag Achatz is 'n Sweedse virtuose pianis en komponis.
Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Achatz is in 1942 in Stockholm gebore as die seun van 'n Sweedse moeder en vader van Weense afkoms. Beide sy ouers was musikante. Achatz het opgegroei in Switserland en op agtjarige ouderdom by die Geneefse Konservatoria ingeskryf. Nadat hy gegradueer het, het hy sy studies voortgesit onder Greta Eriksson in Stockholm, Alfred Cortot en Guido Agosti in Sienna, en Susanne Roche en Vlado Perlemuter in Parys.
In 1960 het hy eerste prys behaal tydens die Rudolph Ganz-kompetisie in Lausanne, en in 1964 eerste prys tydens die luisterryke Maria Canals Internasionale Musiekkompetisie in Barcelona. Hy was ook 'n pryswenner tydens die Beierse Radio-kompetisie in München en die Viotti Internasionale Musiekkompetisie in Vercelli. Hy het sedertdien in meer as vyf-en-twintig lande opgetree, asook by die mees luisterryke musikale liggings in Londen, Parys, New York, Boston, Berlyn, Moskou, Sint Petersburg, Wene, Tokio en Beijing.
Achatz het reeds meer as 1,000 uitvoerings gegee en meer as 240 kere saam met orkeste gespeel, insluitende die radio-orkeste van Stockholm, München, Parys, Stuttgart, Turyn, Milaan; die Orchestre de Pasdeloup van Parys, die l'Orchestre de l'Opéra de Monte Carlo, die Gewandhaus van Leipzig, die Staatskapelle van Dresden; asook die Filharmoniese orkeste van Stockholm, Oslo, Barcelona en Lissabon.
Achatz het aan die internasionale musiekfeeste van Montreux, Aix-en-Provence en Savonlina in Finland deelgeneem. Hy het ook saam met gerekende dirigente soos Celibidache, Bernstein, Kertesz, Zinmann, Kamu, Maris Jansons en andere gewerk. Sy meesterklasse het hom na die Academie-Festival des Arcs in Frankryk, die Instituut vir Gevorderde Musiekstudies in Montreux, die Osaka Konservatoria in Japan, en die Umea Internasionale Akademie in Swede, geneem.
Dag Achatz dien gereeld as lid van beoordelingspanele van internasionale kompetisies, insluitende die Jaen-, Clara Haskil-, Vercelli-, Paryse-, Oporto- en München kompetisies (Beiere Radio-orkeskompetisie) en vele ander. Hy het, wat kamermusiek en liedere betref, opgetree saam met die Da Ponte Kwartet, die Fresk Kwartet, en saam met gerekende sangers soos Barbara Hendricks, Birgit Finnilä, Hugues Cuenod en Joanna Porackova. Hy het ook opgetree saam met Yukie Nagai.
Achatz het meer as 'n dosyn opnames vir BIS, CBS, EMI, Melodiya en Americus Records gemaak. Sy CD van die musiek van Gershwin op die BIS plaatetiket het lof ontvang, asook sy opnames van Debussy, Ravel, Skriabin, Schumann, Liszt, Stenhammar, Grieg en vele ander. Hy het gedurende die middel van die sewentigerjare ook saam met die Franse sanger-liedjieskrywer Léo Ferré gewerk.
Sy verwerking vir soloklavier van Strawinski se Rite of Spring vir BIS Records word wyd gereken as een van die beste opnames van die twintigste eeu. Ook Leonard Bernstein het Achatz versoek om sy ballet, Fancy Free, te verwerk. Achatz het die werk saam met sy eie verwerking van Bernstein se Simfoniese Danse uit sy West Side Story opgeneem.
Hierdie artikel is in sy geheel of gedeeltelik vanuit die Engelse Wiki vertaal. |
This article uses material from the Wikipedia Afrikaans article Dag Achatz, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Inhoud is onderhewig aan CC BY-SA 4.0, tensy anders vermeld. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Afrikaans (DUHOCTRUNGQUOC.VN) is an independent company and has no affiliation with Wiki Foundation.