Benede-Oranjeriviervallei

Die streek begin by Prieska en sluit die smal strook grond weerskante van die Oranjerivier tot by Onseepkans in. Die Boegoebergdam lê ook in die streek naby Groblershoop. Die Oranjerivier oorheers die streek; die meeste mense in die streek is direk of indirek betrokke by aktiwiteite met water uit die rivier.

Water word by Upington en Kakamas uit die rivier gekeer waar intensiewe besproeiing beoefen word. Die spoelgrond is vrugbaar. Die wingerde van Upington tot by Kakamas lewer van die beste sultanadruiwe en rosyne in die wêreld. Ander druiwekultivars word ook verbou tesame met bone, lensies, ertjies, sagtevrugte, sitrus, lusern, koring en katoen. Kakamas is beroemd vir sy taaipitperskes.

Tussen Upington en Kakamas vloei die rivier breed, party plekke tot 2 km met baie eilande tussenin waarvan die bekendste Kanoneiland is. Kanoneiland is naby Keimoes en word ook intensief bewerk. Die Augrabieswaterval is net noordwes van Kakamas.

Die N10 en N14 nasionale paaie gaan deur die streek terwyl die Sishen-Saldanha Spoorlyn die streek net noord van Groblershoop kruis.

• Lys van streeksname in Suid-Afrika