Allra Síðasta Veiðiferðin

Myndin er framhald af Síðustu veiðiferðinni (2020) og önnur myndin í Veiðiferðarseríunni. Myndinni var leikstýrt af Erni Marinó Arnarssyni og Þorkeli S. Harðarssyni, en þeir voru einnig handritshöfundar og framleiðendur myndarinnar. Í aðalhlutverkum voru Þorsteinn Bachmann, Þröstur Leó Gunnarsson, Hilmir Snær Guðnason, Halldór Gylfason, Sigurður Sigurjónsson, Jóhann Sigurðarson, Sigurður Þór Óskarsson, Halldóra Geirharðsdóttir, Ylfa Marín Haraldsdóttir, Gunnar Helgason og Edda Björg Eyjólfsdóttir.

Allra síðasta veiðiferðin var tekjuhæsta íslenska mynd ársins 2022 og voru tekjur myndarinnar rúmlega 45 milljónir og um 24 þúsund miðar seldust.

Eftir ævintýralegan laxveiðitúr fyrra sumars er ákveðið að halda aftur til veiða, þrátt fyrir misgóðar minningar úr þeim túr. Til að koma sér áfram í pólitík býður Valur Aðalsteins félögunum í flotta laxveiði með því skilyrði að þeir hagi sér vel og ekkert megi klikka. Vegurinn til Helvítis er eins og áður varðaður góðum ásetningi og er þessi túr því ekki undanskilin.

Í febrúar árið 2021 var byrjað að þróa myndina en tökur fóru fram í júní árið 2021 og var myndin frumsýnd 18. mars 2022.

Þriðja, fjórða og fimmta kvikmyndin í seríunni hafa verið tilkynntar og stefnt er á að taka upp þriðju myndina, Langsíðasta veiðiferðin árið 2024. Fjórða og fimmta myndin munu heita Næst síðasta veiðferðin og Fyrsta veiðiferðin.