संस्कृत: भारत के एगो भाषा

बिकास के क्रम के हिसाब से हे भाषा के दू गो रूप बतावल जाला: वैदिक संस्कृत, जेह में वेद सभ के रचना भइल हवे; आ लौकिक संस्कृत जेह में बाद के साहित्य आ अउरी बिबिध बिसय के ग्रंथ लिखल गइल हवें। संस्कृत भाषा के ई नाँव बिसेस संस्कार, यानी ब्याकरण वगैरह के हिसाब से खास शुद्ध कइल भाषा, होखे के कारण मिलल हवे आ अपना इतिहास में ई अभिजात वर्ग आ पढ़ल लिखल लोग के भाषा रहल बा। एकरे साथे-साथ आम जनता के भाषा प्राकृत रहल जेकरा में कुछ साहित्य भी मिले ला आ संस्कृत साहित्य में भी एह भाषा के मिलजुल मिले ला।

बाद के कई इंडो-आर्यन भाषा सभ, जइसे कि भोजपुरी, नेपाली, हिंदी, मराठी, बांग्ला वगैरह के बिकास संस्कृत से होखल बतावल जाला, हालाँकि, एह बात के बिपरीत कई बिद्वान लोग माने ला कि एह भाषा सभ के बिकास संस्कृत के समांतर बोलल जाए वाली प्राकृत सभ से भइल आ संस्कृत के परभाव भर पड़ल।