Edwin Southern

Hy is die bekendste vir sy uitvinding van die Southern-klad metode, wat hy in 1975 gepubliseer het en wat sedertdien 'n algemene laboratoriumproses geword het.

Sir Edwin Southern
Sir Edwin in 2012
Geboortenaam	Edwin Mellor Southern
Gebore	1938-06-07 Burnley, Verenigde Koninkryk
Nasionaliteit	Brits
Alma mater	University of Manchester (BSc); University of Glasgow (PhD)
Bekend vir	Southern-klad
Webblad	Southern op OGT webwerf

Southern is in Burnley, Lancashire gebore en het by Burnley Grammar School skoolgegaan. Hy het 'n broer, John Southern, en 'n suster, Kay Monie. Hy het Chemie aan die Universiteit van Manchester gestudeer (BSc Hons., 1958). Hy het sy nagraadse studies by die Universiteit van Glasgow gedoen, waar hy sy PhD in 1962 verwerf het.

Southern is die stigter en voorsitter van Oxford Gene Technology. Hy is ook die stigter en voorsitter van die liefdadigheidsorganisasies The Kirkhouse Trust, wat daarop gemik is om onderwys en navorsing in die Natuurwetenskappe te bevorder, veral die biologiese en mediese wetenskappe, asook die Edina Trust, wat wetenskap in skole bevorder. Hierdie liefdadigheidsorganisasies word uit lisensiëringsinkomste van mikroarray-tegnologie befonds.

Southern-klad

Die Southern-klad word vir DNS analise gebruik, en was 'n algemene metode vir die voorbereiding van genetiese vingerafdrukke en vaderskapstoetse voordat tegnieke ontwikkel is wat op mikrosatelliet-merkers berus. Die proses is ook dikwels gebruik om die aantal kopieë van 'n geen in die genoom te bepaal. Die konsepte van die Southern-klad was ook die grondslag vir die ontwikkeling van die moderne mikroarrayskyf, wat wye toepassing in molekulêre biologie vind. Die northern-klad, western-klad en eastern-klad, soortgelyke prosesse vir die analise van RNS, proteïne en post-transkripsionele modifikasies van proteïne, respektiewelik is woordspelings op Southern se naam.

DNA mikroarray

Southern het Oxford Gene Technology (OGT) in 1995 gestig. Die maatskappy ontwikkel DNS mikroarray tegnologie, en het in 1999 sy patente suksesvol verdedig in 'n hofgeding teen Affymetrix.

Southern was in 1990 een van die wenners van die Gairdner Foundation International Award. In 1998 is hy met die Royal Medalje van die Royal Society van Londen bekroon. Hy is in 2003 die titel Knight Bachelor verleen vir sy werk in die ontwikkeling van DNS mikroarray tegnologie. In 2005 is hy saam met Alec Jeffreys van die Universiteit van Leicester bekroon met die gesogte Albert Lasker-toekenning vir kliniese mediese navorsing, vir hulle uitvinding van die Southern-klad. In 2005 het hy die Vereniging van Biomolekulêre hulpbronfasiliteite se toekenning vir uitstaande bydraes tot biomolekulêre tegnologie verower. Hy het in 1983 lid van die Royal Society geword.