管理學

一個經理喺度同佢間廠啲工人講數。

一間公司嘅董事同其他管理人員聚埋一齊開會；董事係現代組織當中最高層嘅管理人員。

一個組織嘅領導人喺度開緊記招；高層好多時要代表佢哋嘅組織向外界交待組織入面發生嘅事。

廿一世紀嘅學術界相當重視管理學：社會科學會將管理學當成一門學術領域噉嚟研究，並且嘗試研究例如一個組織嘅效率同佢安排佢啲資源嘅方式之間有咩啦掕，有學術期刊定時定候出版呢啲研究論文。為求令管理學對佢所研究嘅現象有更深嘅了解，仲有管理學方面嘅學者開始咗運用神經科學同人工智能呢啲「硬」科學（指精確嘅科學）領域嘅知識嚟解釋同研究管理學上撞到嘅問題。

管理學本質上係個應用領域，所以除咗學術價值，管理學亦都重視實務性質嘅課題。管理學上嘅討論唔淨只要求對現象嘅理論性質嘅了解，仲會講求點樣提高管理嘅效率。好似係有關領導能力嘅研究噉：領導能力包含一個人引領同激勵身邊嘅人，而管理學上一般認為，領導才能對管理者嚟講係重要嘅能力；管理學研究會用科學方法探討成功嘅領袖有乜特徵，同時又會按呢啲研究嘅結果，諗吓管理人才嘅訓練過程要作出乜嘢變革，先可以提高經過呢啲訓練嘅人嘅領導能力－理論同實踐都受到重視。

喺奧地利出世嘅美國知名管理學者彼得·杜拉卡係噉樣定義管理所做嘅工作嘅：

現代管理學嘅定位如下：喺最廣義上嚟講，「一班人聚埋一齊，為咗某個共同目標工作（組織）」就係管理學關注嘅現象；管理涉及嘅係搵出一個組織 嘅使命、目的、程序，以及運用個組織嘅人力同非人力資本去令到個組織成功噉達到佢嘅目的，包含咗處理人員之間嘅溝通同埋人員嘅動機，又包括咗研究一個組織要點樣操控一啲機械或者第啲非人力資本。管理學所研究嘅呢啲過程喺好多種場合嗰度都會見到－好似一間企業、一個非牟利機構、甚至係一個犯罪組織當中都會見到管理學所研究嘅原理：一間好似任天堂噉嘅牟利企業涉及咗大量嘅人員，而呢啲人員當中大多數都有個共同目的－要令到任天堂繼續營運落去而且賺最多嘅錢，以保住佢哋自己份工；一個志願環保組織都係涉及咗大量嘅人員（包括義工等），目的係要（例如）為環保籌募最多嘅資金；一個賣白粉嘅犯罪組織都係涉及一班人員，而佢哋會合作達到一啲目的（賺錢同迴避法律嘅制裁）。

管理學有得集中於研究個體層面嘅現象，又有得由組織層面去睇嘢：管理學有得由個體嘅微觀層面去睇，分析一啲描述個別組織成員嘅屬性（同埋呢啲屬性會點樣影響成個組織嘅表現），好似係好常見嘅有關工作表現嘅研究噉，就會集中研究一間企業嘅個別員工嘅表現會受啲乜嘢因素影響，同埋啲員工嘅平均工作表現又會點樣影響個組織整體嘅表現－牟利嘅企業正路都會想自己啲員工有心機做嘢同表現好，所以佢哋啲管理層好多時會有興趣耖管理學期刊睇呢啲研究嘅結果；喺另一方而，管理學上嘅研究又可以係由宏觀層面去睇一啲描述緊成個組織嘅屬性，例如組織文化就係一個相當之多管理學者研究嘅課題，包含咗研究一個組織入面嘅成員普遍（例如）有幾信任管理層、有幾樂意同同事分享知識、以及有幾驚啲經理等等嘅因素，以及呢啲因素會點樣影響一個組織嘅表現。

 

亨利·菲悠嘅相

 

2010 年影到嘅李嘉誠；佢係李嘉誠基金會嘅主席。

 

喬布斯生前嘅相；佢可以話係蘋果公司最緊要嘅管理者。

五大功能

做管理嘅人喺一個組織當中擔當咗好多角色。對於「管理人員所擔當嘅角色」要點樣概念化嘅問題，管理學界有多個分類法。而根據 19 世紀尾嘅法國名工程師（兼管理學之父之一）嘅亨利·菲悠嘅諗法，「管理」嘅角色包含咗五大功能：

1. 計劃：決定一個組織將來應該發生乜嘢事；一個管理人員要能夠明確噉指出個組織嘅目的係啲乜，並且諗出一套能夠有效噉令個組織達到目的嘅行動方案。因為噉，管理人員要有能力想像未來會發生嘅事，並且按計劃左右個組織整體嘅決策。
2. 動員：確保個組織要達到佢嘅目的所需嘅人力同非人力資源都就位；一個管理人員要確保個組織嘅人力同非人力資源成一個有效率嘅結構，好似係幫每個職位揀啱用嘅人材，並且協助人員之間嘅溝通同確保佢哋曉運用個組織嘅非人力資源。
3. 指令：喺一個情況當中決定要點做，並且令到組織嘅成員去採取相應嘅行動；喺日常工作當中，管理人員要監督下屬做嘢，話俾佢哋知組織嘅目的係乜、以及激勵佢哋為呢啲目的工作，而且對待下屬嗰陣要符合組織嘅政策。
4. 協調：創造出一個個組織能夠通過佢嚟達到目的嘅結構；喺日常工作當中，個組織嘅人員彼此之間相處或者同個組織嘅非人力資源互動嗰陣不時會唔順暢，所以管理人員就要喺呢啲運作唔順暢嘅時候做調解。
5. 控制：檢查吓個組織喺達到目的上嘅進度；管理人員要知道個組織當中發生緊嘅事係咪合乎個組織嘅政策，要識搵出個組織係唔係順利噉離目的愈嚟愈近，並且喺呢啲嘢有問題嗰時要曉俾反應。

喺現實世界當中，稍為大少少嘅組織好少可會由一個人做嗮所有管理上嘅功能，而係將各種管理能力分開交俾唔同嘅人員嚟做。例如象徵性領袖呢個詞就係指啲有名無實嘅領袖，呢啲領袖負責做指令功能，用公開演講同埋第啲場合所展現嘅個人魅力嚟令到個組織嘅成員有動機做嘢，但將計劃同動員等方面嘅實權交俾組織嘅第啲成員處理。例子有現代嘅聯合王國：廿一世紀初嘅聯合王國係行君主立憲制嘅，即係話好似英女王噉嘅君主喺個國家嘅經濟同軍事等方面冇話事權（冇計劃同動員嘅能力），呢啲實權喺嗮英國首相手上，但係英國皇室成員依然間唔中就會出嚟演講激勵英國嘅民眾－喺一定程度上依然扮演住指令嘅功能。

管理層次

有返咁上下規模嘅組織嘅管理人員一般可以分做三個層次：第一層、中層同埋頂層嘅管理者。第一層嘅管理者係最基層嘅，負責直接噉接觸同管一啲唔會加入管理事務、但會直接加入生產嘅前線人員。第一層嘅管理者會叫主管、辦公室主管或者領班等等；中層嘅管理者包括所有處於第一層同頂層之間嘅管理人員，佢哋會管第一層管理者做嘢，但又會聽命於頂層管理者，可能嘅職銜包括咗部門主管、項目負責人或者部門經理呀噉；頂層嘅管理者負責做一啲影響成個組織嘅決策同制定個組織嘅走向，佢哋可能嘅職銜有主席或者董事呀噉。

第一層

最基層嘅管理者會負責管理工作團隊同埋啲前線員工。佢哋最大嘅特點係會同前線員工直接接觸：佢哋負責分配工作俾啲員工、喺個組織嘅日常運作當中引導啲員工、確保前線人員生產嘅質素、俾提議啲員工、同埋將前線人員嘅訴求話俾高層啲嘅管理者知。佢哋亦都因為成日同前線員工接觸而時不時會扮演做前線人員嘅模範。喺某啲類型嘅工作裏面，前線管理者亦都會幫手做啲前線員工做嘅嘢，例如係喺一啲規模細啲嘅餐廳入面，個經理好多時會喺忙嘅時段幫手招呼啲客。基層管理者嘅工作包括咗：

• 訓練新員工；
• 基本嘅監督；
• 激勵啲員工；
• 反映俾員工聽佢哋表現好唔好；
• 可能會幫手同啲員工度點樣晉升。

中層

中層管理包括咗管理成間分行或者成個部門嘅管理者。佢哋比較少同前線員工直接接觸，但係會指揮第一層嘅管理人員做嘢，而頂層嘅管理者問起責上嚟會問佢哋。中層嘅管理者會花時間做組織同指揮嘅功能，佢哋嘅角色強調執行上頭俾嘅有關成個組織嘅計劃同政策，會幫手將資訊由上頭傳到去個組織嘅基層嗰度，而最緊要嘅係，佢哋會激勵同引導第一層嘅管理者。中層管理通常都係喺啲規模有返咁上下大嘅組織當中先會出現，因為個組織實要有返咁上下大先至會需要有人喺第一層同頂層之間做中介。

中層管理者嘅功能包括咗：

• 設計同執行有效嘅資訊系統，等工作團隊內部同團隊之間嘅工作更有效率；
• 界定同監察工作團隊嘅表現；
• 解決團隊內部同埋團隊之間嘅問題；
• 用獎勵同懲罰嘅方式去鼓勵團隊合作。

頂層

頂層嘅管理者包括咗一啲管理成個組織嘅人，喺牟利組織當中包括咗行政總裁（CEO；粵拼：si1 ji1 ou1）同董事會等等。佢哋負責控制同監管成個組織嘅運作，會喺頂層嗰度設定策略計劃、公司政策、同埋為個組織嘅整體方向做決策。佢哋亦都可能會喺動員外界資源上扮演主導嘅角色（例如係同外界組織打交道）。呢啲頂層管理者要向股東、社會大眾、同埋監管企業嘅公共組織負責，亦都因為噉，頂層管理者好多時會做個組織對外界嘅「面」，令到大眾將佢同個組織聯想埋一齊。出名嘅例子有蘋果公司嘅創辦人兼（生前係）行政總裁喬布斯噉，佢喺好多場合之下都會出面代表蘋果公司向社會大眾講嘢，令到好多人一講起蘋果公司就會諗起佢。

董事會嘅成員（董事）主要係一啲對股東有受託人式責任嘅非行政人員，喺多數嘅牟利組織當中都係比較少參與個組織嘅日常運作。據估計，財富美國五百強入面嘅公司嘅董事平均每個禮拜用 4.4 個鐘頭做董事會相關嘅工作，而喺 2016 年佢哋平均年薪係 245,000 美元。董事負責設定組織嘅策略、做啲好似買起第啲公司等嘅重大決定，仲會幫手請或者炒啲頂層管理人員（包括咗行政總裁），而事實係，對於做行政總裁嘅人嚟講，「要點樣應對董事會」係一個大問題，有近期嘅調查顯示，行政總裁最常俾人插嘅係「唔識應對啲董事」。董事會有陣時又會直接同某啲員工接觸。

所需技能

無論等級，管理上所需嘅技能包括咗：

• 政治：用嚟建立權力基礎同埋社交網絡。
• 概念：要曉分析複雜嘅形勢。
• 人際：要曉同人溝通、激勵人、教導人、同埋代表人。
• 診斷：要曉喺一個情況當中乜嘢先係恰當嘅反應。
• 技術：要喺自己所屬嘅範疇嗰度有足夠嘅專業知識。
• 策略思考：要能夠為所管嘅團隊或者組織制定策略。

... 等等。

領導能力

 

「如果你嘅行動激勵其他人去有更多夢想、學習更多嘅嘢、做更多嘅嘢、同成就更多嘅嘢，噉你就算係一個領袖。」

第六任美國總統莊昆斯阿登斯

領導能力係管理學上一個重要課題。領導能力嘅定義有少少含糊，但大致上可以當做「一個人為身邊嘅人定義佢哋嘅現實」嘅能力：一個有領導能力嘅人能夠引領佢身邊嘅人，令佢身邊嘅人認同佢嘅理念同價值觀，並畀佢哋有動力做嘢（追求佢嘅理念同價值觀）；如果一個管理者有領導能力，往往會能夠令手下嘅員工認同公司追求嘅理想，例如係高品質嘅產品同服務，並且有動力工作；而一個冇領導能力嘅管理者多數會搞到佢啲手下做嘢嘅動力下降。所以一般嚟講，管理學者都認為領導能力係一個理想嘅管理者應有嘅技能，並且著力思考有冇方法可以提高一個人嘅領導能力。

根據管理學上嘅研究，以下嘅因素會影響一個人嘅領導能力：

• 自我肯定：有領導能力嘅人會有返咁上下（但唔會太高）自我肯定－冇自我肯定同自視過高嘅人傾向做唔成領袖；
• 自我意識：能夠觀察自己嘅行為、了解自己會有啲乜嘢偏見嘅人傾向做得成領袖；
• 智能：智商（IQ）同領導能力有一定嘅正相關；研究指，成功俾人推舉做領袖嘅人通常聰明過受領導者少少，但唔會超越受領導者太多－領袖智商高得滯嘅話，受領導者往往會開始驚個領袖難溝通；

... 等等。

決策

決策係管理者要做嘅另一樣必要工作。定義上，決策係指決策者由兩個或者以上嘅可能行動方案之中揀一個嘅過程。成功嘅管理者要為自己所管理嘅組織作出良好（幫到個組織達成目的）嘅決策，所以「要點先可以做到成功嘅決策」喺管理學上係一個受關注嘅問題。一般嚟講，廿一世紀初嘅管理學界主張理想嘅決策通常會大致跟從以下嘅步驟－呢個就係所謂嘅理性決策模型：

1. 認清自己嘅目的；
2. 按自己嘅目的，諗吓一個行動方案要點先算好（喺一般商業應用上，一個理想嘅行動方案係會為公司帶嚟高利潤嘅）；
3. 諗清楚自己手上有邊啲可能行動方案；
4. 按步驟 2 當中制定咗嘅基準，評估每個可能行動方案有幾好；
5. 揀最好嗰個選擇。

喺思考有關決策嘅嘢嗰陣，做管理嘅人可以運用認知科學領域嘅知識：人好少可會做得到完全嘅理性，佢哋喺做決策嗰時梗係會有些少偏誤；認知科學領域研究人嘅認知功能，對人喺思考嗰陣傾向有乜偏誤有所著墨，了解呢啲領域嘅知識有助管理者留意自己做決策嗰時可能有嘅偏誤，所以管理學者亦都興時不時睇吓呢類心理認知研究方面嘅發現。

例如廿一世紀初嘅管理學者頗為睇重心靈模型嘅研究：心靈模型指一個認知系統（例如係一個人腦）對世界嘅運作方式嘅理解；有管理學研究者就試過對一啲公司嘅內部文件做內容分析，指出組織決策者嘅心靈模型會影響一個組織改變同適應新環境嘅能力－「環境太平得滯」同「決策者留意唔到改變嘅需要」都會搞到一個組織嘅決策者留意唔到生意環境嘅變化，阻礙一個組織嘅學習同適應，往往會喺幾年後搞到個組織因為適應上嘅失敗而大受損失；類似嘅研究仲有喺實驗室入面做過，例如研究者俾受試者玩啲電腦模擬嘅產品生命週期管理遊戲，量度佢哋對遊戲世界嘅法則嘅理解（心靈模型），再睇吓呢啲理解同表現有乜關係，以及呢段關係會受乜嘢因素影響。

管理學可以按「管理個組織入面邊啲事務」分做唔同子領域：

績效管理

績效管理係一系列活動，涉及管理人員監督個組織嘅人員同工作團隊，確保佢哋真係有效噉達到緊個組織要佢哋做嘅作業。績效管理受制於個組織嘅大方向：做績效管理嘅人員必需知個組織要達到乜嘢目標同埋呢啲目標嘅必要條件，並且了解每個人員或者團隊要完成乜嘢工作先至可以幫個組織達到目標；佢哋要一路監察個組織入面嘅人員同工作團隊嘅工作表現，睇吓呢啲人員係咪順利搞得掂要做嘅工作，同埋喺某啲人員表現唔得嗰陣諗計幫佢哋提高表現。

舉個例子說明：想像家陣有一間美國嘅遊戲發行商（比如係藝電公司），佢哋嘅大目標係要令佢哋出嘅遊戲打入東亞市場（大方向），所以佢哋設下一個里程碑，想佢哋出啲遊戲喺東亞嘅銷量未來一年升 20%（達成目標嘅必要條件）；而喺咨詢過專業人員之後，佢哋知道如果要達到呢個目標，佢哋啲市場學工作團隊需要完成「研究吓東亞人對電子遊戲嘅品味」等嘅多份工作（知道佢哋啲團隊應該做乜），而啲管理人員跟手就要定時定候睇吓啲工作團隊係咪如期搞掂嗮呢啲作業（監督工作表現），同埋諗吓有冇計可以幫啲人員手提高佢哋嘅表現（喺表現唔得嗰時插手）。

績效管理涉及嘅工作包括咗：

• 計劃要做啲乜嘢工作，並且向員工講明要做乜；
• 監察啲員工嘅工作表現；
• 發展同提升員工做呢啲工作嘅能力；
• 量度員工嘅工作表現；
• 獎賞優秀嘅員工。

... 等等。

風險管理

風險管理係一系列形式化嘅程序，負責有系統噉搵出、分析、同應對喺做一個工作項目嗰陣所帶嘅風險，並且採取適當嘅措施消除風險，或者至少將風險減低至合理嘅水平。喺呢個定義當中，「風險」俾人界定為有機會發生、如果發生咗會對個組織造成負面影響嘅事件。做生意呢家嘢通常都或多或少噉會有啲風險喺入面，例如係啲架生受損或者俾人偷走等都算係風險嘅一部份。做風險管理嘅人要先諗吓最有可能發生嘅負面狀況有邊啲，再分析吓每個負面狀況發生嘅機會率，再做相應嘅措施嚟處理呢個風險。

舉個例子說明：想像家吓有一間香港嘅建築公司，佢受人委託要起一棟樓，香港喺亞熱帶地方，夏天成日都打風，打風可能會損毀棟樓，而如果棟樓受損，個客可能會唔老嚟，跟手走去唱衰佢哋間公司（諗吓最有可能發生嘅負面狀況有邊啲）；做風險管理嘅人要按照各種因素－例如係棟樓嘅位置－計吓如果打起風上嚟棟樓受損嘅機會率有幾高（分析吓每個負面狀況發生嘅機會率），再諗吓一啲計嚟減低呢個風險，例如係安排資源搵啲專業嘅建築師幫手度吓棟樓要點樣設計先可以令棟嘢受損嘅機率下降到合理水平（做相應嘅措施嚟處理呢個風險）。

風險管理涉及嘅工作包括咗：

• 做資料搜集；
• 用數學模型計吓每件可能嘅負面事件發生嘅機率；
• 計吓如果某件事件發生咗，會做成幾負面嘅效果；
• 諗吓有乜嘢方法可以令風險下降到合理水平。

... 等等。

應變管理

應變管理涉及管理人員引導個組織嘅員工同工作團隊，幫佢哋處理未來個組織嘅改革，確保個組織能夠順利達到佢哋嘅目標。做應變管理嘅人要諗吓個組織喺可見嘅未來會有啲乜嘢改革（例子有工作團隊嘅改組），並且諗吓每一個改革會引起啲乜嘢負面效應（例如係某啲員工可能一時之間適應唔嚟），而當呢啲改革真係發生嗰陣，應變管理人員就要負責諗計點樣幫個組織啲員工適應新環境。應變管理處理嘅主要嘅係人，會使用心理學等領域嘅知識幫個組織嘅員工應負改變。

應變管理嘅主要工作包括咗：

• 確保個組織做起改革嗰時能夠清楚噉俾員工知道改革嘅內容；
• 知道每一個改革需要涉及邊啲人員；
• 分析吓當一個改革推行咗之後會有啲乜嘢短期負面衝擊；
• 諗吓點樣應對呢啲衝擊。

... 等等。

財務管理

財務管理涉及管理人員幫手計劃、安排、同埋控制個組織嘅財務活動，例如係度吓間公司嘅資金要點樣分配，將普遍嘅管理原則應用落去對個組織嘅財政資源嘅管理上。任何類型嘅投資都一定會涉及資金，而一個組織嘅日常運作要係噉運用自己嘅資金－員工會要求人工、非人力資源要用錢維持...等等冚唪唥都要資金，所以「資金要點樣管理，先可以令個組織達到目標嘅機率最大化」自自然然係策略管理上嘅重要一環。

財務管理嘅主要工作包括咗：

• 知道目前個組織要做啲乜，並且確保做呢啲工作所需嘅資金都喺度；
• 確保股東都收嘅錢都啱數；
• 確保個組織嘅投資都係穩陣嘅－資金要投資落安全嘅投機活動上，有返咁上下回報率；
• 確保資金嘅運用最適化－喺攞到資金之後，財務管理人員要用最有效率嘅方式分配資金；
• 計劃一個合理嘅資本結構。

... 等等。

其他管理

• 通訊管理
• 創新管理
• 系統管理
• 人力資源管理

... 等等。

策略管理係廿一世紀管理學嘅一個重大課題，係稍為高層啲嘅管理人員都要起碼參與嘅一樣工作。策略管理指幫個組織度成個組織嘅大方向（策略），涉及班管理人員諗嗮成個組織有乜資源（包括人力同各種非人力資本）同個組織嘅整體目標，分析內在同外在環境，並且制定一套「要點樣做先可以有效運用手上嘅資源達到組織目標」，跟手再動員個組織嘅資源去執行呢套政策，途中要考慮自己手上嘅資源要分配，所以往往會用到經濟理論－有關資源分配嘅理論。

策略管理上嘅基本概念包括咗競爭優勢、核心能力、基本競爭策略同商業模式等等。

競爭優勢

 

競爭優勢係策略管理上最基本嘅概念之一，指令到一間公司成功噉喺競爭當中打低對手（攞到更大嘅市場佔有率）嘅因素。最簡單直接嘅競爭優勢係以（同對手相比）更平嘅價格提供更優質嘅貨品同服務，靠噉嚟吸引消費者買自己嘅貨品服務，從而令自己賺取到更大嘅利潤，而要達到呢種競爭優勢又有好多途徑，例如產品設計嘅工序會決定貨品服務嘅質素，因而會影響間公司嘅競爭優勢。

喺對競爭優勢嘅思考上，競爭優勢嘅可持續度係一個重要嘅問題；一個競爭優勢嘅可持續度係指個競爭優勢有幾容易維持，舉兩個例子說明：

• 想像而家某個先進國家 A 國，A 國國內有若干間公司生產緊汽車，而 A 國嘅鄰國 B 國工業啱啱起步，所以工人嘅人工（生產成本）明顯低過 A 國，於是其中一間 A 國汽車公司就將自己啲工廠搬嗮去 B 國，等自己可以用更低成本生產汽車，然後用平啲嘅價錢賣自己嗰啲質素上同競爭對手相約嘅汽車，得到一個競爭優勢，不過假如佢啲競爭對手喺搬廠上唔受限嘅話，呢個優勢維持唔到幾耐（可持續度低）－佢啲競爭對手大可以跟住就搬廠去 B 國，然後話咁快 A 國啲汽車公司就冚唪唥都以一樣嘅低價賣汽車；
• 想像而家有若干間遊戲開發商（開發遊戲嘅公司或者團隊），其中一個開發商（叫開發商 C），C 嘅團隊當中有拉爾夫呢一位天才遊戲設計師，拉爾夫能夠係噉設計出第啲遊戲設計師設計唔到嘅精彩遊戲，而且佢對 C 非常忠誠，冇興趣為 C 以外嘅遊戲開發商工作，噉 C 就有一個維持到好耐嘅競爭優勢（可持續度高）－ C 嘅競爭對手因為冇拉爾夫呢個天才，所以喺開發嘅遊戲嘅質素上差過 C，而且拉爾夫冇打算幫 C 以外嘅遊戲開發商做嘢，所以 C 嘅競爭優勢會維持一段長嘅時間。

核心能力

核心能力係指一間公司（同競爭對手相比）零舍擅長做嘅工作。公司之間喺專業知識、組織文化以及固有客源等各方面都唔同，一間公司嘅成員會喺生產嘅過程當中由呢啲嘢嗰度學習，令到唔同公司之間喺「成員擅長做啲乜」上有差異。如果有一間公司：

1. 零舍擅長做某啲工作（例：一間遊戲製作商開發射擊遊戲嘅經驗特別豐富，所以特別叻整射擊遊戲），
2. 呢啲能力唔係佢哋啲競爭對手能夠輕易噉模仿嘅（例：開發遊戲嘅經驗往往係要用數以年計嘅時間累積嘅），而且
3. 呢啲能力能夠為啲客提供更高質素嘅貨品服務－即係能夠提供競爭優勢（例：因為富有經驗，能夠開發更加好玩嘅射擊遊戲），

噉佢哋嘅呢啲能力就算係佢哋嘅核心能力。管理學上一般認為，一間公司喺做策略性嘅決定嗰陣，需要認清自己嘅核心能力，理解到邊啲情況自己有能耐打低競爭對手、邊啲情況自己會輸，而遇到後者嘅情況嗰時就需要退讓，用守勢減低損失。

基本競爭策略

基本競爭策略係由美國著名經濟學家米高波特提出嘅一個諗法。根據基本競爭策略，一間公司想要爭取競爭優勢，基本上只有三種策略：

• 成本領導性：指降低成本，務求有同類公司當中最低嘅成本；用呢種策略嘅公司一般係自己喺效率、規模或者經驗（睇經驗學習曲線）上優勝過對手；
• 差異化：指改變自己嘅產品，務求令到自己提供嘅貨品服務質素優越過競爭對手嘅，所以就算價格一樣都會有更多消費者肯買；
• 集中：指專化成淨係專攻市場當中嘅某一部份，例如由專門賣運動用品專化成專門賣足球用品，等自己喺生產足球用品嘅成本同質素都變得更有競爭力。

以上呢三種基本競爭策略可以想像成下圖噉嘅樣：

 

一般認為，三個基本競爭策略各有優劣：成本領導性同產品差異化都唔重視專化落市場嘅某一部份，但前者重視成本，後者重視質素，冇得成本優勢同質素優勢兼得；集中就係想成本優勢同質素優勢兼得，但就要犧牲公司嘅覆蓋面，而一旦集中選擇咗嗰個市場因為外在因素唔增長，就會令間公司喺擴張上受阻（例：足球嘅人氣唔上升，搞到足球用品嘅市場唔增長）。根據米高波特嘅建議，一間公司喺選擇基本競爭策略嗰陣必需要做取捨（睇埋機會成本），最理想係要淨係揀其中一種基本競爭策略，如果唔係就好容易三頭唔到岸。

商業模式

商業模式係指一間公司有關「要點樣達到自己目的」（正路係賺取高嘅利潤）嘅詳細策略計劃。一個商業模式會講明以下嘅資訊：

• 間公司要提供乜嘢貨品或者服務，以及呢啲貨品服務對客嚟講有乜經濟價值（會令客肯俾錢買呢啲貨品服務）；
• 間公司主打乜嘢市場；
• 間公司有乜競爭對手；
• 間公司嘅核心能力係乜，可以得到乜嘢競爭優勢；
• 間公司要提供做到呢啲嘢需要用到啲乜嘢資源，以及間公司要點確保呢啲資源嘅供應（可以睇價值鏈）；

...等等。

舉個例說明，想像家陣有個遊戲開發者要諗佢哋嘅商業模式，佢哋要度嘅有以下嘅嘢：

• 佢哋要開發一隻遊戲 ${\displaystyle x}$ ，呢隻遊戲能夠滿足乜嘢需求；
• ${\displaystyle x}$  主要吸引乜嘢類型（性別、年齡、喜好）嘅玩家；
• 喺經已存在喺市面上嘅遊戲或者好快會出嘅遊戲當中，有邊啲有可能係 ${\displaystyle x}$  嘅替代品；
• 佢哋有啲乜嘢專長，而呢點會令 ${\displaystyle x}$  同競爭對手喺設計上有邊啲唔同嘅地方，令 ${\displaystyle x}$  具有獨特價值；
• 要開發 ${\displaystyle x}$  需要乜嘢人員，請呢啲人員要使幾多錢同第啲資源，呢啲資源要點樣籌募；

...等等。

 

管理理論

管理學同第啲商學或者社科領域一樣，會用到理論。現代嘅理論性管理學研究會好似科學噉，追求想要解釋所研究嘅現象，會跟從科學方法嚟去研究佢哋所研究嘅現象，即係話：

1. 根據手上已知係真嘅事實，諗一啲理論出嚟（「基於我哋經已觀察到嘅呢啲現象，我推測啲現象背後嘅法則係噉噉噉，令組織有呢啲噉嘅行為」），呢啲理論可多時係用數學模型嘅方式表達嘅（可以睇吓抽象化）；
2. 跟手就靠邏輯性嘅思考，去諗吓呢柞理論會做點樣嘅預測，而呢啲預測就係所謂嘅假說（「如果我提倡嘅呢個理論係真確嘅，理應會...」）；
3. 然後就做實驗同觀察嚟攞數據，驗證吓個理論嘅預測係咪真確（「如果我呢個理論係真確，呢個實驗理應會得出某個某個結果，而個實際嘅實驗結果係...」）；
4. 如果數據顯示，個理論係做唔到準確嘅預測嘅話，就要一係根據攞到嘅數據睇吓個理論要點改先可以令佢做到準確啲嘅預測，一係就要諗新理論取代舊理論。

上述嘅過程會係噉不斷重複，直至手上嘅理論做得到完全準確嘅預測為止－於是乎管理學就有持續嘅發展，做到愈嚟愈準嘅預測。理論要做嘅嘢唔淨只係要包含數據同假說，仲需要將呢啲資訊整合埋一齊，講明唔同變數之間嘅因果關係，一個強嘅理論能夠用數量少嘅起因變數，解釋呢柞起因變數點樣引致第啲變數改變，從而解釋所描述嘅現象。

喺研究方法上，管理學似社會科學：同自然科學唔同嘅係，管理學同埋社會科學好少可用會實驗嘅方法嚟做研究；實驗要求個研究者將研究對象擺喺一個受控制嘅環境（好似係實驗室）下作出操控，再睇吓啲操控會造成乜嘢變化，呢樣嘢喺管理學入面好難做到－因為管理學研究嘅係人類嘅組織。於是管理學者比較傾向用第啲方法量度佢哋要研究嘅變數，例如係做問卷調查、喺現實嘅組織當中進行觀察、或者訪問組織嘅管理者呀噉，量度咗佢哋要研究嘅變數之後，個研究者會用統計分析計吓搵到嘅結果支唔支持佢哋啲理論。

研究課題

管理學嘅學術研究常涉及嘅變數包括咗以下呢啲：

個人層面

指一啲描述個體成員嘅屬性：

• 工作表現
• 工作滿足感
• 工作壓力
• 員工動機
• 職場欺凌
• ... 等等。

組織層面

指一啲描述成個組織整體嘅屬性：

• 營業額
• 組織文化
• 組織發展
• ... 等等。

中介層面

又有啲管理學研究會集中睇一個組織入面由多個成員組成、但係又唔係包括嗮成個組織嘅群體（用行話講嘅話，呢啲群體由多個一個成員組成，並且係「組織成員」嘅子集），好似係工作團隊噉：

• 群體動力學
• 團隊有效性
• 團隊目的
• ... 等等。

多層分析

自從 1990 年代開始，管理學界嘅學者開始重視多層面嘅分析，喺做統計分析嗰陣嘗試一次過計唔同層面嘅變數之間嘅關係，將唔同層面嘅變數用同一個數學模型連繫埋一齊。例如等級線性模型就係一種做多層分析嗰時好有用嘅統計分析方法。搵個簡單嘅例子說明，呢種分析方法會用類似以下噉嘅數學方程式將唔同層面嘅變數擺入去同一條式入面（對於以下嗰啲行話點解，可以睇埋統計學）：

${\displaystyle Y_{ij}=\beta _{0j}+\beta _{1j}X_{ij}+\beta _{2}G_{j}+e_{ij}}$ 

• ${\displaystyle Y_{ij}}$  係一個喺層面 1 嘅應變數（細階 ${\displaystyle i}$  指個體，而細階 ${\displaystyle j}$  指個群體）；
• ${\displaystyle X_{ij}}$  係一個喺層面 1 嘅自變數；
• ${\displaystyle G_{j}}$  係一個喺層面 2（群體層面）嘅自變數，佢嘅數值對於屬同一個群體嘅成員嚟講都係一樣嘅；
• ${\displaystyle \beta _{0j}}$  係個根；
• 淨低嗰啲 ${\displaystyle \beta }$  係迴歸系數，反映咗佢掕住嗰個自變數有幾能夠預測個應變數嘅數值。
• ${\displaystyle e_{ij}}$  係指誤差。

呢條式用文字解釋係噉：${\displaystyle Y_{ij}}$  嘅數值係受 ${\displaystyle X_{ij}}$  同 ${\displaystyle G_{j}}$  呢兩個變數嘅數值影響嘅，而如果用呢個變數嘅數值去預測 ${\displaystyle Y_{ij}}$  嘅數值嘅話，誤差平均會係 ${\displaystyle e_{ij}}$ 。而家想像：

• ${\displaystyle Y_{ij}}$  係「工作團隊 ${\displaystyle j}$  當中員工 ${\displaystyle i}$  嘅工作表現」，
• ${\displaystyle X_{ij}}$  係「工作團隊 ${\displaystyle j}$  當中員工 ${\displaystyle i}$  嘅身體健康」，而
• ${\displaystyle G_{j}}$  係「工作團隊 ${\displaystyle j}$  嘅領袖嘅領導能力」－

跟手個研究者就要去收數據，做統計分析，用數據估計 ${\displaystyle \beta _{1j}}$  同 ${\displaystyle \beta _{2}}$  嘅數值。如果數據反映（例如）一個員工嘅身體健康比起佢所屬嘅團隊嘅領袖嘅領導能力更加能夠預測佢嘅工作表現（簡單啲講就係 ${\displaystyle \beta _{1j}>\beta _{2}}$ ）嘅話，噉佢就發現咗啲有用嘅嘢（對一個組織嚟講，對提高員工表現嚟講，確保員工健康比起領導能力更重要），可以將佢嘅研究結果喺管理學期刊嗰度公佈。近期啲嘅等級線性模型研究仲有用更先進嘅統計模型。

 

火箭發射控制室嘅人員；呢班人員有精細嘅分工，每個負責監控架火箭嘅某一部份。

現代嘅管理學理論史可以分做以下呢啲時期：

• 科學化管理係人類史上第一個有系統噉研究人類工作嘅理論架構，喺 1910 年代興起。科學化管理將每個員工想像成有某啲特定責任嘅個體，強調分工能夠有效噉令到每個員工用少啲時間資源嚟生產同一份量嘅產出，令效率提升。科學化管理建基於以下呢幾條基本原則：
  1. 每個員工集中研究佢要做嘅工作，提升自己喺嗰方面嘅技能；
  2. 每一種工作都因為噉而有咗某啲標準嘅做法；
  3. 管理人員按照每個員工嘅專長分配工作，並且喺適當嘅時候提供訓練機會；
  4. 每一種工作都有一個評估表現嘅方法，而管理人員要按照表現嚟獎勵做得好嘅員工。
  • 科學化管理喺廿世紀早期算係好革命性嘅創新，令到員工由「樣樣工作都做啲」變成專化噉做某啲特定工作（睇埋學習曲線），亦都導致咗管理人員開始留意唔同員工嘅專長。某程度上，科學化管理令到管理學開始將員工視為獨一無二嘅個體，令到員工訓練變成一樣個人化嘅嘢。
• 行政管理論係 1920 年代興起嘅管理學理論架構。行政管理論建基於科學化管理之上，開始講究領導能力－包括個組織嘅官僚組織以及分層結構，除咗分工之外，仲強調管理人員嘅權威、紀律、員工利益同組織利益之間嘅配合、以及員工士氣等等。行政管理論係科學化管理嘅一個延伸，主張除咗分工之外，管理學仲應該要考慮管理人員同員工之間嘅人際關係，令到管理學唔淨只考慮經濟學上嘅原則，仲會考慮一啲類似現代心理學上嘅原理，呢一點喺當時視員工為「工作機器」嘅社會可以話係相當有革命性。
• 行為管理論係 1930 年代興起嘅管理理論架構。行為管理論將「管理學」界定為透過人嚟完成工作，集中研究管理人員同員工之間嘅溝通，亦都引進咗衝突調解嘅概念。行為管理論仲全盤噉開始引入心理學上嘅研究，運用人本主義心理學上嘅理論分析點樣喺工作環境當中滿足組織員工嘅心理需要（例如係佢哋對安全同埋自我提升等嘅需要）提升佢哋嘅工作動機。當中需求層次理論就描述咗人類唔同嘅心理需求，包括咗人類對安全嘅渴望，令到工作安全開始成為一個重要議題。總體嚟講，行為管理論對人類心理需求嘅著重令到管理學變得更加以人為本。
• 管理科學係喺二戰之後所誕生嘅管理學理論，特色係重視運用統計學等計量方法。管理科學強調產品同服務嘅質素，而管理科學嘅主要學者愛德華·淡明號稱品質管理之父。品質管理重視確保一個組織嘅產品服務喺質素上劃一，而且要喺資源容許嘅情況下有咁高得咁高。管理科學運用統計學上嘅技巧，做抽樣同計統計分析嚟評估一個組織嘅產品服務嘅質素，而呢種做法一路去到 1990 年代都仲係管理學上最具影響力嘅做事方法。
• 組織環境論研究係喺 1960 年代起始嘅。呢個理論將組織環境概念化成某啲內在力量同外在力量嘅合成體，而呢啲力量決定咗管理人員手頭上有嘅資源同埋佢哋應該點樣運用呢啲資源，而管理人員嘅決策又會調返轉頭影響個組織周圍嘅環境，所以組織環境論開創咗好多管理學上嘅跨領域研究－例如係管理學者同生態學家合作研究一個組織同生態環境之間嘅互動，而呢啲研究仲引起咗管理學對可持續性呢個諗頭嘅關注，開始思考點樣先至可以令一個組織唔會破壞自己周圍嘅環境，確保未來嘅人類能夠喺一個理想嘅環境下繁衍。

以下係一啲管理學嘅參考書：

亦有一啲理論性質嘅文：

篇文引用咗嘅行話或者專有名詞，英文版本如下：

篇文引用咗以下呢啲文獻同網頁：