分工fan1 gung1(英文:division of labor)指一柞經濟個體各自集中生產自己擅長生產嘅貨品或者服務。
考慮以下嘅例子,想像家陣有間工廠,會生產槍同牛油;跟住嗰間廠隔籬開咗另一間都係生產槍同牛油嘅廠,但兩間廠條 PPF 唔同:如果 A 廠要生產多 10 嚿牛油就要放棄生產少 10 支槍,而 B 廠(例如因為啲工人嘅專長同 A 廠嘅唔同)要生產多 10 嚿牛油就需要放棄生產成 50 支槍-喺呢個情況下,B 廠生產牛油嘅機會成本會大過 A 廠嘅好多,所以 B 廠比起 A 廠會更加有誘因集中於生產槍;同時,A 廠相比之下會比較有誘因集中去生產牛油。即係話 A 廠喺生產牛油上有比較優勢(comparative advantage),而 B 廠就喺生產槍上有比較優勢。而如果 A 廠同 B 廠開始各自集中生產自己擅長生產嘅貨品,就形成咗一個分工嘅局勢。
A 廠 | B 廠 | |
---|---|---|
生產多 10 嚿牛油嘅機會成本 | 10 支槍 | 50 支槍 |
全力生產牛油所得 | 500 嚿牛油 | 1,000 嚿牛油 |
全力生產牛油所失 | 500 支槍 | 5,000 支槍 |
雖然呢個例子就噉望落好似係 A 廠比較擅長做生產噉,但係 B 廠依然可能係有絕對優勢(absolute advantage)嘅。舉個例子說明,如果兩間廠都用嗮全力生產牛油嘅話,(可能)A 廠會生產到 500 嚿牛油,而 B 廠會生產到 1,000 嚿牛油,但係喺全力生產牛油嘅過程當中,A 廠只係放棄咗 500 支槍,而 B 廠就會放棄咗成 5,000 支槍-B 廠集中生產牛油嘅機會成本高 A 廠嘅一大截,所以 B 廠雖然喺生產兩樣貨品上都勁過 A 廠,但佢依然比較有誘因集中生產槍。
This article uses material from the Wikipedia 粵語 article 分工, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.