Euro

Disambiguazzione – "€" manne aqquà. Ce ste cirche 'u simbole d'a valute, 'ndruche Simbole de ll'euro.

Disambiguazzione – Ce ste cirche otre segnefecate d'u termine Euro, 'ndruche Euro (disambigue).

Euro
Nome d'u luèche: Euro Ευρώ (EL) Евро (BG)
Simbole de ll'euro	turnise da 1 €
Codece ISO 4217:	EUR
State:	20 Zona euro: Austrie, Belge, Cipre, Croazie, Estonie, Finlandie, Frange, Germanie, Grecie, Irlanne, Itaglie, Lettonie, Lituanie, Lussemburghe, Malta, Pajèsere Vasce, Purtugalle, Slovacchie, Slovenie, Spagne. Otre pajèsere: Akrotiri e Dhekelia (Regne Aunìte), Andorre, Kosovo, Monache, Mondegnure, San Marine, Vaticane.
Simbole:	€
Fraziune:	100 cendesime
Turnise:	1, 2, 5, 10, 20, 50 c; 1, 2 €
Banconote:	5, 10, 20, 50, 100, 200, 500 €
Entità emittende:	Banghe Cendrale Europee
N'gorse da 'u:	01/01/2002 (n'vigore da 'u 01/01/1999)
Tasse de cange: 27/04/2011	1 EUR = 121,1445 ¥
Elenghe valute ISO 4217 - Pruggette Numismateche

L'euro (EUR o €) jè 'u ternise comune ufficiale de ll'Aunìone europèe (jndr'ô soje 'nzieme) e quèdde uneche pe' le diciassette state membre ca ôsce a die pigghiane parte a ll'UEM (Aunìone economeche e monetarie), ca sonde:

Austrie, Belge, Croazie, Cipre, Estonie, Finlandie, Frange, Germanie, Grecie, Irlanne, Itaglie, Lettonie, Lussemburghe, Malta, Pajèsere Vasce, Purtugalle, Slovacchie, Slovenie e Spagne. L'urteme state de quidde ca honne adottate l'euro jè state l'Estonie jndr'ô 2011.

'U comblesse de quiste pajèsere, ditte 'nformalmènde Eurozone, cunde cchiù de 320 miglione de crestiáne; pigghianne n'consideraziune pure chidde pajèsere terze ca ausane divise legate a ll'euro, 'u ternise uneche 'nderesse derettamènde cchiù de 480 miglione de crestiáne jndre totte 'u munne.

N'aggiunde a le membre d'a zone euro, 'u ternise uneche europee jè ausate pure jndre otre sèje state Europee, nnande ad accorde 'ndernazionale o nnande a ll'adozione unilaterale.

Ttrè microstate, ca sonde 'a Cetate d'u Vaticane, 'u Prengepate de Monache e San Marine honne adottate l'euro nnande a le preesistènde condiziune de aunìone monetarie cu pajèsere membre d'a UE.

Inoltre, pure 'u prengepate de Andorre ha adottate unilateralmènde l'euro, me tène 'ngorse cu l'Aunìone europèe trattative, ca non ge sonde angore spicciate, ca parene auguale a quèdde de le ttrè microstate citate d'apprime.

Pe' spiccià, 'u Mondegnure ed 'u Kosovo honne adottate unilateralmènde l'euro.

L'euro jè ternise ufficiale pure jndre alcune departimènde d'oltremare frangesi accume:

Mayotte (Afriche), La Réunion (Afriche), Guadalupa (Nordameriche), Martinica (Nordameriche), Saint-Pierre e Miquelon (Nordameriche), Guyana frangese (Sudameriche).

'U debutte de ll'euro sus a lle mercate finanziarie resale ad 'u 1999, mendre 'a circolazione monetarie ha effettivamènde avute inizie 'u 1º scennàre 2002 jndr'à lle dodice pajèsere de ll'Aunìone ca pe' prime honne adottate 'u nuève ternise.

Quèste ternise jè scucchiáte jndre 100 cendesime.

L'euro jè amministrate d'a Banghe cendrale europee, cu sede a Francoforte sus 'u Meno, e da 'u Sisteme europee de lle banghe cendrale; 'u prime organisme jè responsabbele uneche de le polìteche monetarie comune, mendre fatije cu 'u seconne pe' quanne arreguarde 'u conie ed 'u spannamènde de banconote e turnise jndr'à lle state membre.

Pe approfondimende, 'ndruche le vôsce Fatte lènguisteche relative a ll'euro e Simbole de ll'euro.

 

'U nome euro derive da le lettere iniziale d'a parole Europe, e jè state scacchiate da 'u Conziglie europee de Madrid d'u 1995 ccu pigghie 'u puèste d'a sigle ECU (da ll'acronime 'nglise European Currency Unit, o "Aunìtate de cunde europee"), fine a chidde mumènde ausate jndr'à lle trattate. 'U nome avève ddà essere semblice, uneche e 'nvariabbele. Assaje pajèsere onne scacchiate ccu ause normalmènde 'u plurale o 'u partitive d'u nome, pure ce 'u sostandìve "euro" sus 'a cartemonète fàce vedè bèlle bèlle ca 'u nome non g'à ddà tenè 'u plurale.

'A denominazione ecu, innecate jndr'à ll'artichele 3a d'u trattate de Maastricht, ha state lassate perdere pe' assaje raggione lènguisteche. Tenève 'nu sense n'nglise, 'a lènga jndr'à quale jève espresse, e jndr'ô frangese, piccè 'a parole écu segnefeche scude, ca jève 'nu andìche turnise d'a Frange. 'A denominazione, accussì, non ge tenève nisciune richiame pe' le otre pajèsere. Jè nasciùte nnande 'u "prubblème d'u uéve tedesche": le tedesche avèvene a chiamà 'nu ecu ein Ecu, ca parève auguale a eine Kuh, ce stè segnefeche, appunde, 'nu uéve.

'U codece 'ndernazionale a ttrè lettere (n'base ad ô standard ISO 4217) de ll'euro jè EUR. Jè state disegnate pure 'nu simbole (glife) speciale pe' l'euro (€). Nnannde ca 'nu sondagge pubbleche avève restrette 'a scelte a dò, ha state 'a Commissiune europee a fàce 'u scacchiamènde finale. 'U vingitore ère ispirate d'a lettere greche epsilon (ε), accussì cumme a 'na versione stilizzate d'a lettere "E".

L'euro jè rappresendate jndr'ô set de carattere Unicode (esadecimale 20AC o decimale 8364, codece mnemoneche HTML: €) accussì cumme jndr'à lle versiune aggiornate de le tradiziunale set de carattere latine. Le naziunde occidentale honne ddà passà da ll'ISO 8859-1 (Latin 1) a ll'ISO 8859-15 (Latin 9) o, mègghie angore, a UTF-8 pe' pote' rappresendà quiste carattere.

'U "nome uneche" tène n'realtate dò variande: 'a prime arreguarde 'a lènga greche, 'a seconne 'a lènga bulgare. 'A Grecie ha ottenute subbete de potè ccu chiame 'u ternise uneche Ευρώ jndre carattere elleniche. 'A Bulgarie ha ottenute duranne le negoziaziune pe' 'u Trattate de Lisbone de potè ccu chiame 'u ternise uneche Евро, jndre carattere cirilleche.

Pe approfondimende, 'ndruche le vôsce Ternise euro e Banconote euro.

Ternise

Da 'u 2002 sonde n'circolazione ternise metalleche cu uètte deverse valore:

• ternise da 1 cent, 2 cent e 5 cent, de culure rame, in acciaie recuperte de rame;
• ternise da 10 cent, 20 cent e 50 cent, de culure oro, in ore nordeche;
• ternise da 1 euro e 2 euro, bimetalleche, de culure argende/ore.

Ogne ternise jè caratterizzate da 'na vanne comune a totte le pajèsere ca honne adottate l'euro. L'effigie sus a ll'otre vanne jè de combetenze sije de le singole state ca honne adottate l'euro sije de quidde ca pòtene ccu conie ternise grazzie a le accorde bilaterale cu ll'Aunìone europèe tramite Itaglie e Frange, ca sonde San Marine, Cetate d'u Vaticane e Prengepate de Monache. Accussì sonde n'circolazione 160 deverse ternise, ce non ge se conzidere quèdde commemorative. A conglusione de le accorde 'mbrà ll'Aunìone europèe e Andorra, pure 'u prengepate hàve a conià proprie ternise jndre euro.

'A Finlandie ha scacchiate de non ge quagghià e de non ge fàce ciircolà le ternise da 1 e 2 cendesime, fatte eccezzione de piccele quandetate pe' 'u collezionisme. Da 'u 2004 pure le Pajèsere Vasce non ge sckaffàne cchiiù n'circolazione ternise da 1 e 2 cendesime; comungue quèdde angore n'circolazione ôsce a die, pure ce sonde picche ausate, tènene angore 'nu corse legale. Ciò nonostande, le ternise de quiste valore coniate jndre otre pajèsere condinuane naturalmènde ccu tène 'nu valore legale a lle 'nderne de totte l'Eurozone.

L'Europe jndr'ô munne			L'Europe cumme 'na alleanze de State			L'Europe senze frondiere
1 cent	2 cent	5 cent	10 cent	20 cent	50 cent	1 €	2 €

Bangonote

Le bangonote euro, a differenze de le ternise, sonde caratterezzate da 'nu aspette uneche valide jndre totte 'a zone euro e sonde disponibbele jndre sette tagle, ognune cu 'nu culure e dimenziune deverse: 5, 10, 20, 50, 100, 200 e 500 euro.

Ogne taglie tène 'na particolare temateche architettoneche e storeche jndr'ô cundeste europee; inoltre le stile architettoneche sonde ordenate cronologgecamènde: cchiù crisce le 'mborte d'a banconote e cchiù l'architetture rappresendate avrà ddà essere muderne. Pe' ogne temateche, 'a vanne de nnande d'a banconote tène de le porte o de le fenestre, mendre 'u rrète raffigure de le ponde.

Conziderate le granne 'mborte ca le banconote rappresendane ed 'a putenzialitate de ll'euro de potè essere ausate cumme valute de reserve 'ndernazionale, jndr'à fase de progettaziune jè state scacchiate ccu appleche sofistecate tecnologgije anti-condraffaziune.

Ôsce a die ogne banche cendrale de ll'Aunìone monetarie europee jè responzabbele pe' 'a stambe de une o dò taglie.

banconote

Valore	Taglie	Culure	Architetture	Periode	Nnanze	Rrète
5 €	120 mm x 62 mm	Grigge	Classeche	prime d'u V sèchele
10 €	127 mm x 67 mm	Russe	Romaneche	XI-XII sèchele
20 €	133 mm x 72 mm	Blu	Gotiche	XIII-XIV sèchele
50 €	140 mm x 77 mm	Arange	Renascimendale	XV-XVI sèchele
100 €	147 mm x 82 mm	Verde	Barocco e Rococò	XVII-XVIII sèchele
200 €	153 mm x 82 mm	Ocra	Art Nouveau	XIX-XX sèchele
500 €	160 mm x 82 mm	Viole	Muderne	XX-XXI sèchele
Valore	Taglie	Culure	Architetture	Periode	Nnanze	Rrète

Reate de condraffaziune

L'Artichele 460 relative ad 'a Condraffaziune de carte filigranate jndr'à ll'ause pe' 'u quagghiamènde de carte de pubbleche credite o de valore de bolle d'u Codece Penale tagliàne dìce ca:

Tuttavie 'u punde 3 de ll'artichele 2 d'a Decisione d'a Banghe Cendrale Europèe 4/2003 deroghe l'artichele sus 'u delitte de condraffaziune, 'a cui pene pòte cangià da state a state, e determine alcune case particulare jndre cui 'a riproduziune jè conzendite.

Pe approfondimende, 'ndruche 'a vôsce Storie d'a trasùte 'ngommerce de ll'euro.

Le fase de transizione da le ternise d'u luèche a ll'euro sonde state scacchiate da le disposizioni d'u Trattate de Maastricht d'u 1992 relative ad 'a ccrejaziune de ll'Aunìone economeche e monetarie.

Pe' tenè 'u jusse ccu partecipe ad 'u nuève ternise, le state membre honne avùte a respettà le seguende criterie, 'mbormalmènde ditte parametre de Maastricht:

• 'nu deficit auguale o cchiù vasce d'u 3% d'u prodotte 'nderne lorde;
• 'nu rapporte debite/PIL cchiù vasce d'u 60%;
• 'nu tasse de 'nflaziune ca non g'ète cchiù ìrte de 1,5 punde percenduale respette a quidde medie de le ttrè state membre a cchiù vasce 'nflaziune;
• tasse de 'nderesse a longhe termine ca non ge sonde cchiù ìrte de 2 punde percenduale respette ad 'a medie de le ttrè state membre a cchiù vasce 'nflaziune;
• appartenenze pe' almene 'nu biennie ad 'u Sisteme monetarie europee.

Jndr'à fase de accettazione, sonde state combrese pure le state membre le cui parametre avèvene demostrate 'a tendenze a potè ccu retrase jndr'ô medie periode a lle 'nderne de le criterie stabbelite da 'u Trattate. Particolarmènde, a ll'Itaglie e ad 'u Belge ha state permesse de adottà subbète l'euro pure jndr'à presenzede 'nu rapporte debite/PIL assaje cchiù ìrte d'u 60%.

'Mbrà lle pajèsere ca avèvene chieste l'adesione ad 'u ternise uneche fine da 'u soje inizzie, 'a Grecie ère l'uneche ca non ge respettave nisciune de le critere stabbelite; fu comungue ammesse dò anne cchù nnande, 'u 1º scennàre 2001, ed 'a trasùte 'ngommerce fiseche d'a nuève valute jndr'ô paise avvenne condemboraneamènde respette a lle otre unnece pajèsere.

Le tasse de cange 'mbrà lle varie divise naziunale e l'euro fùrene determinate da 'u Conziglie europee n'base a lle lòre valore sus 'u mercate ad 'u 31 decemmre 1998, accussì ca 'nu ECU (European Currency Unit, Aunìtate de valute europee) fosse auguale a 'nu euro. Jidde non ge fùrene stabbelite jndre 'na date precedente pe' 'u motive d'a combosizione particulare de ll'ECU, 'u quale jève 'na aunitate de cunde ca depenneve da 'nu paniere de valute ca combrennevane pure quèdde ca, cumme 'a sterline 'nglise, non g'onne ad avè fatte parte de ll'euro.

Jndr'à Itaglie l'euro ha state sperimendate pe' 'a prime vote jndr'à lle comune de Fiesole e Pontassieve pe' sèje mise accumenzanne da 'u 1º ottommre 1999.

 

Pe approfondimende, 'ndruche 'a vôsce Zone euro.

Ad 'u 2011 le state membre ca pigghiane parte a ll'euro sonde diciassette: le 'nzieme de quèste naziune jè assaje spesse definite "Eurozone", o "Eurolandie".

State	Adozione de ll'euro 1º scennàre
Austria	1999
Bèlge
Finlandie
Frange
Germanie
Irlanne
Itaglie
Lussemburgo
Pajèsere Vasce
Purtugalle
Spagne
Grecie	2001
Slovenia	2007
Cipre	2008
Malta
Slovacchie	2009
Estonie	2011
Lettonie	2014
Lituanie	2015
Croazie	2023

Ad 'u 2011, dice de le vindesette state membre de ll'Aunìone europèe non g'onne adottane angore l'euro cumme ternise ufficiale. Jndr'à fattespecie, 'a Danemarche ed 'u Regne Aunìte tènene 'u benefice de 'na clausole ca permette lòre ccu mandene a pe' 'nu timbe 'ndefinite le proprie valute naziunale; pure 'a Svezie, ca fàce parte de ll'UE da 'u 1995, stè condinue ccu ause 'a corone svedese.

Regne Aunìte e Danemarche (nnande a 'nu referendum) tènene 'na speciale deroghe ad 'u trattate de Maastricht ca le lasse fore da ll'obbleghe formale de pigghie parte ad 'a divise comune; 'u Paise scandinave ha annungiate 'u 22 novèmmre 2008 'nu referendum endre 'u 2011 pe' trasè jndr'à ll'euro. Totte le otre, ad 'u condrarie, sonde destinate ccu trase jndr'à zone euro quanne le parametre macroeconomeche stabbelite da 'u trattate permetteranne 'a trasute.

Nnande ce hé spicciate l'apposite iter procedurale, pure l'Estonie ha pigghiate l'Euro cumme ternise, accumenzanne da 'u 1º scennàre 2011.

Allarijamènde d'a zone euro

Pe approfondimende, 'ndruche 'a vôsce Allarijamènde d'a zone euro.

L'euro jè trasùte 'ngommerce pe' 'a prime vote 'u 1º scennàre 1999 jndre unnece de qudde ca jèvene le quinnece state membre de ll'Aunìone; a quiste se aggiunse 'a Grecie, ca jè retrasute jndr'à lle parametre economeche rechieste jndr'ô 2000 e fu fatte trasè jndr'à ll'eurozone 'u 1º scennàre 2001. Jndre quiste prime dodece state l'euro hé trasute ufficialmènde 'ngommerce 'u 1º scennàre 2002 sutte forme de ternise e banconote.

Jndr'ô 2006 'nu tredicesime state, 'a Slovenie, trasùte jndrà ll'Aunìone jndr'ô 2004, fàce vedè ccu tène le parametre economece necessarie pe' l'adesione ad 'a divise comune e fu fatte trasè jndr'à zone euro 'u 1º scennàre 2007. Picche sciùrne nnande, 'u 15 scennàre, 'u tallere slovene fu ufficialmènde conziderate fore curse.

Cu 'na procedure auguale, jndr'ô 2007 Malta e Cipro, grazzie a lle proprie parametre macroeconomeche soddesfacende, sonde state a lòre vote fatte trasè jndr'à zone euro. Le 'ndroduzione d'a divise comune jndr'à lle dò isole mediterranee jè avvenute 'u 1º scennàre 2008.

 

Da 'u 1º scennàre 2009 'u sedicesime state ca ha adottate cumme ternise l'euro jè 'a Slovacchie, seguite 'u 1º scennàre 2011 da ll'Estonie, seguite 'u 1º scennàre 2014 'a Lettonie, 2015 'a Lituanie, 2023 'a Croazie.

Pe approfondimende, 'ndruche le vôsce Eurogruppe e SEPA.

Le questione cullegate strittamènde a ll'aunìone economeche e monetarie sonde discusse da 'nu organisme fatte apposte chiamate Eurogruppe, ca se reaunisce 'mbormalmènde prime de lle riunione de ll'Ecofin e a cui pigghiane parte sule le state membre de ll'Eurozone.

Jndre timbe recende jè pure trasùte in vigore l'Aree uneche de le pajamènde in euro, ditte pure SEPA, iniziative ccrejète ccu armonizze jndr'à ll'aree le bonifeche, le 'ngasse e l'ause de le carte, facenne devendà sembre cchiù efficiende, sicure e conveniende 'u mercate elettroneche.

• ECU
• Sisteme Monetarie Europee
• Aunìone Economeche e Monetarie
• Aree uneche de le pajamènde in euro
• EuroBillTracker
• Cooperazione raffurzate
• Opt-out jndr'à ll'Aunìone europee
• Eurizzazione
• Storie de lle 'ndegrazione europee
• Valute de ll'Aunìone Europèe

Precedente aunìone monetarie

• Aunìone monetarie latine
• Aunìone monetarie scandinave

•   Uicchizionarie tène il lemma di dizionario «Euro»
•   Uicchimedie Commons tène files multimediale sus Euro

Banghe cendrale de ll'Eurozone

• Banghe Cendrale Europee
• Austrie: Oesterreichische Nationalbank
• Belge: Nationale Bank van België / Banque Nationale de Belgique
• Cipre: Κεντρική Τράπεζα της Κύπρου
• Estonie: Eesti Pank
• Finlandie: Suomen Pankki
• Frange: Banque de France
• Germanie: Deutsche Bundesbank
• Grecie: Τράπεζα της Ελλάδος
• Irlanne: Central Bank of Ireland
• Itaglie: Banca d'Italia
• Lettonie: Latvijas Banka
• Lituanie: Lietuvos Bankas
• Lussemburghe: Banque Centrale du Luxembourg
• Malta: Central Bank of Malta
• Pajèsere Vasce: De Nederlandsche Bank
• Purtugalle: Banco de Portugal
• Slovacchie: Národná banka Slovenska
• Slovenie: Banka Slovenije
• Spagne: Banco de España

Otre banghe cendrale

• Bulgarie: Българска Народна Банка
• Danemarche: Danmarks Nationalbank
• Pulonie: Narodowy Bank Polski
• Regne Aunìte: Bank of England
• Repubbleche Ceche: Česká Národní Banka
• Romanie: Banca Naţională a României
• Svezie: Sveriges Riksbank
• Ungherie: Magyar Nemzeti Bank

Otre

• 'U ternise uneche scè suse e vàsce, cange euro-dollare da 'u 1º scennàre 1999 ad 'u 28 febbrare 2008
• Euro (Banconote) (DE) (EN)