I Oriela na Aoriela na Ôriela (Uriel, Auriel, Oriel) dia iray amin' ny arkanjely voatonona ao amin' ny lovantsofin' ny raby taorian' ny sesitany sy amin' ny lovantsofina kristiana sasany.
Fantatra tsara izy ao amin' ny lovantsofina ôrtôdôksa rosiana sy ao amin' ny katôlisismam-bahoaka (izay samy iheverana azy ho anisan' ny arikanjely lehibe fito) ary ekena ao amin' ny Fiangonana Anglikana ho arkanjely fahefatra. Fantatra tsara koa izy ao amin' ny literatiora esôterika eorôpeana tamin' ny Andro Antenatenany. I Oriel dia fantatra koa amin' ny maha tompon' ny fahalalana sy arkanjelin' ny fahendrena azy.
Amin' ny teny hebreo izy dia atao hoe אוּרִיאֵל / ʾŪrīʾēl izay midika hoe "Andriamanitra no lelafoko"; amin' ny teny grika Οὐριήλ / Oúriēl; amin' ny teny kôpta ⲟⲩⲣⲓⲏⲗ / Ouriēl; amin' ny teny italiana Uriele; amin' ny teny geezy sy amharika: ዑራኤል /ʿUraʾēl na ዑርኤል /ʿUriʾēl. amin' ny teny arabo إسرافيل / Israfil.
Ao amin' ny asasoratra apôkrifa sy kabalistika ary amin' ny ôkoltisma, i Uriel na Auriel dia nampitoviana (na nafangaro) amin' i Oriala (Urial), Noriela (Nuriel), Oriana (Uryan), Jeremiela (Jeremiel), Vretila (Vretil), Sariela (Sariel), Soriela (Suriel), Poroela (Puruel), Fanoela (Phanuel), Jakôba (Jakob), Azraela (Azrael) ary Rafaela (Rafael).
Ao amin' ny Bokin' ny Tsiambaratelon' i Joany, izay asasoratra gnôstika tany am-boalohany, i Oriela dia napetraka hifehy ireo demony izay manampy an' i Ialdabaota hamorona an' i Adama.
Uriel, Auriel na Oriel (lahy) / Urielle, Eurielle na Orielle (vavy) dia anarana noraisin' ny kolontsaina bretôna seltika, noho ny fisian' i Urielle (taonjato faha-7), rahavavin' ny mpanjaka bretôna Judicael, izay nampalaza ilay anarana.
This article uses material from the Wikipedia Malagasy article Oriela (anjely), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Mitondra ny lisansa CC BY-SA 4.0 ny votoatiny raha tsy misy zava-kafa ambara. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Malagasy (DUHOCTRUNGQUOC.VN) is an independent company and has no affiliation with Wiki Foundation.