Tastatur
Eng Tastatur oder e Clavier ass een Apparat oder Deel vun engem Apparat mat Tasten, déi de Benotzer dréckt fir eppes ze steieren.
Haut sinn déi meescht Tastaturen elektronesch Tastaturen, obwuel et och mechanesch oder pneumatesch Tastature gëtt.
Vill technesch Apparater hunn eng Tastatur, dorënner Computeren, Schreifmaschinnen, Telecommanden, Telefonen an Handyen.
Och Museksinstrumenter mat Tasten, de sougenannten Tasteninstrumenter, hunn eng Tastatur, déi meescht awer Klaviatur genannt gëtt.
Eng Computertastatur huet am Verglach mat enger Schreifmaschinnentastatur méi Tasten, mat deenen e Computer gesteiert gëtt. Je no Land a Sprooch sinn d'Tasten op der Computertastatur aanescht arrangéiert a beschrëft. Déi Gängest Lay-oute sinn a Westeuropa QWETRY, QWERTZ an AZERTY. Op enger Computertastatur si Buschtawen, Zuelen an aner Symboler, déi "Characters" oder Zeeche genannt ginn. D'Computertastatur ass de geleefegen Input-Apparat bei Computeren.
D'Schreiwe mat enger Computertastatur nennt een "Tippen". Wann de Benotzer eng Tast dréckt, schéckt d'Tastatur e Signal un de Computer fir ëm ze soen, wéi ee Buschtaf, Zuel oder Symbol um Ecran soll gewise ginn. De Computer weist dat Zeechen dann um Bildschierm, generell do wou den Textcursor ass. Vum technesche Standpunkt hier gläicht eng Computertastatur also enger Computermaus, der Telecommande an der Manette vun enger Spillkonsol.
Nieft Tasten, déi d'Agab vun Zeechen erlaben, sinn op der Tastatur awer och speziell Tasten, déi e Symbol änere kënnen (mat der Shift-Tast kann een zum Beispill Groussbuschtawe schreiwen) oder dem Computer e speziellen Uerder kënne ginn (wéi zum Beispill d'Kontrolltast Ctrl).
Déi verschidde Computerbetribssystemer benotzen ënnerschiddlech Spezialtasten, oder benotze s'ënnerschiddlech. Spezial Befeeler kënnen och mam Drécke vun enger Kombinatioun vun Tasten aktivéiert ginn. Dat ass dann eng Ofkierzung ("Shortcut" oder "Raccourci"). Bei Microsoft Windows si bekannt Ofkierzungen zum Beispill Ctrl + C, fir Text oder eng Datei ze kopéieren, Ctrl + V fir dat Kopéiert ze pechen, a Ctrl + F fir e bestëmmt Wuert an engem Dokument oder enger Websäit ze fannen.
Eng Computertastatur kann iwwer e Kabel mat engem Computer verbonne sinn, oder kabellos iwwer Bluetooth.
Kuckt och
| Commons: Tastaturen – Biller, Videoen oder Audiodateien |
| Commons: Computertastaturen – Biller, Videoen oder Audiodateien |
This article uses material from the Wikipedia Lëtzebuergesch article Tastatur, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Den Text ass ënner der CC BY-SA 4.0 disponibel wann et net anescht uginn ass. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Lëtzebuergesch (DUHOCTRUNGQUOC.VN) is an independent company and has no affiliation with Wiki Foundation.