مەلا ئەحمەدی قازی پێنجوێنی (١٩٢٠ لە پێنجوێن، عێراق – ١٢ی ئابی ١٩٨٣ لە سلێمانی، عێراق) مەلا و شاعیر و نووسەرێکی باشووری کوردستان بوو.
ئەحمەد کوڕی مەلا محەممەد کوڕی کەریم، لە ھۆزی وەستا حوسەینە کە یەکێکە لە ھۆزە ناودار و سەرەکییەکانی شاری پێنجوێنی سەر بە پارێزگای سلێمانی. لە ساڵی ١٩٢٠ زایینی بەرامبەر ١٣٣٨ کۆچیی لە پێنجوێن چاوی بە دونیا ھەڵھێناوە، ھەر لە تەمەنی منداڵی دایکی کۆچیی دواییی دەکات. سەرەتای خوێندنی لە خزمەت باوکی دەستپێکردووە و پاشان بە یاسای ئەو سەردەمەی کوردستان بۆ فتێیی و خوێندن عێراق و ئێران گەڕاوە. لە سلێمانی، قەرەداغ، سەنگاو و بیارە و چەند شوێنێکی تر لە باشوور کوردستان خوێندوویەتی و ئینجا ڕۆیشتووە بۆ ڕۆژھەڵاتی کوردستان و لە ناوچەکانی بانە، سەقز، موکریان، مەھاباد، شنۆ و لاجان خوێندوویەتی، وە لە مەدرەسەی «مەلا سەی حەسەن واژی» ماوەتەوە، لە پاش تەواوکردنی خوێندن گەڕاوەتەوە پێنجوێن و لە خزمەت مامۆستا مەلا عارف، مودەڕیسی مزگەوتی پاشای پێنجوێن ئیجازەی مەلایەتی وەرگرتووە و لە مزگەوتی باوکی (مزگەوتی قازی) بووەتە مودەڕیس و پێشنوێژ. لە ساڵی ١٩٥٩ بۆ ماوەی دوو ساڵ لە شاری سنە و مەریوان ماوەتەوە و پاشان گەڕاوەتەوە پێنجوێن، تا ساڵی ١٩٦٥ لە پێنجوێن ماوەتەوە و دواجار ڕووی کردووەتە شاری سلێمانی و لە مزگەوتی (سەید ئەحمەدی نەقیب) بووە بە پێشنوێژ و کاتەکانی بە خواناسی و ئامۆژگاری و نووسین و ھەڵبەست بەسەربردووە.
مەلا ئەحمەد پەیوەندیی بە تەسەوفەوە ھەبووە و لە خزمەت شێخ عەلائەددینی بیارە تەمەسوکی بە تەریقەتی نەقشبەندی کردووە و لە پاش لە دونیا دەرچوونی شێخ عەلائەددین تەمەسوکی کردووە بە شێخ عوسمان سۆزێکی تایبەتی بۆ ئەم موڕشیدەی ھەبووە.
مەلا ئەحمەد لە شەوی ھەینیی ١٢ی ئابی ١٩٨٣ لە شاری سلێمانی لە گۆڕستانی گردی سەیوان لە پەنای گۆڕی شێخ مارفی نۆدێ سەری نایەوە.
مەلا ئەحمەدی قازی پێنجوێنی لە ڤەژینبوکس
ئەم ژیاننامە وتارە کۆلکەیەکە. دەتوانیت بە فراوانکردنی یارمەتیی ویکیپیدیا بدەیت. |
This article uses material from the Wikipedia Soranî / کوردی article مەلا ئەحمەدی قازی پێنجوێنی, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ناوەرۆک لەبەردەستە لەژێر CC BY-SA 4.0دا، مەگەر پێچەوانەی وترابێ. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Soranî / کوردی (DUHOCTRUNGQUOC.VN) is an independent company and has no affiliation with Wiki Foundation.