ৰীতা চৌধুৰী: অসমীয়া কবি আৰু ঔপন্যাসিক

ৰীতা চৌধুৰীয়ে উজনি হাফলং প্ৰাথমিক বিদ্যালয়ত প্ৰাথমিক শিক্ষা গ্ৰহণ কৰাৰ পিছত মাৰ্ঘেৰিটা উচ্চতৰ মাধ্যমিক বিদ্যালয়ত পঢ়ে। ১৯৮০ চনত চৌধুৰীৰ পৰিয়াল গুৱাহাটীলৈ উঠি আহে। তেখেতে অসমীয়া আৰু ৰাজনীতি বিজ্ঞান দুয়োটাতে স্নাতক উপাধি লাভ কৰে। তদুপৰি তেখেতে আইনৰ এল.এল.বি. গ্ৰহণ কৰাৰ লগতে ৰাজনীতি বিজ্ঞানত পি.এইচ.ডি.ও কৰে।

অসম আন্দোলনৰ সময়ছোৱাত তেওঁ অসম জাতীয়তাবাদী যুৱ ছাত্ৰ পৰিষদৰ লগত জড়িত আছিল। আন্দোলনৰ কাৰ্য-কলাপৰ বাবে তেখেতে গুৱাহাটীত দুবাৰ আৰু ডিব্ৰুগড়ত তিনিবাৰ কাৰাবাস খাটিছিল।

চৌধুৰীৰ জীৱনৰ প্ৰথমখন উপন্যাস আছিল ১৯৮১ চনত লিখা "অবিৰত যাত্ৰা"। ইয়াৰ বাবে তেওঁ অসম সাহিত্য সভাই আয়োজন কৰা উপন্যাসৰ পাণ্ডুলিপি প্ৰতিযোগিতাত প্ৰথম স্থান অধিকাৰ কৰে। অসম আন্দোলনৰ সময়ত আত্মগোপন কৰি থকা অৱস্থাত তেখেতে এই উপন্যাসখন লিখি উলিয়াইছিল। ২০০১-২০০২ বৰ্ষত তেওঁ "আধাৰশিলা"ৰ সম্পাদকো আছিল। ২০০৫ চনত তেওঁৰ "দেও লাংখুই উপন্যাসখন প্ৰকাশিত হয় আৰু সেইখনৰ বাবেই ২০০৮ চনত সাহিত্য অকাডেমী বঁটা লাভ কৰে । তাৰ পিছত চৌধুৰীৰ ২০১০ চনত প্ৰকাশিত উপন্যাস "মাকামে" বিপুল জনপ্ৰিয়তা অৰ্জন কৰে। ১৯৬২ চনৰ চীন-ভাৰত যুদ্ধৰ সময়ত তিনিচুকীয়া জিলাৰ মাকুমৰ পৰা বন্দী কৰি ৰাজস্থানলৈ লৈ যোৱা ১৫০০ জন চীনা-ভাৰতীয় লোকৰ দুখ-দুৰ্দশাৰ কাহিনী ইয়াত বৰ্ণিত হৈছে। ইতিমধ্যে ইয়াৰ আধাৰত চলচ্চিত্ৰৰ পৰিকল্পনাও কৰা হৈছে।

উপন্যাস

 

1. অবিৰত যাত্ৰা (১৯৮১)
2. তীৰ্থভূমি (১৯৮৮)
3. মহা জীৱনৰ আধাৰশিলা (১৯৯৩)
4. নয়না, তৰালী, সুজাতা (১৯৯৬)
5. পপীয়া তৰাৰ সাধু (১৯৯৮)
6. ৰাগ মালকোশ (১৯৯৯)
7. জল পদ্ম (১৯৯৯)
8. হৃদয় নিৰুপায় (২০০৩)
9. দেও লাংখুই (২০০৫)
10. মাকাম (২০১০)
11. এই সময় সেই সময়
12. ৰাজীৱ ঈশ্বৰ
13. জাহ্নবী
14. মায়াবৃত্ত (২০১২)
15. বিভ্ৰান্ত বাস্তৱ
16. মৰে অসম, জীয়ে কোন (২০২১)

কবিতা

1. সুদূৰ নক্ষত্ৰ (১৯৮৯)
2. বনৰীয়া বতাহৰ সুঁহুৰি (১৯৯৬)
3. অলপ পোহৰ অলপ আন্ধাৰ (১৯৯৭)
4. বগা মাটিৰ তুলসী (১৯৯৯)

• অসম সাহিত্য সভা বঁটা, ১৯৮১
• কলাগুৰু বিষ্ণুপ্ৰসাদ ৰাভা বঁটা, ২০০৬ (দেও লাংখুই)
• সাহিত্য অকাডেমি বঁটা, ২০০৮ (দেও লাংখুই)
• অসম উপত্যকা সাহিত্য বঁটা (২০১৭)