China-Indië Skermutselings Van 2020

Sedert 5 Mei 2020 is Chinese en Indiese soldate betrokke by aggressiewe optrede en skermutselings op plekke langs die Chinees-Indiese grens. Die magte het op 16 Junie 2020 kontak gemaak wat gelei het tot die dood van 20 Indiese soldate (waaronder 'n offisier). Die Indiese media het beweer dat ten minste 43 Chinese soldate ook dood of ernstig beseer is (insluitend die dood van 'n offisier). Voorvalle het naby die Pangongmeer in Ladakh en die Naku La-pas in Sikkim plaasgevind. Daarbenewens is daar direkte konfrontasies op plekke in die oostelike Ladakh, langs die Lyn van Werklike Kontrole (Line of Actual Control - LAC), wat bestaan sedert die Chinees-Indiese oorlog van 1962. Onlangs het die Chinese magte beswaar gemaak teen die Indiese padkonstruksie naby die Indiese Galwanriviervallei.

Te midde van die spanning het Indië die gebied versterk met 12 000 addisionele werkers wat sou help met die voltooiing van die ontwikkeling van Indiese infrastruktuur. Die eerste trein met meer as 1 600 werkers het op 14 Junie 2020 van Udhampur na Jharkhand vertrek, waarvandaan hulle verder gaan om vir Indië se Border Roads Organisation (BRO) naby die Indies-Chinese grens te werk. Kundiges het gesê dat die spanning volg op Chinese reaksie op die konstruksiewerk aan die Darbuk – Shyok – DBO Pad-infrastruktuurprojek in Ladakh. Die Chinese het ook hul infrastruktuurontwikkeling in hierdie betwiste grensstreke uitgebrei.

Die herroeping van die spesiale status van Jammu en Kasjmir in Augustus 2019 deur die Indiese regering het die Chinese ook bekommer. Indië en China het egter albei volgehou dat daar genoeg bilaterale meganismes is om die situasie deur stille diplomasie op te los. Na die konflik in die Galwanevallei op 15 Junie het talle Indiese regeringsamptenare gesê dat grensspanning nie die handel tussen Indië en China sal beïnvloed nie, ondanks enkele Indiese veldtogte om Chinese produkte te boikot.

•   Hierdie artikel is in sy geheel of gedeeltelik uit die Engelse Wiki vertaal.