馬來西亞獨立日

1946年，英國將新加坡由馬來亞劃分出嚟，成為直轄殖民地。同時宣佈組織一個馬來亞聯邦計劃。但事與願違，呢項計劃因為削弱咗馬來統治者嘅地位，亦將公民權賦予畀華人同其他少數民族，而畀馬來人強烈反對。面對馬來族怨聲載道，英國最終放棄平等公民權計劃，喺1946年6月成立嘅馬來亞聯邦之後喺1948年正式解散，取而代之係1948年2月1號協議成立嘅馬來亞聯合邦，而當時嘅馬來亞聯合邦由英王委任高級專員統治。

為咗擺脫英國殖民統治以爭取獨立，巫統、馬華公會同國大黨三黨組成咗聯盟。1954年5月，東姑阿都拉曼率領敦拉薩同陳東海三人代表團聯袂赴英國倫敦談判民選自治政府事宜，隨後喺1955年7月27號嘅首屆聯合邦立法議會選舉中，聯盟成功贏得52席中嘅51席，喺英國監管下組成自治政府議會。1956年1月18號至2月8號，首相東姑阿都拉曼率領代表團到英國談判達成協議，英國政府同意俾畀馬來亞聯合邦喺1957年8月31號獨立，並設立里德委員會草擬馬來亞聯合邦憲法。1956年2月20號，呢個代表團由英國倫敦翻返去馬來亞，喺馬六甲怡力嘅英雄草場（馬來話：Dataran Pahlawan）宣布獨立日期。1957年5月9號，東姑阿都拉曼、阿都拉薩、翁毓麟同埋善班丹組成獨立代表團再去倫敦談判獨立事宜。

 

1957年8月31號半夜12點，英國國旗正式降下，馬來亞國旗徐徐升起。喺馬來統治者、英國女王代表格樓斯特同人民嘅見證下，東姑阿都拉曼喺吉隆坡默迪卡體育場帶領國人高叫7聲「默迪卡」（馬來話：Merdeka，意思指獨立），正式宣佈馬來亞聯合邦獨立。東姑阿都拉曼檢閱300名聯盟青年組成嘅儀仗隊同各個州屬嘅12個聯盟代表。而聯盟代表沙頓氏向東姑掛上花環，並尊稱佢做「獨立之父」。

馬來西亞成立後，延續將8月31號定為馬來西亞嘅國慶日。每年馬來西亞國慶日都以熱鬧嘅方式慶祝，以感謝抗戰英雄奮力保衛國土。

2018年8月31號係馬來西亞61周年國慶日，亦係希望聯盟喺2018年第14屆馬來西亞下議院選舉勝出上台後嘅首次國慶日。首相馬哈迪發表國慶獻詞時指呢次國慶日係馬來西亞「再次建國」，亦可以叫做「再次獨立」。

 

根據憲法第160條第2條規定，馬來西亞獨立日係1957年8月31號，而唔係1963年9月16號。