仆街

喺廣東話之中，「仆街」原本係黑社會嘅用語，係指仆臥喺街上，死喺路邊冇人收屍，暗指眾叛親離或者親信俾人誅晒。現今都好少人知道佢嘅原意，於是「仆街」一詞開始降級，變為強調情感之用，更有人按字面就噉解為跌倒、仆親。

有指正寫係扑街，其中「扑」唔係「撲」簡化字；亦有考證話寫成踣街至啱；兩個嘅發音同意義都啱路數，不過極少人採用；正寫存疑。另外有粵語「曲街」、「福佳」同扒街及國語「不該」及英文「PK」、「HiHi／Hi Hi」同「poor guy」等避諱代稱。

而家嚟講，仆街一詞喺實際應用嗰陣主要會有四種意義：

1. 指陷入絕境：今次仆街啦！（呢鑊麻煩囉！）
2. 狠狠咁鬧人：仆街啦你！（去死啦！）
3. 作名詞用，指特定嘅人：你係一條仆街。（你係一個衰人）
4. 作形容詞：佢好仆街囉！（佢好賤）
5. 發洩用：仆你/佢個街！（等同「豈有此理」、「頂你／佢個肺」、「你去死啦」）

以下進一步介紹下唔同詞型嘅運用：

• 作為名詞，多數係指一啲品德好差或者做咗壞事嘅人。例句：

1. 你個仆街吖！重爭我十蚊幾時還呀？（直頭用仆街當咗係對方個名，用嚟強烈咁表現出唔還錢呢種品行係唔要得嘅）

• 作為動詞，多數會係啲黑心狠毒嘅咒罵。例句：

1. 叫你做少少嘢都唔掂，哎你去仆街啦！（呢句說話強烈咁表達對某人做嘢嘅效率唔滿意，直頭想佢快啲去死）

• 作為形容詞，多數係指單嘢好麻煩好難處理，或者形容好衰嘅人。例句：

1. 嗰個仆街老細成日喺度指東指西！我唔撈啦！（帶出呢個人認為有個咁衰嘅老細咁樣對自己，已經唔想再幫佢打工）
2. 單嘢搞到咁仆街，點收科呀？（即係件事搞到咁複雜麻煩，點樣去收拾殘局好呢？）

其他用法

仆親／跌倒

仆街可以泛指跌倒，例如：

• 一九八二年九月，戴卓爾夫人喺北京同鄧小平開完會後，喺人民大會堂前面條樓梯仆街（有人會寫成「仆階」，即係仆咗落階梯）。

唔好運

仆街可以指自己或者其他人嘅運氣唔好。例如：

• 我今次仆街啦！

等於「我呢鑊衰咗啦！」

• 仆佢個臭街／仆佢個臭花街

等於「頂佢個肺」、「豈有此理！」。「佢」字可以泛指任何嘢，包括運氣。「臭」字同「臭花」係助語詞。

諧音詞

PK

英文「PK」嘅常見意思有決戰／毆鬥，亦都可以代表足球射十二碼（Penalty Kick）。

不過因為有時為咗唔想咁粗俗，就搵仆街英文拼音－"POOK GAI" 嘅縮寫：「PK」來代替，用法其實同仆街係一樣。例子：

• 今次個計劃P咗K啦！（又可以咁樣講：今次個計劃PK咗啦！）

即係話：今次呢個計劃衰咗囉。

• 你條PK仔終於捨得返嚟啦咩？

即係「你個衰仔終於捨得返嚟啦咩？」。因為係取代用嘅詞語，聽落比較溫和，可以用喺比較熟嘅朋友身上，口中雖然好唔滿意，但又帶出少少親切同掛念嘅味道。

• 今次PK喇！

即係「今次仆街喇！」

Poor Guy

英文「Poor Guy」照譯就係窮人，但有時因場合唔方便講仆街或PK，或會用「Poor Guy」代替。好似：嗰條Poor Guy好狗呀！

不該

用國語讀不該，聽落似用粵語講嘅「仆街」，黃毓民做香港立法會議員時，曾經喺開會時用國語講好多次「不該」，疑似有此意味。

曲街

以「曲街」代替「仆街」原本係佛山一帶嘅粵語南番順方言嘅避諱講法，後嚟開始喺香港嘅網上討論區廣泛咁用，通常係用嚟做避開俾討論區過濾河蟹嘅替代詞。

福佳

改編歌《福佳始終有你》令諧音詞「福佳」廣為人知。

扒街

將「仆街」讀歪些少就係扒街（paa4*1 gaai1），字面意思差唔多。