八號烈風或暴風信號

8），亦有人叫八號波或者八號風球，係香港嘅熱帶氣旋警告信號。佢有四個方向，分別係東北、東南、西南同埋西北。上一級嘅信號係九號烈風或暴風風力增強信號，落一級係三號強風信號。

八號烈風或暴風信號各方向嘅信號形狀

西北

西南

東北

東南

八號烈風或暴風信號，意思係香港近海平面而家或者預計會普遍受烈風或暴風由信號所示方向吹襲，持續風速達每小時63至117公里，陣風更可能超過每小時180公里，而且風勢可能持續。

由1884年開始，香港天文台已經懸掛鼓形、倒三角形、圓形及三角形信號警告居民烈風將會吹襲香港，呢個就係而家八號烈風或暴風信號嘅前身。1917年，開始改用2號至5號信號，2號至5號分別代表烈風將會由北、南、東或西四個方向吹襲香港。1931年，改為以5號至8號分別代表來自西北、西南、東北或東南四個方向吹襲香港嘅烈風。為咗唔好令到公眾混淆，由1973年1月1號開始，5號至8號風球分別由8號西北、8號西南、8號東北及8號東南四個信號代替，直到而家 。

喺2007年開始，發八號由以前只係參考維多利亞港嘅風速，變成參考香港其中八個測風站，包括啟德、青衣、長洲、沙田、濕地公園、打鼓嶺、赤鱲角同西貢。只要多過一半測風站錄得或預料錄得嘅風速有烈風程度，而且風勢可能持續，就會發出相應嘅熱帶氣旋警告信號。

最早八號

颱風利奧，喺1999年5月2號13:30發出，嚮1999年5月2號17:30改發三號強風信號。

最遲八號

歷來最遲發出嘅八號信號係1939年己卯年颱風，喺11月23號16點25分至19點15分懸掛。二戰後最遲則係1972年嘅颱風柏美娜，喺11月8號15點15分至11月9號05點15分懸掛。

最長八號

颱風瑪麗，喺1960年6月6號21:40懸掛八號東北烈風或暴風信號，1960年6月8號09:15懸掛八號東南烈風或暴風信號，1960年6月9號01:07懸掛九號烈風或暴風增強信號，03:30改掛十號颶風信號，12:40改掛八號西南烈風或暴風信號，最後16:30取消。於改掛九號烈風或暴風增強信號前，無間斷連續發咗五十一個鐘頭二十七分鐘八號。

最遠八號

• 用發出嗰陣計同埋最接近香港距離計係2021年熱帶風暴獅子山，最接近香港距離為500公里。
• 用取消嗰陣計係2021年熱帶風暴獅子山，由八號東南信號改發三號信號嗰陣離香港成660公里。