林子祥(粵拼:lam4 zi2 coeng4;George Lam,1947年10月12號—),花名阿Lam,係香港創作男歌手同埋演員。
林子祥 | |
---|---|
男藝人 | |
英文名 | George lam |
花名 | 阿Lam |
國籍 | 中國(香港) |
出世 | 英屬香港 | 1947年10月12號
配偶 | 吳正元(1980年結婚;1994年離婚) 葉蒨文(1996年結婚) |
活躍年代 | 1976年至今 |
唱片公司 | 香港華納唱片(1983-1995) 波麗佳音(1995-1998) |
網站 | www |
佢作過好多歌,而嗰啲歌好多都稱得上係經典,好似《分分鐘需要你》、《在水中央》等。
林子祥祖籍廣東新會,喺香港出世,係香港樂壇最傑出嘅歌手之一。佢而家嘅老婆係葉蒨文,佢個仔係歌手林德信,係佢同前妻所生。2010年入選全球華人音樂殿堂華語金曲獎「30年經典評選」,獲評為香港樂壇最強音。佢除咗有廣闊嘅音域之外,亦具備獨一無二冇得比嘅演繹方法。
佢有動力強勁的「天生奇喉」,音域非常之闊。佢天生有一副極具衝擊力同爆破力嘅嗓音,換句話說即係歌喉特別「嗆」,幾乎係跟唔到。林子祥有一個男中音應有嘅全部,又喺高音區延伸上去一大截,可以唱到高音區都比唔上佢嘅飽滿有力。佢嘅高音區極限曾經去到 E5 或 F5(比中央C 高八度)。一般歌手都係用假音拉上去,有啲有實力歌手即使係用真音拉到高音區,嗓音都會變得尖細單調,好難好似林子祥噉樣即使將高音拉到極限都依然充滿氣勢。
林子祥讀過德信學校、拔萃男書院(喺該校選修法文)及英國多佛貴族學院(Dover College),據悉林子祥未成為歌手之前喺美國係一位網球教練;學生時期組織過樂隊,1976年推出首張英文專輯《Lam》,其後推出過多張廣東專輯。佢亦拍過多部電影,包括《投奔怒海》、《貓頭鷹與小飛象》、《三人世界》等。1983年,佢憑電影《投奔怒海》中嘅精湛演出,獲提名第二屆香港電影金像獎最佳男主角。亦曾經喺無綫電視同汪明荃合作拍攝《不是冤家不聚頭》、《四季情》等電視劇集。佢作風低調,有「歌隱」之名,畀人沉默寡言嘅感覺,最令人印象深刻就係佢1976年開始留嘅鬚。
1980年,佢憑《在水中央》同埋《分分鐘需要你》兩首歌喺第三屆十大中文金曲頒獎音樂會連攞兩個金曲獎,成為當年嘅大贏家,奠定佢天王巨星嘅地位。
1981年,再憑改編歌《三人行》而為人熟悉。(改編自美國1960年代紅極一時嘅民謠組合Peter, Paul and Mary經典歌《The unicorn song》)
1986年,憑電影《最愛》主題曲《最愛是誰》奪得《香港電影金像獎》最佳原創歌曲,自此佢成為樂壇頒獎禮嘅常客。
1994年舉行嘅香港電台第十七屆《十大中文金曲頒獎音樂會》,林子祥獲頒「香港樂壇最高榮譽──金針獎」。2003年,林子祥獲得CASH音樂成就大獎,係首位唱作人得到呢個殊榮。
林子祥係創作歌手,識得彈結他同埋鋼琴。佢作過多首名曲,包括《分分鐘需要你》、《幾段情歌》、《海市蜃樓》、《在水中央》、《追憶》、《誰能明白我》、《這一個夜》、《敢愛敢做》、《真的漢子》、《似夢迷離》等。此外佢亦多次作出創新突破嘅嘗試。1985年林子祥名曲《每一個晚上》,正係由兩首中西樂曲(安德魯·勞埃德·韋伯創作嘅音樂劇《貓》嘅樂曲《Growltiger's Last Stand》同埋黃自為白居易《花非花》譜曲嘅同名作品)拼合而成,而不着痕跡,渾然天成。同年,佢將二十首當時得令嘅流行作品,以高超嘅編曲技巧組織起來,做出《十分十二寸》呢首經典串燒歌,可謂前無古人,更牽起一片串燒歌熱潮,後來周潤發、朱咪咪、古巨基亦用過類似形式製作串燒歌。呢兩首歌都得到當年年終樂壇頒獎禮嘅評審賞識,林子祥憑前者獲頒1985年度十大中文金曲金曲獎,後者獲頒1985年度十大勁歌金曲金曲獎。
2013年,佢為無綫電視劇集《衝上雲霄II》創作主題曲,八十年代嘅曲風同唱腔,初時顯得同套劇格格不入而引致劣評如潮,民意紛紛要求用返第一輯嘅《歲月如歌》。但冇幾耐,好多觀眾喺無綫電視討論區反映聽多幾次首歌之後就覺得好好聽,所以首歌好定唔好重未有定論。
綜觀整個八十年代,佢23首歌曲登上香港電台中文歌曲龍虎榜冠軍位置,僅次於譚詠麟嘅28首。佢亦係眾多演藝界人士嘅偶像或最喜愛歌手,包括譚詠麟、梅艷芳、張國榮、黃耀明、劉德華、李克勤、張學友、陳奕迅、黎明、側田、張敬軒、徐小鳳、黎小田、顧嘉輝、杜麗莎、鍾鎮濤、詹天文、許冠傑等等。
This article uses material from the Wikipedia 粵語 article 林子祥, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.