飛蛾

飛蛾
一隻公嘅帝王尤加利蛾 Opodiphthera eucalypti
物種分類
界 動物界 Animalia 門 節足動物門 Arthropoda 綱 昆蟲綱 Insecta 目 鱗翅目 Lepidoptera 亞目 (Subordo): 異角亞目 Heterocera

飛蛾係完全變態嘅昆蟲，多數飛蛾物種嘅生命歷程如下：一隻大咗肚嘅飛蛾乸會喺啲植物左近（啲葉上面或者根隔離）產卵；跟手啲幼蟲（毛蟲）孵咗出嚟之後就會靠食樖植物嘅某啲部份嚟維生，啲幼蟲生到咁上下就會結蛹；當變態嘅過程完咗，個蛹會爆開，隻成蟲（隻飛蛾）就會由個蛹嗰度捐出嚟；等兩對翼乾咗，隻蛾就會要喺好短嘅時間（好多時得嗰一兩日）之內飛去搵伴侶；交配完咗之後，啲飛蛾乸就會產卵；無論公定乸，飛蛾通常喺交配嘅過程完咗之後冇幾耐就會死。佢哋嘅下一代跟住就會由頭噉經歷過呢個由生到死嘅過程。

飛蛾內部有豐富嘅多樣性：直至 2000 年代為止，已知嘅飛蛾物種大約有成 160,000 種咁多，可以分做超過 100 個科；相比之下，例如蝴蝶就得嗰 18,000 個物種左右－飛蛾物種嘅數量多過蝴蝶物種好多。

啲人成日撈亂飛蛾同蝴蝶，但查實兩者係有啲分別嘅：

• 外形比較：飛蛾係蝴蝶嘅近親，兩者喺外形上有好多共通點－兩種生物都係昆蟲，身體表面有一節節嘅外骨骼，成蟲嘅身體分做頭、胸同腹三橛；同蝴蝶一樣，飛蛾有複眼同觸鬚，全部物種都有翼識飛；除此之外，飛蛾同蝴蝶都屬鱗翅目，喺外形上最大嘅特徵係有兩對（四隻）翼，啲翼上面佈滿咗鱗，啲鱗色水可以好鮮艷多變；不過飛蛾個樣又同蝴蝶有明顯差異－
  • 飛蛾興夜晚出沒而蝴蝶興朝頭早出沒，飛蛾通常色水暗淡啲（不過都有唔少例外）；
  • 飛蛾唔飛嗰陣興攤開對翼，而蝴蝶唔飛嗰陣就比較多會將對翼合埋一齊；
  • 飛蛾同蝴蝶嘅觸鬚形狀唔同－多數蝴蝶物種嘅觸鬚都係好幼好細條，而且個尾段有個細細地嘅波嘅，而飛蛾嘅觸鬚就係呈羽毛噉形，兼且個尾度冇波嘅。

2017 年影到一隻物種不明嘅飛蛾；一隻典型嘅飛蛾唔飛嗰陣興攤開對翼，而且對觸鬚好似羽毛噉形。    2019 年影到一隻帝王斑蝶；一隻典型嘅蝴蝶唔飛嗰陣興合埋對翼，而且對觸鬚幼長。

• 進化史：喺地球史上，飛蛾出現嘅時間早過蝴蝶，化石研究搵到早喺 1,900,000 年前飛蛾就存在；仲有，蝴蝶係單系群嘅生物－即係話所有現存嘅蝴蝶喺進化史上都有一個共同嘅祖先；相比之下，飛蛾唔係單系群－其中一個可能嘅情況係，喺飛蛾嘅進化史上某啲點度，有幾個生物物種分別噉進化成飛蛾，而呢啲分別各自進化出嚟嘅族群甚至仲可能有雜交過；生物學家冇辦法將所有現存嘅飛蛾追溯到去一個共同祖先度。
  • 飛蛾同蝴蝶喺進化上嘅共通點係，佢哋都係同某啲開花植物物種一齊進化出嚟嘅，一般認為噉應該係因為飛蛾同蝴蝶，無論成蟲定幼蟲，多數都係靠住食開花植物嘅某啲部份維生嘅－例如毛蟲（飛蛾同蝴蝶嘅幼體）好興食植物嘅葉，而蝴蝶就出嗮名鍾意食花蜜。

 

 

一條藍老虎飛蛾嘅毛蟲

 

合桃仁飛蛾嘅蛹；飛蛾同蝴蝶一樣係行完全變態嘅－幼蟲會經蛹嘅階段變成成蟲。

食嘢

飛蛾嘅幼蟲（毛蟲）多數係食齋嘅，具體食啲乜就視物種而定，好多飛蛾物種嘅毛蟲會食植物嘅葉同根呀噉，亦都有啲飛蛾嘅毛蟲會食人類嘅衫或者農作物，因而俾人視為害蟲。

成年嘅飛蛾有好多都係唔會食嘢嘅：呢啲物種嘅毛蟲會猛咁勁食嘢儲起養份，生到咁上下（途中會脫皮增齡）就會結蛹，蛹過咗一段時間之後就會有隻成蟲捐出嚟；隻成蟲好多時甚至乎連口器都冇－佢哋由個蛹捐出嚟之後要做嘅，就係有咁快得咁快去搵返個伴侶交配傳宗接代，生完蛋之後冇幾耐，就算佢哋冇俾獵食者食落肚，最後都會監生餓死，例如合桃仁飛蛾（北美洲一種出名大隻嘅飛蛾）嘅口器係痕跡器官，冇能力食嘢。

亦有一部份嘅飛蛾物種係啲成蟲會食嘢嘅，多數係靠飲花蜜或者類似嘅液體維生，例子可以睇吓骷髏天蛾等多種屬天蛾科嘅飛蛾物種。

天敵

同多數嘅昆蟲一樣，飛蛾喺食物鏈入面嘅位置並唔高。夜晚出沒嘅動物好多時都會食飛蛾，好似係好多個物種嘅蝙蝠同埋貓頭鷹噉；除此之外，飛蛾嘅獵食者仲有好多物種嘅蜘蛛、蜻蜓同螳螂等嘅大隻食肉昆蟲、蜥蜴、貓、狗、嚙齒目甚至係某啲物種嘅熊；而喺毛蟲階段嗰陣，飛蛾幼蟲仲有機會會受到寄生蜂攻擊。

因為佢哋有咁多天敵，飛蛾進化出唔少應對獵食者嘅對策：例如有實驗顯示，當飛蛾聽到蝙蝠發出嘅超聲波嗰陣，曉反射性噉降低自己嘅飛行高度，似乎係準備迴避天敵蝙蝠嘅攻擊；而喺燈蛾呢個亞科嘅飛蛾當中，有啲物種甚至仲識得自己射啲聲波出嚟打亂蝙蝠嘅超聲波定位系統，等啲蝙蝠難啲探測到佢哋嘅位置。

撲光行為

飛蛾另一樣出名嘅特徵係，佢哋好興喺人造嘅光源（例如係火同電燈膽呀噉）四圍飛嚟飛去，甚至會撲埋去個光源度，就算個光源係火都係一樣。飛蛾嘅呢種行為出名到令粵文入面有咗句成語叫做燈蛾撲火（dang1 ngo4 pok3 fo2）－比喻啲人「自取滅亡」。

對於「飛蛾點解會有啲噉嘅行為」，目前科學界仲未有一個清楚嘅答案。其中一個假說主張，飛蛾撲光嘅行為同飛蛾體內嘅導航系統有啦掕：

• 頭先提咗，飛蛾多數係喺夜晚黑出沒嘅，呢點令到佢哋進化出嚟嘅體內導航系統係以「攞一個好勁嘅光源，再同個光源維持固定角度」嚟做原則嘅－噉講即係話，飛蛾飛嗰陣嘅準則係要攞個勁嘅光源－佢哋偏向夜行，所以個光源正常嚟講會係月亮，再要自己飛行軌跡同個光源維持住某個固定嘅角度。如果佢攞嗰個光源係月亮嘅話，因為月球離地球表面好遠，所以一隻飛蛾就算飛過成個樹林咁遠嘅距離，佢自己條飛行軌跡同月亮之間嘅角度都冇咩點變，所以隻飛蛾會繼續飛直線。
• 呢個導航系統一到咗現代就出事。人類文明嘅發展令飛蛾周圍嘅環境多咗好多勁嘅光源；飛蛾好多時會攞咗火或者電燈呢啲人造光源嚟做導航（當咗呢啲人造光源係月亮），而當一隻飛蛾嘗試同一個離佢好近嘅人造光源－例如係一盞燈－「維持固定角度」嗰陣，佢就會開始圍住盞燈打轉；而且因為飛蛾慣咗用月亮做導航，對於佢哋嚟講，「飛高啲」等如「飛近啲個導航光源」－一隻攞咗盞燈做導航嘅飛蛾嘗試「提升高度」嗰陣，佢就會變成飛埋去盞燈度，最後仲可能因而撞落盞燈度。人造光源嘅呢種影響甚至仲對某啲飛蛾物種造成威脅，令佢哋數量下降。

 

為患

有好多個物種嘅飛蛾啲幼蟲會食各種嘅植物－包括咗唔少農作物，所以飛蛾喺世界好多個地方都俾人當做害蟲。當中比較出名嘅有以下呢啲：

• 羅姆飛蛾出咗名係一種喺美國東北嘅入侵性物種，佢哋嗰啲幼蟲會食好多種植物嘅葉，進而對嗰頭啲樹林造成好大嘅破壞；國際自然保護聯盟甚至仲喺廿一世紀初將羅姆飛蛾列做世上頭 100 大入侵性物種之一。
• 喺熱帶同亞熱帶地區，小菜蛾成日破壞十字花科嘅農作物－呢個科包括咗西蘭花同椰菜等嘅蔬菜；小菜蛾乸會喺呢啲農作物上面生蛋，啲毛蟲生咗出嚟就會食同破壞呢啲農作物；
• 喺撒哈拉沙漠以南嘅非洲都有飛蛾喺度破壞粟米同甘蔗。

... 呀噉。

蠶蟲

 

又有一啲物種嘅飛蛾有經濟價值。當中最出名嘅要數蠶蟲（粵讀：caam4 cung2）。

蠶蟲係一個飛蛾物種，學名係 Bombyx mori，早喺公元前 3,000 年嗰陣嘅古華夏經已俾人馴養咗；蠶蟲毛蟲主要食白桑嘅葉維生，佢哋同第啲飛蛾一樣行完全變態，啲毛蟲生到咁上下就會結蛹；最重要嘅係，蠶蟲結蛹嗰陣會吐啲絲出嚟，而呢啲絲跟住可以攞嚟整絲綢－絲綢係種好緊要嘅經濟產物。因為噉，有唔少人都會養蠶蟲做絲綢生產嘅一環，形成咗養蠶呢個行業。而直至 2000 年代為止，養蠶業每年生產成 1 億 3,000 萬 kg 咁多絲，咁多絲大約值成 2 億 5,000 萬美金。

文化影響

飛蛾通常都係夜晚黑出沒，色水暗淡唔多靚（但查實有唔少例外），而且又有多個物種係害蟲，搞到佢哋喺人類文化入面嘅形象好多時都唔多正面。

• 靈異相關：
  • 西洋：西人傳統上都好興將飛蛾同啲恐怖靈異嘢聯想埋一齊，用飛蛾做呢啲嘢嘅象徵；例如係 2012 年出嘅美國恐怖片《陰魂轉讓》噉，呢套戲個故仔講到邪靈，用咗飛蛾嘅存在嚟代表邪靈作祟，而且套戲啲海報仲有描繪其中一個角色「唔受控制噉嘔啲飛蛾出嚟」嘅情境令觀眾不安；事實係「用飛蛾象徵恐怖靈異嘢」呢種做法喺西洋嘅創作品入面成日都見到，常見到仲俾電視橋段網（一個專講橋段嘅維基型網站）收錄咗做一條橋段。
  • 唐人：唐人－包括粵人－傳統上都有類似嘅文化，相信飛蛾同鬼魂有某啲瓜葛；唐人多數都有傳統，相信死咗冇幾耐嘅人嘅靈魂會喺頭七嗰陣化身做昆蟲－尤其係飛蛾－飛返嚟見屋企人，又有啲傳說講飛蛾係帶亡魂上路嘅昆蟲；因為噉，喺傳統習俗裏面，如果喺先人死咗嘅尾七嗰時有飛蛾喺屋企出現，絕對唔可以殺或者捉隻飛蛾，認為捉同殺飛蛾會搞到先人返唔到落陰間。除咗噉，亦都有傳說講飛蛾（同近親蝴蝶）會喺靈堂附近徘徊。
• 做嘢食：有啲人會攞飛蛾嘅幼蟲或者蛹嚟食，例如喺剛果民主共和國，啲人會用超過 30 個物種嘅飛蛾幼蟲嚟整嘢食，仲有埋跨國市場－剛果嘅人唔止會將啲飛蛾幼蟲喺本地嘅市場度賣，仲會成噸成噸噉將呢啲毛蟲運去第啲非洲國家度賣；除此之外，東北三省同日韓等地都有傳統會炸蠶蟲嘅蛹嚟食。

... 等等。

•  
  烏桕天蠶蛾擘開嗮啲翼可以有 30 cm 咁長。
•  
  一隻骷髏天蛾；佢哋會入侵蜜蜂竇偷蜜糖，有個花名叫「打劫蜜蜂嘅蟲」。
•  
  一條骷髏天蛾嘅毛蟲
•  
  公嘅月亮蛾；月亮蛾畀唔少人覺得佢好睇。
•  
  合桃仁飛蛾成蟲擘開啲翼可以有成 9.5 至 15.5 cm 咁長。
•  
  巨型豹飛蛾
•  
  樺尺蠖；佢哋成日俾人攞嚟做物競天擇嘅例子。
•  
  豹尺蛾
•  
  藍老虎飛蛾
•  
  一隻飛緊嘅白薯天蛾
•  
  一隻大燕蛾
•  
  葉形蛾嘅毛蟲
•  
  一幅描繪蠶蟲嘅圖畫
•  
  一堆蠶蛹；有幾隻已經變咗成蟲。
•  
  一碟炸蠶蛹

 

維基同享有多媒體嘅嘢：
飛蛾

• 蝴蝶，飛蛾嘅近親
• 毛蟲，飛蛾嘅幼體
• 蝙蝠，飛蛾其中一種最重要嘅天敵
• 香港飛蛾
• 恐怖故事
• 飛蛾男