ᱨᱟᱵᱟᱝ ᱨᱤᱛᱩ
ᱨᱟᱵᱟᱝ ᱨᱤᱛᱩ ᱫᱚ ᱯᱩᱥ ᱟᱨ ᱢᱟᱜᱽ ᱵᱚᱸᱜᱟ ᱨᱮ ᱵᱟᱰᱟᱭ ᱧᱟᱢᱚᱜᱼᱟ ᱾ ᱦᱟᱣᱮᱫ ᱨᱤᱛᱩ ᱪᱟᱵᱟ ᱪᱟᱵᱟ ᱥᱟᱶ ᱛᱮᱜᱮ ᱨᱟᱵᱟᱝ ᱨᱤᱛᱩ ᱫᱚ ᱵᱚᱞᱚ ᱦᱤᱡᱩᱜᱼᱟ ᱾ ᱚᱱᱟᱛᱮ ᱱᱚᱣᱟ ᱨᱤᱛᱩ ᱫᱚ ᱢᱤᱫ ᱜᱮ ᱟᱴᱠᱟᱨᱚᱜᱼᱟ ᱾ ᱨᱟᱵᱟᱝ ᱨᱤᱫᱩ ᱨᱮ ᱫᱚ ᱟᱹᱰᱤ ᱡᱩᱨ ᱨᱟᱵᱟᱝᱟ ᱾ ᱤᱱᱠᱟᱹ ᱫᱷᱟᱨᱟ ᱩᱭᱩ ᱠᱚᱛᱷ ᱫᱚ ᱵᱟᱢ ᱥᱟᱢᱵᱽᱲᱟᱣ ᱠᱮᱭᱟ ᱾ ᱧᱤᱫᱟᱹ ᱫᱚ ᱢᱟᱨᱟᱝᱚᱜᱼᱟ ᱟᱨ ᱧᱤᱫᱟᱹ ᱜᱮ ᱡᱟᱹᱥᱛᱤ ᱨᱟᱵᱟᱝ ᱵᱩᱡᱷᱟᱹᱣᱜ ᱾ ᱱᱚᱶᱟ ᱚᱠᱛᱚ ᱨᱮ ᱫᱚ ᱥᱮᱛᱟᱜ ᱵᱮᱲᱟ ᱠᱟᱱᱠᱟᱱᱟᱣ ᱨᱮᱭᱟᱲ ᱵᱩᱡᱷᱟᱹᱣᱜᱼᱟ ᱾ ᱱᱚᱣᱟ ᱨᱤᱛᱩ ᱨᱮ ᱫᱤᱱ ᱫᱚ ᱦᱩᱰᱤᱧ ᱜᱮ ᱵᱩᱡᱷᱟᱹᱣᱜᱼᱟ, ᱟᱹᱰᱤ ᱞᱟᱜᱮ ᱟᱹᱭᱩᱵ ᱜᱚᱫᱚᱜᱼᱟ ᱾
ᱱᱟᱭᱠᱚ
ᱨᱟᱵᱟᱝ ᱨᱤᱛᱩ ᱫᱚ ᱦᱟᱣᱮᱫ ᱨᱤᱛᱩ ᱯᱟᱨᱚᱢ ᱠᱟᱛᱮ ᱦᱩᱭᱩᱜᱼᱟ ᱾ ᱩᱱ ᱚᱠᱛᱚ ᱥᱮᱨᱢᱟ ᱨᱮᱱᱟᱜ ᱠᱩᱲᱟᱹᱭ ᱪᱟᱹᱥᱤ ᱧᱟᱢ ᱠᱟᱜ ᱛᱮ ᱟᱹᱰᱤ ᱨᱟᱹᱥᱠᱟᱹᱭ ᱟᱹᱭᱠᱟᱹᱣᱟ ᱟᱨ ᱱᱚᱣᱟ ᱨᱟᱵᱟᱝ ᱨᱤᱛᱩ ᱨᱮ ᱜᱮ ᱯᱟᱨᱟᱵᱽ ᱠᱚᱦᱚᱸ ᱧᱟᱢᱚᱜᱼᱟ ᱥᱟᱠᱨᱟᱛ ᱯᱟᱨᱟᱵᱽ ᱾ ᱚᱱᱟᱛᱮ ᱨᱟᱹᱥᱠᱟᱹ ᱨᱚᱢᱚᱡᱽ ᱜᱮ ᱫᱤᱱ ᱯᱚᱞᱚᱢᱚᱜᱼᱟ ᱵᱟᱭ ᱴᱷᱤᱠᱟᱹᱜᱼᱟ ᱾
ᱨᱩᱯ ᱨᱚᱝ
ᱨᱟᱵᱟᱝ ᱨᱤᱛᱩ ᱨᱮ ᱫᱚ ᱫᱷᱟᱹᱨᱛᱤ ᱨᱮᱱᱟᱜ ᱨᱩᱯᱨᱚᱝ ᱟᱹᱰᱤ ᱪᱮᱨᱦᱟ ᱧᱮᱞᱚᱜᱼᱟ ᱾ ᱥᱮᱛᱟᱜ ᱵᱮᱲᱟ ᱪᱟᱸᱫᱚ ᱨᱟᱠᱟᱵ ᱟᱨᱟᱜ ᱡᱚᱨᱚᱝ ᱡᱚᱨᱚᱝ ᱛᱟᱨᱟᱥ ᱪᱮ ᱛᱟᱥᱟᱫ ᱠᱚ ᱡᱤᱲᱤᱫ ᱡᱟᱲᱟᱝ ᱥᱚᱱᱟ ᱞᱮᱠᱟ ᱧᱮᱞᱚᱜᱼᱟ ᱾ ᱱᱟᱱᱟ ᱦᱩᱱᱟᱹᱨ ᱵᱟᱦᱟ ᱯᱷᱩᱴᱟᱹᱣ ᱠᱚᱜᱼᱟ ᱟᱨᱟᱜ, ᱥᱟᱥᱟᱝ, ᱞᱤᱞ ᱯᱩᱸᱰ ᱟᱹᱰᱤ ᱱᱟᱯᱟᱭ ᱜᱮ ᱧᱮᱞᱚᱜᱼᱟ ᱾ ᱥᱮᱛᱟᱜ ᱥᱤᱥᱤᱨ ᱛᱮ ᱟᱹᱨᱩᱵ ᱥᱟᱯᱷᱟ ᱠᱚᱜᱼᱟ ᱛᱟᱹᱦᱩᱸ ᱧᱮᱞᱚᱜ ᱡᱮᱸᱜᱮᱫ ᱡᱮᱸᱜᱮᱫ ᱾ ᱱᱚᱣᱟ ᱚᱠᱛᱚ ᱨᱮ ᱚᱱᱚᱞᱤᱭᱟᱹ ᱥᱮᱨᱮᱧ ᱥᱤᱠᱟᱹᱨᱤᱭᱟᱹ ᱚᱱᱚᱬᱦᱤᱭᱟᱹ ᱠᱚ ᱫᱷᱟᱹᱨᱛᱤ ᱨᱮᱱᱟᱜ ᱨᱩᱯᱨᱚᱝ ᱜᱟᱵᱟᱱ ᱠᱟᱛᱮ ᱟᱠᱚᱣᱟᱜ ᱵᱟᱵᱽᱱᱟ ᱠᱚ ᱯᱷᱚᱴᱮᱞ ᱚᱪᱚᱭᱟ ᱾
ᱠᱟᱭᱠᱚ
ᱨᱟᱵᱟᱝ ᱨᱤᱛᱩ ᱨᱮᱫᱚ ᱟᱹᱰᱤ ᱜᱮ ᱨᱟᱵᱟᱝᱟ ᱾ ᱱᱚᱣᱟ ᱨᱤᱛᱩ ᱨᱮ ᱨᱮᱸᱜᱮᱡ ᱦᱚᱲ ᱵᱟᱹᱲᱛᱤ ᱠᱚ ᱠᱚᱥᱴᱚᱜᱼᱟ ᱾ ᱩᱭᱩ ᱞᱟᱹᱜᱤᱱ ᱠᱷᱟᱱᱛᱟ ᱦᱚᱸ ᱵᱟᱭ ᱛᱟᱦᱮᱸᱱ ᱛᱟᱠᱚᱣᱟ ᱾ ᱨᱟᱵᱟᱝ ᱛᱮ ᱛᱤᱱᱟᱹᱜ ᱨᱩᱣᱟᱹ ᱠᱚ ᱪᱚ ᱜᱷᱟᱹᱞ ᱠᱚᱣᱟ ᱾ ᱦᱟᱲᱟᱢ ᱵᱩᱰᱷᱤ ᱠᱚ ᱫᱚ ᱨᱟᱵᱟᱝ ᱛᱮᱠᱚ ᱯᱟᱨᱚᱢ ᱤᱫᱤ ᱜᱚᱫᱚᱜᱼᱟ ᱾
ᱵᱟᱹᱲᱛᱤ
ᱨᱟᱵᱟᱝ ᱨᱤᱛᱩ ᱠᱚᱥᱴᱚ ᱣᱟᱱ ᱨᱮᱦᱚᱸ ᱟᱹᱰᱤ ᱨᱟᱹᱥᱠᱟᱹ ᱟᱱ ᱨᱤᱛᱩ ᱠᱟᱱ ᱜᱮᱭᱟ ᱾ ᱦᱚᱲ ᱠᱚ ᱛᱩᱞᱩᱡ ᱧᱟᱯᱟᱢ ᱟᱨ ᱫᱷᱟᱹᱨᱛᱤ ᱨᱮᱱᱟᱜ ᱜᱚᱲᱦᱚᱱ ᱛᱮ ᱢᱚᱱᱮ ᱡᱤᱣᱤ ᱟᱹᱰᱤ ᱛᱮᱫᱼᱮ ᱟᱹᱨᱩ ᱯᱷᱮᱨᱟᱣᱟ ᱾ ᱚᱱᱟᱛᱮ ᱵᱟᱹᱲᱛᱤ ᱦᱚᱲ ᱱᱚᱣᱟ ᱨᱤᱛᱩ ᱛᱟᱺᱜᱤ ᱛᱟᱬᱟᱜ ᱨᱮ ᱠᱚ ᱛᱟᱦᱮᱸᱱᱟ ᱾
This article uses material from the Wikipedia ᱥᱟᱱᱛᱟᱲᱤ article ᱨᱟᱵᱟᱝ ᱨᱤᱛᱩ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.