ᱥᱟᱱᱛᱟᱲ ᱦᱩᱞ
ᱥᱟᱱᱛᱟᱲ ᱦᱩᱞ ᱫᱚ ᱮᱦᱚᱵ ᱞᱮᱱᱟ ᱑᱘᱕᱕ ᱥᱟᱞ ᱨᱮ ᱾ ᱤᱝᱨᱮᱡᱽ ᱟᱢᱚᱞ ᱨᱮ ᱡᱚᱢᱤᱫᱟᱨ, ᱢᱚᱦᱟᱡᱚᱱ ᱟᱨ ᱤᱝᱨᱮᱡᱽ ᱠᱚᱨᱢᱚᱪᱟᱹᱨᱤ ᱠᱚ ᱦᱚᱲ ᱪᱮᱛᱟᱱ ᱱᱟᱦᱟᱪᱟᱨ ᱠᱚ ᱮᱦᱚᱵ ᱞᱮᱫᱛᱮ ᱩᱱᱠᱩ ᱵᱤᱨᱩᱫᱷ ᱥᱟᱱᱛᱟᱲ ᱠᱚ ᱦᱩᱞ ᱞᱮᱫᱼᱟ ᱾ ᱤᱝᱨᱮᱡᱽ ᱵᱤᱨᱩᱫᱷ ᱨᱮ ᱱᱤᱭᱟᱹ ᱜᱮ ᱯᱟᱹᱦᱤᱞ ᱞᱟᱹᱲᱦᱟᱹᱭ ᱠᱟᱱᱟ ᱜᱚᱴᱟ ᱵᱷᱟᱨᱚᱛ ᱫᱤᱥᱚᱢ ᱨᱮ᱾ ᱱᱤᱭᱟᱹ ᱞᱟᱹᱲᱦᱟᱹᱭ ᱨᱮ ᱥᱤᱫᱚ ᱟᱨ ᱠᱟᱹᱱᱦᱩ ᱢᱩᱨᱢᱩ, ᱪᱟᱸᱫᱽ ᱢᱩᱨᱢᱩ, ᱵᱷᱟᱭᱨᱚ ᱢᱩᱨᱢᱩ ᱱᱩᱠᱩ ᱯᱩᱱ ᱵᱚᱭᱦᱟ ᱟᱨ ᱵᱟᱨ ᱠᱩᱲᱤ ᱵᱚᱭᱦᱟ ᱯᱷᱩᱞᱳ ᱟᱨ ᱡᱷᱟᱱᱚ ᱢᱩᱨᱢᱩ ᱛᱮᱠᱚ ᱫᱚ ᱟᱹᱜᱩᱣᱟᱹᱱ ᱞᱮᱠᱟ ᱛᱮᱠᱚ ᱛᱟᱦᱮᱸ ᱠᱟᱱᱟ ᱾ ᱥᱤᱯᱟᱹᱦᱤ ᱦᱩᱞ ᱨᱮᱱᱟᱜ ᱮᱦᱚᱵ ᱦᱚᱸ ᱥᱟᱱᱛᱟᱲ ᱦᱩᱞ ᱠᱷᱚᱱ ᱜᱮᱠᱚ ᱧᱟᱢ ᱞᱮᱫᱼᱟ ᱾
ᱱᱟᱜᱟᱢ
᱑᱘᱕᱕-᱕᱖ ᱥᱟᱞ ᱨᱮ ᱥᱟᱱᱛᱟᱲ ᱠᱚ ᱤᱝᱨᱮᱡᱽ ᱥᱚᱨᱠᱟᱨᱟᱜ ᱨᱚᱸᱡᱚᱱ ᱠᱷᱚᱱ ᱵᱟᱧᱪᱟᱣᱜ ᱞᱟᱹᱜᱤᱫ ᱠᱚ ᱞᱟᱹᱲᱦᱟᱹᱭ ᱞᱮᱫᱼᱟ᱾ ᱚᱱᱟ ᱥᱟᱶᱛᱮ ᱥᱩᱫᱽᱠᱷᱚᱨ, ᱢᱚᱦᱟᱡᱚᱱ ᱟᱨ ᱵᱮᱵᱽᱥᱟᱭᱤᱠ ᱵᱤᱨᱩᱫᱷ ᱨᱮᱦᱚᱸ ᱠᱚ ᱞᱟᱹᱲᱦᱟᱹᱭ ᱞᱮᱫᱼᱟ ᱾ ᱟᱞᱟᱫᱟ ᱥᱟᱱᱛᱟᱲ ᱫᱤᱥᱚᱢ ᱵᱮᱱᱟᱣ ᱞᱟᱹᱜᱤᱫ ᱱᱤᱭᱟᱹ ᱦᱩᱞ ᱫᱚ ᱦᱩᱭ ᱞᱮᱱᱟ ᱾ ᱵᱷᱟᱨᱚᱛ ᱫᱤᱥᱚᱢ ᱨᱮᱱᱟᱜ ᱫᱟᱹᱢᱤᱱ-ᱤ-ᱠᱚᱦᱚ ᱨᱮ ᱥᱟᱱᱛᱟᱲ ᱦᱚᱲ ᱠᱚ ᱡᱟᱹᱥᱛᱤ ᱜᱮᱠᱚ ᱛᱟᱦᱮᱸ ᱞᱮᱱᱟ ᱟᱨ ᱱᱤᱛᱚᱜᱟᱜ ᱵᱤᱨᱵᱷᱩᱢ ᱡᱮᱞᱟ ᱨᱮᱱᱟᱜ ᱵᱷᱚᱜᱽᱱᱟᱰᱤᱦᱤ ᱟᱹᱛᱩ ᱠᱷᱚᱱ ᱜᱮ ᱦᱩᱞ ᱫᱚ ᱮᱦᱚᱵ ᱞᱮᱱᱟ ᱾
ᱥᱤᱫᱩ ᱟᱨ ᱠᱟᱹᱱᱦᱩ ᱛᱟᱹᱠᱤᱱ
ᱥᱤᱫᱩ ᱟᱜ ᱡᱟᱱᱟᱢ ᱫᱚ ᱑᱘᱒᱕ ᱥᱟᱞ ᱨᱮ ᱦᱩᱭ ᱞᱮᱱᱟ ᱟᱨ ᱠᱟᱹᱱᱦᱩ ᱟᱜ ᱡᱟᱱᱟᱢ ᱫᱚ ᱑᱘᱒᱘ ᱥᱟᱞ ᱨᱮ ᱦᱩᱭ ᱞᱮᱱᱟ ᱾
ᱮᱛᱚᱦᱚᱵ
ᱥᱟᱱᱛᱟᱲ ᱠᱚ ᱪᱮᱛᱟᱱ ᱨᱮ ᱡᱚᱢᱤᱫᱟᱨ ᱢᱟᱦᱟᱡᱚᱱ ᱠᱚ ᱟᱜ ᱱᱟᱦᱟᱪᱟᱨ ᱵᱟᱹᱲᱛᱤ ᱞᱮᱱᱠᱷᱟᱱ ᱥᱤᱫᱚ ᱟᱨ ᱠᱟᱹᱱᱦᱩ ᱩᱱᱠᱩ ᱮᱨᱟᱲ ᱨᱮ ᱞᱟᱹᱲᱦᱟᱹᱭ ᱞᱟᱹᱜᱤᱫ ᱠᱤᱱ ᱴᱷᱟᱹᱣᱠᱟᱹ ᱠᱮᱫ ᱟ ᱾ ᱚᱱᱟ ᱞᱟᱹᱜᱤᱫ ᱑᱘᱕᱕ ᱥᱟᱞ ᱨᱮ ᱵᱷᱚᱜᱽᱱᱟᱰᱤᱦᱤ ᱡᱟᱦᱮᱨ ᱨᱮ ᱑᱐,᱐᱐᱐ ᱦᱚᱲ ᱠᱚ ᱡᱟᱣᱨᱟ ᱞᱮᱱᱟ ᱾ ᱯᱤᱯᱲᱟ ᱟᱹᱛᱩ ᱨᱤᱱᱤᱡ ᱫᱮᱥ ᱢᱟᱹᱡᱷᱤ ᱦᱟᱲᱢᱟ ᱢᱟᱹᱡᱷᱤ ᱟᱨ ᱟᱨ ᱪᱟᱱᱫᱽᱨᱟᱭ ᱢᱟᱹᱡᱷᱤ, ᱟᱢᱜᱟᱹᱪᱷᱤᱭᱟᱹ ᱨᱤᱱᱤᱡ ᱜᱟᱹᱨᱵᱷᱩ ᱢᱟᱹᱡᱷᱤ, ᱥᱤᱢᱩᱛᱚᱞᱤ ᱟᱹᱛᱩ ᱨᱤᱱᱤᱡ ᱫᱷᱚᱱᱨᱟᱭ ᱦᱮᱢᱵᱽᱨᱚᱢ ᱞᱤᱴᱤᱯᱟᱲᱟ ᱟᱹᱛᱩ ᱨᱤᱱᱤᱡ ᱞᱟᱞ ᱢᱟᱹᱡᱷᱤ ᱟᱨ ᱵᱷᱩᱜᱽᱞᱩ ᱯᱟᱨᱜᱟᱱᱟ, ᱯᱟᱰᱮᱨᱠᱚᱞᱟᱨ ᱟᱹᱛᱩ ᱨᱤᱱᱤᱡ ᱥᱟᱹᱢᱩ ᱯᱟᱨᱜᱟᱱᱟ ᱮᱢᱟᱱ ᱥᱮᱞᱮᱫ ᱠᱚ ᱛᱟᱦᱮᱸ ᱠᱟᱱᱟ ᱾
ᱚᱠᱛᱚ
᱑᱘᱕᱕-᱕᱖ ᱥᱟᱞᱨᱮ ᱦᱩᱭ ᱟᱠᱟᱱ ᱦᱩᱞᱨᱮ ᱤᱝᱨᱮᱡᱽ ᱥᱚᱨᱠᱟᱨ ᱦᱟᱹᱛᱤ, ᱥᱟᱫᱚᱢ ᱟᱨ ᱵᱟᱹᱱᱫᱩᱠ ᱠᱚᱭ ᱵᱮᱵᱷᱟᱨ ᱞᱮᱫᱼᱟ᱾ ᱦᱚᱲ ᱦᱚᱯᱚᱱ ᱠᱚᱫᱚ ᱟᱜ ᱥᱟᱨ ᱱᱤᱭᱟᱹ ᱛᱮᱜᱮ ᱠᱚ ᱞᱟᱹᱲᱦᱟᱹᱭ ᱞᱮᱫᱼᱟ᱾ᱦᱩᱞ ᱚᱠᱛᱮ ᱜᱮᱞᱥᱟᱭ ᱜᱮᱞ ᱤᱝᱨᱮᱡᱽ ᱟᱨ ᱦᱚᱲ ᱠᱚ ᱵᱚᱸᱜᱟ ᱛᱟᱞᱟ ᱞᱮᱱᱟ ᱾ ᱦᱚᱲ ᱦᱚᱯᱚᱱᱟᱜ ᱦᱩᱞ ᱧᱮᱞᱛᱮ ᱤᱝᱨᱮᱡᱽ ᱥᱚᱨᱠᱟᱨ ᱮ ᱵᱚᱛᱚᱨ ᱩᱛᱟᱹᱨ ᱞᱮᱱᱟ ᱾ ᱞᱟᱹᱲᱦᱟᱹᱭ ᱨᱮ ᱥᱤᱫᱚ, ᱠᱟᱹᱱᱦᱩ, ᱪᱟᱸᱫᱽ, ᱵᱷᱟᱭᱨᱚ ᱠᱚ ᱵᱚᱸᱜᱟ ᱛᱟᱞᱟ ᱮᱱᱠᱷᱟᱱ ᱑᱘᱕᱖ ᱥᱟᱞ ᱨᱮᱱᱟᱜ ᱤᱝᱨᱮᱡᱤ ᱱᱚᱵᱷᱮᱢᱵᱚᱨ ᱪᱟᱸᱫᱚ ᱨᱮ ᱦᱩᱞ ᱫᱚ ᱢᱩᱪᱟᱹᱫ ᱞᱮᱱᱟ ᱾
ᱦᱩᱞ ᱨᱮᱱᱟᱜ ᱡᱟᱹᱨᱩᱲ ᱠᱟᱛᱷᱟ ᱠᱚ
᱑ᱹ ᱑᱘᱕᱕ ᱥᱟᱞ ᱨᱮᱱᱟᱜ ᱓᱐ ᱡᱩᱱ ᱵᱤᱨᱵᱷᱩᱢ ᱡᱮᱞᱟ ᱨᱮᱱᱟᱜ ᱵᱷᱚᱜᱽᱱᱟᱰᱤᱦ ᱟᱹᱛᱩ ᱨᱮ ᱜᱮᱞᱥᱟᱭ ᱯᱮᱜᱮᱞ ᱦᱚᱲ ᱠᱚ ᱡᱟᱣᱨᱟ ᱞᱮᱱᱟ ᱾ ᱚᱱᱟ ᱡᱟᱣᱨᱟ ᱠᱷᱚᱱ ᱜᱮ ᱥᱤᱫᱚ - ᱠᱟᱹᱱᱦᱩ ᱦᱩᱞ ᱠᱤᱱ ᱦᱚᱦᱚ ᱞᱮᱫᱼᱟ ᱾ ᱚᱸᱰᱮ ᱠᱷᱚᱱ ᱜᱮ ᱦᱚᱲ ᱦᱚᱯᱚᱱ ᱠᱚ ᱠᱚᱞᱠᱟᱛᱟ ᱨᱮ ᱵᱚᱰᱚ ᱞᱟᱴᱷ ᱴᱷᱮᱱ ᱟᱹᱭᱫᱟᱹᱨᱤ ᱵᱟᱰᱟᱭ ᱚᱪᱚ ᱞᱟᱹᱜᱤᱫ ᱛᱮ ᱛᱟᱲᱟᱢ ᱠᱚ ᱮᱦᱚᱵ ᱞᱮᱫᱼᱟ (The first Long March has organised during the Santal rebellion in the history of Indian sub-continent)᱾
᱒ᱹᱥᱤᱫᱚ ᱠᱟᱹᱱᱦᱩᱣᱟᱜ ᱦᱩᱞ ᱰᱟᱦᱟᱨ ᱯᱟᱸᱡᱟ ᱠᱟᱛᱮᱫ ᱡᱩᱞᱟᱹᱭ ᱪᱟᱸᱫᱚ ᱨᱮᱱᱟᱜ ᱗ ᱛᱟᱹᱨᱤᱠᱷ ᱫᱤᱜᱷᱤ ᱛᱷᱟᱱᱟ ᱨᱮᱱ ᱫᱟᱨᱳᱜᱟ ᱢᱚᱦᱮᱥᱞᱟᱞ ᱥᱟᱶᱛᱮ ᱜᱮᱞ ᱟᱨᱮ ᱦᱚᱲ ᱠᱚ ᱜᱚᱡ ᱠᱮᱫ ᱠᱚᱣᱟ ᱾
᱓ᱹ ᱤᱝᱨᱮᱡᱽ ᱠᱚ ᱵᱤᱨᱩᱫᱷ ᱱᱤᱭᱟᱹ ᱦᱩᱞᱨᱮ ᱦᱚᱲ ᱦᱚᱯᱚᱱ ᱥᱟᱶᱛᱮ ᱠᱩᱢᱟᱨ, ᱛᱮᱞᱤ, ᱠᱚᱨᱢᱚᱠᱟᱨ, ᱪᱟᱢᱟᱨ, ᱰᱳᱢ ᱟᱨ ᱨᱮᱸᱜᱮᱡ ᱦᱤᱱᱫᱩ, ᱢᱩᱥᱞᱟᱹ ᱦᱚᱸᱠᱚ ᱛᱟᱦᱮᱸ ᱠᱟᱱᱟ᱾
᱔ᱹ ᱥᱟᱱᱛᱟᱲ ᱦᱩᱞ ᱫᱚ ᱵᱷᱟᱨᱚᱛ ᱫᱤᱥᱚᱢ ᱯᱷᱩᱨᱜᱟᱹᱞ ᱨᱮᱱᱟᱜ ᱠᱷᱟᱹᱞᱤ ᱯᱟᱹᱦᱤᱞ ᱞᱟᱹᱲᱦᱟᱹᱭ ᱥᱩᱢᱩᱝ ᱫᱚ ᱵᱟᱝ ᱛᱟᱦᱮᱸ ᱠᱟᱱᱟ, ᱱᱚᱣᱟ ᱫᱚ ᱨᱮᱸᱜᱮᱡ ᱟᱨ ᱠᱤᱥᱟᱹᱬ ᱦᱚᱲᱟᱜ ᱯᱟᱹᱦᱤᱞ ᱞᱟᱹᱲᱦᱟᱹᱭ ᱦᱚᱸ ᱛᱟᱦᱮᱸ ᱠᱟᱱᱟ ᱾
ᱥᱟᱹᱠᱷᱭᱟᱹᱛ
ᱵᱟᱦᱨᱮ ᱡᱚᱱᱚᱲ
This article uses material from the Wikipedia ᱥᱟᱱᱛᱟᱲᱤ article ᱥᱟᱱᱛᱟᱲ ᱦᱩᱞ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.