Bitcoin: Kryptowärung

Am Géigesaz zu den etabléierten, staatleche Wärunge wéi den Dollar, den Euro asw., entsteet de Bitcoin dezentral a gëtt vu kengem Staat direkt kontrolléiert.

De Bitcoin ass 2008 op Basis vun der sougenannter Blockchain entstanen. D'Entstoe vum Bitcoin bleift bis haut ëmginn vum Rätsel ëm d'Identitéit vun enger Persoun (oder enger Grupp) mam Numm Satoshi Nakamoto. Doduerch datt am Laf vun de Joren ëmmer méi Leit sech Bitcoins zougeluecht hunn, ass de Wäert vun dëser Wärung op eng phenomenal Manéier an d'Luucht gaangen. Persounen, déi viru Jore Bitcoins kaaft a gehalen hunn, konnten hiren Asaz verzegfachen. Am Kontrast zu den etabléierte Wärungen, déi op Stabilitéit ausgeluecht sinn, ass de Bitcoin awer staark volatil. Säi Cours kann a kuerzer Zäit staark klammen oder falen. Obwuel de Bitcoin populär ass, konnt e sech bis op Ausnamen no iwwer engem Joerzéngt Bestoen awer nach ëmmer net als etabléiert Wärung, fir am Alldag weltwäit ze bezuelen, duerchsetzen.

De Bitcoin, grad wéi eng Hellewull weider kryptografesch Wärungen, déi och op Basis vu Blockchain enstane sinn, huet bis haut seng Verfechter, mee awer och seng Kritiker. De legale Status vu Kryptowärungen ass och weiderhin ëmstridden.